2025 جىلعى قاڭتار–ءساۋىر ايلارى ارالىعىندا ق ر ساۋدا جانە ينتەگراسيا مينيسترلىگىنىڭ ساۋدا جانە تۇتىنۋشىلاردىڭ قۇقىقتارىن قورعاۋ كوميتەتىنىڭ اۋماقتىق دەپارتامەنتتەرى ازاماتتاردىڭ قۇقىقتارىن جالپى سوماسى 690،5 ملن تەڭگەگە قورعادى.
بۇل — جۇيەلى ءارى ماقساتتى جۇمىستىڭ ناقتى ناتيجەسى. بۇل كەزەڭدە 122 تۇتىنۋشىنىڭ مۇددەسىن قورعاۋعا باعىتتالعان 34 رەزونانستىق ءىس قارالىپ، 461،9 ملن تەڭگە كولەمىندە وتەماقى قايتارىلدى.
وسى ىستەردىڭ قاتارىندا قايتارىلعان سوما 5 ملن تەڭگەدەن اسقان جاعدايلار دا بار. الماتى قالاسىندا پاتەر ساتىپ العان ازاماتقا زاڭمەن كومەك كورسەتىلدى. قابىرعالارداعى جارىقتار، جىلۋ وقشاۋلاۋىنىڭ ناشارلىعى جانە شەكتەن تىس شۋ دەڭگەيى انىقتالعان سوڭ، تۇتىنۋشىنىڭ شاعىمى نەگىزىندە 25،9 ملن تەڭگە قايتارىلدى. استانا قالاسىندا پرەميۋم ساناتىنداعى اۆتوكولىك ساتىپ العان ازامات كولىكتىڭ رۋلدىك باسقارۋ جۇيەسىندەگى اقاۋعا تاپ بولعان. سوت پروسەسىنە دەپارتامەنتتىڭ قاتىسۋىمەن ساتۋشىدان 45،8 ملن تەڭگە ءوندىرۋ تۋرالى شەشىم قابىلداندى. مۇنداي اقاۋى بار اۆتوكولىككە قاتىستى ىستەردىڭ جالپى سانى 21، ال قايتارىلعان قاراجات كولەمى 338،2 ملن تەڭگە. سونىمەن قاتار، پاۆلودار وبلىسىندا ءۇش تۇتىنۋشىعا 53،8 ملن تەڭگە، قىزىلوردا وبلىسىندا تەحنيكالىق تالاپتارعا ساي كەلمەگەن ويىن جابدىقتارىن ساتىپ العان تۇتىنۋشىعا 6،4 ملن تەڭگە قايتارىلدى.
بىرنەشە ادامنىڭ قۇقىقتارى بۇزىلعان ۇجىمدىق شاعىمدارعا دا ەرەكشە نازاردا. پاۆلودار وبلىسىندا تولىق اقپارات بەرىلمەي راسىمدەلگەن كوسمەتيكالىق ونىمدەرگە ارنالعان نەسيەلەر بويىنشا 17 تۇتىنۋشىعا 9،1 ملن تەڭگە قايتارىلدى. تۇركىستان، جامبىل وبلىستارىندا جانە شىمكەنت قالاسىندا تاعى 33 تۇتىنۋشى ساپاسىز ماسساج جابدىقتارى، تۇرمىستىق تەحنيكا جانە ورىندالماعان شيپاجاي جولدامالارى ءۇشىن 7،5 ملن تەڭگە كولەمىندە قاراجاتتارىن قايتارىپ الدى. اتاپ ايتقاندا، شىمكەنت قالاسىندا بەس تۇتىنۋشىعا 1،3 ملن تەڭگە، سارىاعاش اۋدانىندا شيپاجاي جولدامالارى ءۇشىن تولەنگەن 1 ملن تەڭگە قايتارىلدى.
كەيبىر داۋلار سوت ارقىلى شەشىلدى، ويتكەنى قۇقىق بۇزۋشىلىقتار ونداعان تۇتىنۋشىنى قامتىدى. جەتىسۋ وبلىسىندا سمارتفوندى جەتكىزبەگەنى ءۇشىن دەپارتامەنت سوتقا جۇگىنىپ، ناتيجەسىندە 17 تۇتىنۋشىعا 7،2 ملن تەڭگە قايتارۋ تۋرالى شەشىم شىقتى. ونىڭ ىشىندە توعىز تۇتىنۋشى اقشاسىن سوت شەشىمىنە دەيىن قايتارىپ العان. پاۆلودار وبلىسىندا كورسەتىلمەگەن قىزمەتكە قاتىستى داۋ مەدياسيا تارتىبىمەن اياقتالىپ، 12 تۇتىنۋشىعا 900 مىڭ تەڭگە قايتارىلدى.
بۇل ءتورت ايدىڭ قورىتىندىسى اۋماقتىق دەپارتامەنتتەردىڭ تۇتىنۋشىلاردىڭ قۇقىقتارىن قورعاۋداعى ءرولىنىڭ ارتىپ كەلە جاتقانىن كورسەتەدى. قۇنى جوعارى تاۋارلارعا قاتىستى جەكە داۋلاردان باستاپ ۇجىمدىق ماسەلەلەرگە دەيىن — ءاربىر قورعالعان ءىس ەلىمىزدە تۇتىنۋشىلاردىڭ قۇقىقتارىن قورعاۋ جۇيەسىنىڭ ناقتى ءارى ءتيىمدى جۇمىس ىستەپ وتىرعانىن دالەلدەيدى.