ءماسليحات دەپۋتاتتارىن سايلاۋ الماتىدا جانە قازاقستاننىڭ 10 وڭىرىندە ءوتتى.
الماتىدا قالالىق ءماسليحات دەپۋتاتىنىڭ سايلاۋى № 4 ءبىر مانداتتى اۋماقتىق سايلاۋ وكرۋگى بويىنشا ءوتتى. باسەكەلەستىك جوعارى بولدى. التى ۇمىتكەر حالىق تاڭداۋىنا ۇمىتكەر بولدى. قالادا 42 ۋچاسكە جۇمىس ىستەدى.
- سايلاۋ ۋچاسكەسىنە العاش رەت بالا كەزىمدە، اتا-اناممەن بىرگە كەلدىم. سودان كەيىن داۋىس بەرۋ پروسەسى ماعان ەرەكشە نارسە بولىپ كورىندى. سوندىقتان ءقازىر كامەلەتكە تولعاننان كەيىن مەن دە ءوز داۋىسىمدى بەرۋگە كەلدىم. ۇمىتكەرلەردىڭ باعدارلاماسىن الدىن الا وقىپ، ءوزىم ءۇشىن تاڭداۋ جاسادىم، - دەيدى 1-كۋرس ستۋدەنتى الىشەر.
كەيبىرى داۋىس بەرۋگە بالالارىن ەرتىپ كەلدى.
- مەن سايلاۋعا ۇلىممەن بىرگە كەلدىم. جاسى 12-دە. كامەلەتكە تولعاننان كەيىن داۋىس بەرۋ قۇقىعىنا يە بولادى. قازىردەن-اق سايلاۋعا بارىپ، داۋىس بەرۋدى ارماندايدى. بۇل بولاشاعىنا دەگەن جاۋاپكەرشىلىكتى بىلدىرەدى دەپ ويلايمىن. ەستەلىك ءۇشىن مەنى سۋرەتكە ءتۇسىردى،- دەيدى الماتىلىق ناتاليا گلۋشايەۆا.
ۋچاسكەلەردىڭ بارلىعىندا حالىقتىڭ بارلىق توبى ءۇشىن قاجەتتى جاعداي جاسالدى. مۇمكىندىگى شەكتەۋلى ازاماتتار ءۇشىن قولجەتىمدى ورتا ۇيىمداستىرىلدى. داۋىس بەرۋ ءتارتىبى تۋرالى اقپاراتى بار اۋديوروليكتەر، سونداي-اق كوزى ناشار كورەتىن ازاماتتار ءۇشىن كانديداتتاردىڭ ءومىرباياندىق دەرەكتەرى دايىندالدى، قاجەت بولعان جاعدايدا قۇلاققاپتار، كومپيۋتەر، لۋپا، ارنايى ترافارەتتەر ۇسىنىلدى.
- مەنىڭ كورۋ قابىلەتىم ناشار. ۋچاسكەمە كەلگەندە مەنى قارسى الىپ، كابيناعا دەيىن شىعارىپ سالدى. ۇلكەيتكىش اينەك بەردى، - دەپ ءبولىستى الماتىلىق ليۋبوۆ ميحايلوۆا.
بايقاۋشىلاردىڭ ايتۋىنشا، سايلاۋدا قۇقىق بۇزۋشىلىق بولمادى. الماتىلىقتار بۇل پروسەسكە جاۋاپكەرشىلىكپەن قارادى.
- مۇمكىندىگىنشە سايلاۋدان قالماۋعا تىرىسامىن. بۇل جەكە پىكىرىن ءبىلدىرۋ ارقىلى جارقىن بولاشاققا ءوز ۇلەسىن قوسۋ دەپ بىلەمىن، - دەپ اتاپ ءوتتى كومپوزيتور ءالىم زايروۆ.
ۇلتتىق ازا تۇتۋ كۇنى بولعانىنا قاراماستان، كوپتەگەن قالا تۇرعىنى سايلاۋ ۋچاسكەلەرىنە كەلىپ، ازاماتتىق جاۋاپكەرشىلىگىن تانىتتى.
- مەن ۋچاسكەگە داۋىس بەرۋ اياقتالۋعا قالعاندا كەلدىم. داۋىس بەرىپ ۇلگەرگەنىمە وتە قۋانىشتىمىن. سايلاۋدى ءارقايسىمىز ءۇشىن ماڭىزدى قادام دەپ سانايمىن. ويتكەنى ءبىز داۋىس بەرۋ ارقىلى سانالى تۇردە بولاشاققا قادام جاسايمىز، – دەپ اتاپ ءوتتى سايلاۋشى گالينا كراسنوبورودكو.
قورىتىندىسى بويىنشا ەلىمىزدە ەكى وبلىستىق دەپۋتات، جەتى قالالىق دەپۋتات جانە 12 اۋداندىق ءماسليحات دەپۋتاتى سايلانادى.