ۇكىمەت دەنساۋلىق ساقتاۋ مينيسترلىگى ارقىلى انالار مەن جاڭا تۋعان نارەستەلەرگە مەديسينالىق كومەك كورسەتۋ ساپاسىن ارتتىرۋعا باعىتتالعان شارالار كەشەنىن جۇزەگە اسىرىپ كەلەدى.
بوساندىرۋ قىزمەتى ماماندارىنىڭ بىلىكتى ءارى ۇيلەسىمدى جۇمىسىنىڭ ناتيجەسىندە 2024 جىلى 367 مىڭ ايەل ءساتتى بوساندى. پرەناتالدى سكرينينگپەن قامتۋ 90%-دى قۇرادى، دەپ حابارلايدى aqshamnews.kz primeminister.kz-كە سىلتەمە جاساپ.
جاڭا مەديسينالىق تەحنولوگيالاردى ەنگىزۋ جانە حاتتامالاردى جەتىلدىرۋ نەوناتالدى ءولىم-جىتىمدى 19%-عا تومەندەتۋگە، سونداي-اق سوڭعى 10 جىلدا نارەستەلەردىڭ شەتىنەپ كەتۋىن 6،7%-عا جانە انا ءولىمىن 11،4%-عا ازايتۋعا مۇمكىندىك بەردى. تۋا بىتكەن اقاۋلاردى ەرتە انىقتاۋ ۇلەسى 10%-عا ءوستى.
گەنەتيكالىق اۋرۋلار مەن تۋا بىتكەن اقاۋلاردى ەرتە انىقتاۋ ماقساتىندا 15 پەريناتالدى ورتالىقتا «ءبىر كۇندىك كلينيكالار» اشىلدى. بۇگىنگى تاڭدا 50 مىڭنان استام جۇكتى ايەل تەكسەرۋدەن ءوتتى. ناتيجەسىندە، 7 مىڭنان استام ايەلدە ۇرىقتىڭ دامۋىنداعى اقاۋلار انىقتالدى. پەريناتالدى ورتالىقتار بازاسىندا «ۇرىق مەديسيناسى» جوباسى دا جۇزەگە اسىرىلۋدا، ونىڭ شەڭبەرىندە 37 جاتىرىشىلىك وتا جاسالدى.
جاستار مەن بالا تۋۋعا قابىلەتتى جاستاعى ايەلدەردىڭ رەپرودۋكتيۆتى دەنساۋلىعىن ساقتاۋ ماقساتىندا ارنايى ىسكە قوسىلعان «انالار ساۋلىعى» باعدارلاماسى شەڭبەرىندە جۇكتىلىكتى جوسپارلاعان ءاربىر ايەل دەنساۋلىق جاعدايىن انىقتاۋ ءۇشىن مەديسينالىق تەكسەرۋدەن وتۋىنە مۇمكىندىك جاسالدى. اكۋشەرلىك-گينەكولوگيالىق كومەكتىڭ 25 كلينيكالىق حاتتاماسى وزەكتەندىرىلدى.
اكۋشەرلىك سالادا يننوۆاسيالىق تەحنولوگيالاردىڭ ءۇش ءتۇرى ەنگىزىلدى. مامانداردىڭ بىلىكتىلىگىن ارتتىرۋ شەڭبەرىندە 2 مىڭنان استام اكۋشەر-گينەكولوگ، 400 رەانيماتولوگ وقىتىلدى جانە 100 ۇيلەستىرۋشى دايارلاندى.
بوساندىرۋ جانە انا مەن بالاعا كورسەتىلەر قىزمەتتى دامىتۋمەن قاتار، مەملەكەتتىڭ جۇيەلى كۇش-جىگەرى امبۋلاتوريالىق دارى-دارمەكپەن قامتاماسىز ەتۋدى جەتىلدىرۋگە باعىتتالعان.
دەنساۋلىق ساقتاۋ مينيسترلىگى حالىقتىڭ ساپالى جانە ءقاۋىپسىز دارىلىك زاتتارعا ۇزدىكسىز قول جەتكىزۋى ءۇشىن ءبىرقاتار قادام قابىلدادى. 2024 جىلدىڭ قورىتىندىسى بويىنشا 2،9 ملن ناۋقاس تەگىن دارى-دارمەكپەن قامتاماسىز ەتىلدى. دارى-دارمەكتەردى ءتيىمدى پايدالانۋ ءۇشىن ستاسيونارلاردا 78 گوسپيتالدىق فارماسيا بولىمشەسى اشىلدى. پرەپاراتتاردى قابىلداۋدى دەربەستەندىرىلگەن ەسەپكە الۋدىڭ جاڭا ادىستەمەسى ەنگىزىلدى.
دارى-دارمەكتەردىڭ شەكتى باعالارى مەن ۇستەمەلەرىن رەتتەۋ ەرەجەلەرىنە وزگەرىستەر ەنگىزىلدى، بۇل امبۋلاتوريالىق قامتاماسىز ەتۋ شەڭبەرىندە دە، بولشەك ءدارىحانا جەلىسىندە دە دارىلىك زاتتاردىڭ قۇنىن تومەندەتۋگە مۇمكىندىك بەردى.