الماتىدا جانە ەلىمىزدىڭ تاعى 10 وڭىرىندە ءماسليحات دەپۋتاتتارىن سايلاۋ ناۋقانى ءوتتى.
الماتىلىقتار شىعىپ قالعان دەپۋتاتتىڭ ورنىنا ۇمىتكەر بولعان ازاماتتارعا داۋىس بەردى.
№4 ءبىرمانداتتى اۋماقتىق سايلاۋ وكرۋگىندە سايلاۋ بەلسەندى تۇردە ءوتتى. حالىق بوساعان جاڭا ورىننان ۇمىتكەر بولعان التى كانديدات اراسىندا تاڭداۋ جاسادى. قالادا 42 سايلاۋ ۋچاسكەسى جۇمىس ىستەدى.
— مەن سايلاۋعا ەڭ العاش بالا كۇنىمدە، اتا-اناممەن كەلگەنىم ەسىمدە. ول كەزدە باسقاشا اسەر ەتكەن. ال بۇل جولى كامەلەت جاسقا كەلىپ، ەسەيگەن، كوزقاراسىم تولىسقان شاعىمدا، ءوز بەتىمشە تاڭداۋ جاسادىم، — دەيدى الماتىلىق ستۋدەنت الىشەر.
بۇگىنگى سايلاۋ وزگەشە. ول ق ر تاريحىندا العاش رەت قازا تاپقان كەنشىلەردى ەسكە الۋ ءۇشىن ءبىر مينۋت ۇنسىزدىكپەن باستالدى. تۋلار تۇسىرىلگەن، ەشقانداي مۋزىكا وينالعان جوق. دەگەنمەن، كوپتەگەن ۋچاسكەلەردە العاش رەت داۋىس بەرىپ وتىرعان سايلاۋشىلارعا «قازاقستان» كامپيتى ۇسىنىلدى.
بارلىق ۋچاسكەدە داۋىس بەرۋگە قولايلى جاعدايلار جاسالدى. اسىرەسە، مۇمكىندىگى شەكتەۋلى ادامدار ءۇشىن ارنايى قۇرىلعىلار ورناتىلعان جەكە كابينالار ۇيىمداستىرىلدى.
بۇگىن جالپىۇلتتىق ازا تۇتۋ كۇنى بولسا دا، تۇرعىندار سايلاۋعا بەلسەندى قاتىستى.
ايتا كەتەيىك، بۇل سايلاۋدا وبلىستىق 2، قالالىق 7 جانە اۋداندىق 12 ءماسليحات دەپۋتاتتارى سايلاناتىن بولادى.