ۇلتتىق ەكونوميكا ۆيسە-مينيسترى ازامات ءامرين سالىق رەفورماسىنا قاتىستى ماڭىزدى ماسەلەلەرگە توقتالدى.
ونىڭ ايتۋىنشا، قوسىلعان قۇن سالىعى (ققس) بويىنشا تىركەۋ شەگىنىڭ جوعارى بولۋىنا بايلانىستى كاسىپكەرلەر بيزنەسىن بولشەكتەپ، سالىق تولەۋدەن جالتارادى. سونىڭ سالدارىنان مەملەكەت جىل سايىن شامامەن 800 ملرد تەڭگە كولەمىندە تابىستان ايىرىلادى، دەپ حابارلايدى aqshamnews.kz.
- ورتا بيزنەس دە-فاكتو بار، ءبىراق دە-يۋرە جوق. ياعني كەي كاسىپكەرلەر قوسىلعان قۇن سالىعىنان (ققس) جالتارۋ ءۇشىن بيزنەستى بىرنەشە ۇساق قۇرىلىمعا بولەدى. مىسالى، ءىرى كاسىپورىن يەسى ونى بىرنەشە ج ش س رەتىندە ءبولىپ تاستايدى.
- بيۋدجەتكە تۇسەتىن قاراجات ازايادى. مۇنداي سحەمالار ەل ەكونوميكاسىنا ۇلكەن شىعىن كەلتىرەدى.
- ءادىل باسەكەلەستىك زاڭدىلىعى بۇزىلادى. سالىق تولەيتىن ادال كاسىپكەرلەر كولەڭكەلى ەكونوميكادا جۇرگەندەرمەن تەڭ دارەجەدە باسەكەلەسە المايدى.
- ماسەلەنى شەشۋ جولدارى. ققس بويىنشا تىركەۋ شەگىن تومەندەتۋ جانە جەڭىلدەتىلگەن ارنايى رەجيمدى تەك B2C بيزنەسكە قولدانۋ ۇسىنىلىپ وتىر.
- مەملەكەت پەن كاسىپكەرلەردىڭ بىرلەسكەن ارەكەتى ماڭىزدى. ەگەر بيزنەس سالىق ادىلەتتىلىگىن قولداماسا، مەملەكەتتىك ورگاندار كولەڭكەلى ەكونوميكانى جويۋدا تولىق ناتيجەگە جەتە المايدى.
قارجى جانە ەكونوميكا سالاسىنىڭ باسشىلارى 11 اقپاننان باستاپ وڭىرلەردە بيزنەس وكىلدەرىمەن كەزدەسىپ، ۇكىمەتتىڭ سالىق رەفورماسىن تالقىلاپ جاتىر.
ءبىز مىناداي تەتىكتى قاراستىرۋدى ۇسىنامىز: جالپى بەلگىلەنگەن ققس مولشەرلەمەسى 16%، ازىق-تۇلىك جانە دارى-دارمەك وندىرۋشىلەردى ققس-تان تولىق بوساتۋ، ال ءبىرقاتار سالالار ءۇشىن – 10% ارالىق مولشەرلەمە بولادى. وسىلايشا، ۇكىمەت ۇسىنىپ وتىرعان مولشەرلەمەلەردى سارالاۋ: 16%، 10%، 0% جانە بوساتۋ، - دەيدى ازامات ءامرين.
ققس – بيۋدجەتتى تولىقتىرۋدىڭ نەگىزگى كوزدەرىنىڭ ءبىرى. ققس مولشەرلەمەسىن ارتتىرۋ جانە سارالاۋ بيۋدجەتتىڭ مۇنايدان تۇسەتىن وزگەرمەلى كىرىستەرىنە تاۋەلدىلىگىن ازايتۋعا جانە الەۋمەتتىك جوبالاردى قارجىلاندىرۋعا مۇمكىندىك بەرەدى.
سالىق رەفورماسىن ىسكە اسىرۋ كەزىندە ەل بيۋدجەتىنە تۇسەتىن سالىق تۇسىمدەرى جىل سايىن 4-5 ترلن تەڭگەگە ارتادى دەپ بولجانىپ وتىر. بۇل قاراجات ۇلتتىق قورعا تاۋەلدىلىكتى ازايتۋعا، مەملەكەتتىك قارىز دەڭگەيىن تومەندەتۋگە، ينۆەستيسيالىق جوبالاردى قولداۋعا، دامۋ ينستيتۋتتارىن نىعايتۋعا، تۇرعىن ۇي-كوممۋنالدىق شارۋاشىلىعىن جانە جىلۋ-ەنەرگەتيكا جۇيەسىن جاڭعىرتۋعا قوسىمشا رەسۋرستار بولۋگە مۇمكىندىك بەرەدى