سالعىرتتىقتىڭ سالدارى

ەسىرتكى زاتتارىنا قاتىستى تالاپتى ورىنداماعان 41 مەديسينا قىزمەتكەرى جاۋاپقا تارتىلدى

ىشكى ىستەر مينيسترلىگىنىڭ وكىلى اقتوتى بورانوۆا جاقىندا وتكەن «دارمەك» جەدەل-پروفيلاكتيكالىق ءىس-شاراسىنىڭ ناتيجەسى تۋرالى باياندادى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

ونىڭ بارىسىندا ءدارىحانالاردا پرەپاراتتاردى ساتۋ جاعدايلارى دا تەكسەرىلدى. «دارمەك» وپەراسياسى رەسپۋبليكا اۋماعىن تۇتاس قامتي وتىرىپ وتكىزىلدى. بۇل تۇرعىدا مەديسينالىق مەكەمەلەر، ءدارىحانالار، قويمالار، ونەركاسىپتىك كاسىپورىندار جانە باسقا دا نىساندار تەكسەرىلدى.

«5 كۇندە پرەپاراتتار زاڭدى تۇردە وتكىزىلەتىن نىسانداردا ەسىرتكى، پسيحوتروپتىق نەمەسە ۋلى زاتتارعا قاتىستى ءتيىستى ەرەجەنى ورىنداماۋدىڭ 28 فاكتىسى جانە 193 اكىمشىلىك قۇقىق بۇزۋ دەرەگى انىقتالدى»، - دەدى ا. بورانوۆا مينيسترلىكتىڭ باسپا ءسوز الاڭىندا وتكەن بريفينگىدە.

ونىڭ ايتۋىنشا، وسى تەكسەرىس بارىسىندا اكىمشىلىك جاۋاپكەرشىلىككە 193 ادام تارتىلدى، ونىڭ ىشىندە 41 مەديسينا قىزمەتكەرى بار.

«ەسىرتكى زاتتارى بار 8،8 مىڭ تابلەتكا مەن 7،4 مىڭ امپۋلا، پسيحوتروپتىق زاتتارى بار 28 مىڭ تابلەتكا جانە 8،2 مىڭ امپۋلا تاركىلەندى. زاڭدى تۇلعالاردىڭ قىزمەتىنە قاتىستى جۇرگىزىلگەن تەكسەرۋلەر ناتيجەسىندە، ليسەنزيالىق نورمالار مەن تەحنيكالىق تالاپتاردىڭ بۇزىلۋىنا بايلانىستى 3،2 مىڭ تونناعا جۋىق پرەكۋرسور مەن 459 توننا ۋلى زاتتىڭ اينالىمى شەكتەلدى»، - دەدى ۆەدومستۆو وكىلى.