مەملەكەت باسشىسى «بايتەرەك» ۇلتتىق باسقارۋشى حولدينگى» اق باسقارما ءتوراعاسى قانات شارلاپايەۆتى قابىلدادى، دەپ حابارلايدى almaty-akshamy.kz akorda.kz سىلتەمە جاساپ.
قاسىم-جومارت توقايەۆقا 2023 جىلدىڭ ءى جارتىجىلدىعىنداعى «بايتەرەك» حولدينگى قىزمەتىنىڭ ناتيجەلەرى، سونىڭ ىشىندە كاسىپكەرلەردى، اگروونەركاسىپ كەشەنىن قولداۋ جانە حالىقتى تۇرعىن ۇيمەن قامتاماسىز ەتۋ جونىندەگى باستامالاردىڭ ىسكە اسىرىلۋ بارىسى تۋرالى باياندالدى.
پرەزيدەنتكە ۇسىنىلعان مالىمەت بويىنشا ءىرى بيزنەستى قارجىلاندىرۋ كولەمى 114،4 ملرد تەڭگە. حولدينگ «دامۋ» قورى ارقىلى شاعىن جانە ورتا بيزنەستى دامىتۋدى بەلسەندى قولدايدى. قور 15 مىڭنان استام كاسىپكەرگە قولداۋ كورسەتتى.
جىل باسىنان بەرى «وتباسى بانكى» 29 مىڭ وتباسىنىڭ باسپانالى بولۋىنا كومەكتەسكەن. بانك باسپانانى جالعا بەرۋدى سۋبسيديالاۋ باعدارلاماسىنا دا بەلسەندى قاتىسىپ كەلەدى. باعدارلاما اياسىندا ءى جانە II توپتاعى مۇگەدەكتىگى بار ادامدارعا، مۇگەدەكتىگى بار بالالاردى، جەتىم بالالاردى تاربيەلەپ وتىرعان وتباسىلارعا جانە كوپبالالى وتباسىلارعا قايتارىمسىز مەملەكەتتىك قولداۋ كورسەتىلدى. ءبىرىنشى جارتىجىلدىقتا اتالعان باعىت بويىنشا 9 مىڭنان استام ءوتىنىم ماقۇلداندى.
سونداي-اق «اگرارلىق نەسيە كورپوراسياسى» اق ارقىلى جىل باسىنان بەرى 271 ملرد تەڭگەدەن استام قارجى ءبولىنىپ، 9 مىڭعا جۋىق فەرمەرگە قولداۋ كورسەتىلگەنى تۋرالى حابارلاندى. بيىل 3،5 ملن گەكتار جەرگە ەگىن ەگىلدى. بۇل – ەلىمىزدەگى بارلىق ەگىس القابىنىڭ 15 پايىزى. ازىق-تۇلىك قاۋىپسىزدىگىن نىعايتۋ جانە يمپورتقا تاۋەلدىلىكتى تومەندەتۋ ءۇشىن اۋىل شارۋاشىلىعىنداعى ينۆەستيسيالىق جوبالاردى نەسيەلەندىرۋگە 131 ملرد تەڭگەدەن استام قاراجات ءبولىندى. اگرارلىق سەكتوردى قارجىلاندىرۋ كولەمىنىڭ 70 پايىزدان استامى «اگرارلىق كرەديتتىك كورپوراسيا» اق مەن «قازاگروقارجى» اق-عا تيەسىلى.
كەزدەسۋ سوڭىندا پرەزيدەنت بيزنەستىڭ احۋالىن جاقسارتۋعا جانە الەۋمەتتىك تۇرعىن ءۇي ساياساتىن جەتىلدىرۋگە باعىتتالعان ناقتى تاپسىرمالار بەردى.