مەملەكەت باسشىسى «ياندەكس Global» كومپانياسىنىڭ باس ديرەكتورى دانييل شۋلەيكونى قابىلدادى.
كەزدەسۋ بارىسىندا Yandex Qazaqstan كومپانياسىنىڭ ەلىمىزدەگى قىزمەتىنىڭ نەگىزگى باعىتتارى مەن الداعى جوسپارلارى تالقىلاندى، دەپ حابارلايدى aqshamnews.kz.
اسىرەسە، ينتەرنەت-پلاتفورما ارقىلى حالىقتى جۇمىسپەن قامتۋ، جاساندى ينتەللەكت (AI) تەحنولوگيالارىن دامىتۋ جانە ۇلتتىق مادەني مۇرانى سيفرلىق كەڭىستىككە ەنگىزۋ ماسەلەلەرى ەرەكشە نازاردا بولدى.
پرەزيدەنت قاسىم-جومارت توقايەۆ Yandex Qazaqstan-نىڭ قازاقستانداعى سيفرلىق ترانسفورماسياعا قوسقان ۇلەسىن جوعارى باعالادى. ول كومپانيانىڭ شاعىن جانە ورتا بيزنەستى قولداۋ، ازاماتتاردىڭ ءومىر ساپاسىن ارتتىرۋ باعىتىنداعى باستامالارىنا وڭ كوزقاراس ءبىلدىردى. سونىمەن قاتار، مەملەكەت باسشىسى جاساندى ينتەللەكت قارقىندى دامىپ جاتقان قازىرگى كەزەڭدە ۇلتتىق بىرەگەيلىكتى ساقتاۋ مەن قازاق ءتىلى مەن مادەنيەتىن زاماناۋي تەحنولوگيالار ارقىلى ىلگەرىلەتۋدىڭ ماڭىزدىلىعىن اتاپ ءوتتى.
ءوز كەزەگىندە دانييل شۋلەيكو كومپانيا پلاتفورماسى ارقىلى جۇمىسپەن قامتۋ جوباسىنىڭ ناقتى ناتيجەلەرىمەن ءبولىستى. ونىڭ ايتۋىنشا، بۇگىندە 65 مىڭنان استام اۆتوكولىك جۇرگىزۋشىسى «ياندەكس. تاكسي» سەرىكتەسى رەتىندە الەۋمەتتىك قورعاۋعا يە بولىپ وتىر. سونىمەن قاتار، استانادا جاڭا يننوۆاسيالىق جوبالاردى ىسكە قوسۋ جوسپارلارى جونىندە بايانداپ، AI-Sana باعدارلاماسىنا قاتىسۋعا دايىن ەكەنىن راستادى.
كومپانيانىڭ ەلىمىز ەكونوميكاسىنا قوسقان ۇلەسى دە ايتارلىقتاي. 2024 جىلى Yandex Qazaqstan قازاقستانعا 29،5 ملرد تەڭگە كولەمىندە سالىق تولەسە، 2016 جىلدان بەرى جالپى ينۆەستيسيا كولەمى 225 ملرد تەڭگەدەن استى. بۇل كورسەتكىشتەر Yandexء-تىڭ قازاقستانداعى ۇزاق مەرزىمدى ءارى تۇراقتى سەرىكتەستىككە بەيىلدى ەكەنىن ايعاقتايدى.