قوستاناي وبلىسى امانگەلدى اۋدانىنىڭ اكىمدىگى «امانگەلدى» تۋريستىك كەشەنىنىڭ پانتەونىندا سالتانات نۇكەنوۆانىڭ اتى جازىلعان ەسكەرتكىش تاقتانىڭ ورناتىلۋىنا قاتىستى تۇسىنىك بەردى، - دەپ حابارلايدى Aqshamnews.kz.
"الەۋمەتتىك جەلىلەر مەن بۇقارالىق اقپارات قۇرالدارىندا تاراعان «سالتانات نۇكەنوۆا ەسىمى جازىلعان تاقتا “ۇلتتىق جادى قابىرعاسى” مەموريالىندا ورنالاسقان» دەگەن اقپارات شىندىققا سايكەس كەلمەيدى.
2020 جىلدان باستاپ قوستاناي وبلىسى امانگەلدى اۋىلىندا مەسەناتتىڭ باستاماسىمەن كوپفۋنكسيونالدى تۋريستىك كەشەننىڭ قۇرىلىسى جۇرگىزىلىپ كەلەدى.
بۇگىنگى كۇنى كەشەن اۋماعىندا پيراميدا، «ال-گامبرا» كافەسى، «برازيليا» قوناق ءۇيى، ەيفەل مۇناراسىنىڭ، نيۋ-يوركتەگى «بوستاندىق ءمۇسىنىنىڭ»، مەكسيكاداعى ماييا وركەنيەتىنىڭ چيچەن-يسا پيراميداسىنىڭ كوشىرمەلەرى، بالالارعا ارنالعان سپورت الاڭشالارى جانە وزگە دە نىساندار سالىنعان.
تۋريستىك حاب اۋماعىندا «ۇلتتىق جادى قابىرعاسى» اتتى مەموريالدىق قابىرعا ورنالاسقان. وندا تاريحي تۇلعالاردىڭ ەسىمدەرى جازىلعان 296 ەسكەرتكىش تاقتا ورناتىلعان. اتالعان مەموريالدىق قابىرعا 2024 جىلعى 23 مامىردا مونۋمەنتالدى ونەر نىساندارىن ورناتۋ جونىندەگى رەسپۋبليكالىق كوميسسيامەن كەلىسىلگەن. قازىرگى ۋاقىتتا مەموريالدىق قابىرعا جەرگىلىكتى اتقارۋشى ورگاننىڭ بالانسىنا بەرىلگەن.
سونىمەن قاتار، مەسەناتتىڭ جەكە باستاماسىمەن تۋريستىك كەشەن اۋماعىنداعى («ۇلتتىق جادى قابىرعاسىنا» قاتىسى جوق) جەكە مەنشىك قايىرىمدىلىق قورىنا تيەسىلى جابىق نىسانداردىڭ بىرىندە تاريحي تۇلعالار مەن وقيعالاردىڭ اتاۋلارى جازىلعان بىرنەشە ونداعان تاقتا ورناتىلعان. سول تاقتالاردىڭ قاتارىندا سالتانات نۇكەنوۆا ەسىمى جازىلعان تاقتا دا بار. تاعى دا اتاپ وتەمىز: بۇل تاقتالار مەسەناتتىڭ جەكە باستاماسىمەن قويىلعان"، - دەلىنگەن اقپاراتتا.
ەسكە سالا كەتەيىك، بۇعان دەيىن وتباسىلىق زورلىق-زومبىلىقتان قازا تاپقان سالتانات نۇكەنوۆانىڭ ەسىمى قازاقستاننىڭ ەلەۋلى تۇلعالارىنىڭ پانتەونىنا ەنگىزىلگەنىن حابارلاعان ەدىك.