بۇگىن تايلاند استاناسى بانگكوكتا ساداق اتۋدان ازيا چەمپيوناتى ءوز مارەسىنە جەتتى.
سارى قۇرلىق بىرىنشىلىگىندەگى وليمپيادالىق ساداق اتۋدان قازاقستان ەرلەر قۇراماسى كۇمىس جۇلدەگەر اتانىپ، پاريج وليمپياداسىنىڭ ليسەنزياسىنا قول جەتكىزدى، دەپ حابارلايدى اlmaty-akshamy.kz. بانگكوكتاعى باسەكەدە ۇلتتىق قۇراما ساپىندا يلفات ابدۋللين، داۋلەتكەلدى جاڭبىرباي مەن الەكساندر ەرەمەنكو سىنعا ءتۇستى. جارىستىڭ باس جۇلدەسىن وڭتۇستىك كورەيا سپورتشىلارى يەلەنسە، قولا مەدال يندونەزيالىقتارعا بۇيىردى. ۇلتتىق قۇراما فينالعا جەتەر جولدا جاپونيا، ءۇندىستان جانە قىتايدىڭ تايبەي قۇراماسىنان باسىم ءتۇستى.
«جاقىندا عانا ساداق اتۋ فەدەراسياسىنىڭ وكىلدەرىمەن كەزدەسكەن ەدىم. ازيا ويىندارىندا ءساتسىز ونەر كورسەتكەنىنە قاراماستان، ۇلتتىق قۇراما سپورتشىلارى جولداما جولىنداعى جارىستىڭ ءبىرىنشى مۇمكىندىگىندە وليمپيادا ليسەنزياسىن جەڭىپ الدى. حانچجوۋداعى وسى جىلدىڭ باستى دوداسىنان كەيىن كوماندا وكىلدەرى قىسقا مەرزىمدە قاتەلىكتەرمەن جۇمىس ىستەپ، پاريجگە جولداما جەڭىپ الىپ وتىر. ەندى سپورتشىلار وليمپيادا ويىندارىنا دايىندىقتى كۇشەيتۋ كەرەك»، - دەدى تۋريزم جانە سپورت ءمينيسترى ەرمەك مارجىقپايەۆ.
قازاقستان بىلتىر وليمپيا ويىندارىنا ىرىكتەۋ جۇيەسى جاڭارتىلعان سوڭ، جولداماعا يەلىك ەتكەن العاشقى ەل اتاندى. سەبەبى، قۇرلىق چەمپيونى اتانعان وڭتۇستىك كورەيا سپورتشىلارى بۇعان دەيىن حانچجوۋداعى ازيا ويىندارىندا وليمپيادا جولداماسىن جەڭىپ العان ەدى. ايتا كەتەيىك، قازاقستاندىق مەرگەندەر 1996 جىلدان بەرى ءتورت جىلدىقتىڭ باستى باسەكەسىنەن سىرت قالعان ەمەس. ال 2021 جىلعى توكيو وليمپياداسىندا ەرلەر قۇراماسى تولىق قۇرامدا ب ا ق سىنادى. سونداي-اق ازيا بىرىنشىلىگىنىڭ قۇرالمالى ساداقپەن (Compound bow) نىسانا كوزدەۋ سايىسىندا ۇلتتىق قۇراما سپورتشىسى اندرەي تيۋتيۋن التىننان القا تاقتى. ودان كەيىنگى تۇعىر ساتىسىنا دجۋن حو كيم (وڭتۇستىك كورەيا) مەن ابحيشەك ۆەرمادان (ءۇندىستان) كوتەرىلدى. وسى باعدارلامادا قازاقستان ەرلەر قۇراماسى وڭتۇستىك كورەيادان كەيىنگى ناتيجەنى كورسەتىپ، كۇمىس جۇلدەگە يە بولسا، ۇزدىك ۇشتىكتى ءۇندىستان تۇيىندەدى. وكىنىشكە قاراي، ساداق اتۋدىڭ بلوك ساداق باعدارلاماسى وليمپيادا باعدارلاماسىنا ەنبەگەن. وسىلايشا، تايلاندتا وتكەن بيىلعى سارى قۇرلىق چەمپيوناتىن ۇلتتىق قۇراما سپورتشىلارى 3 جۇلدەمەن قورىتىندىلادى.