سىزدەر تابىسقا جەتۋ جولىندا تالماي كۇرەستىڭىزدەر - ءاليحان سمايىلوۆ

ق ر پرەمەر-مينيسترى ءاليحان سمايىلوۆ 22-28 قازان ارالىعىندا قىتايدىڭ حانچجوۋ قالاسىندا وتكەن IV ازيا پارا ويىندارىنىڭ جەڭىمپازدارىمەن جانە جۇلدەگەرلەرىمەن كەزدەستى.

جارىستا قازاقستان اتىنان پارا پاۋەرليفتينگ، بوچچا، پارا جەڭىل اتلەتيكا، پارا ۆەلوسپورت، اكادەميالىق ەسكەك ەسۋ، پارا دزيۋدو، وتىرىپ وينايتىن ۆولەيبول، پارا ۇستەل تەننيسى، شاحمات، پارا وق اتۋ، پارا ساداق اتۋ، پارا تاەكۆوندو، پارا ءجۇزۋ جانە پارا كانوە سياقتى 14 سپورت تۇرىنەن 131 سپورتشى قاتىستى. ناتيجەسىندە ەل قۇراماسى 41 مەدال جەڭىپ الدى، ونىڭ ىشىندە 8 التىن، 12 كۇمىس جانە 21 قولا مەدال يەلەندى. مەدال سانى بويىنشا قازاقستان 44 قاتىسۋشى ەل اراسىندا 11ء-شى ورىنعا كوتەرىلدى.

كەزدەسۋ بارىسىندا ءاليحان سمايىلوۆ مەملەكەت باسشىسى قاسىم-جومارت توقايەۆتىڭ العىس حاتىن وقىپ، قازاقستاندىق پاراليمپيادا ويىنشىلارىن وتكەن پارا ويىندارىنداعى جارقىن جەڭىستەرىمەن قۇتتىقتادى.

«سىزدەردىڭ بويلارىڭىزداعى جانقيارلىق رۋح پەن جەڭىسكە دەگەن قۇشتارلىق ميلليونداعان ادامداردى ومىردەگى قيىندىقتاردى ەڭسەرۋگە جانە تابىسقا جەتەلەيدى. سىزدەردىڭ كەرەمەت سپورتتىق ونەرلەرىڭىز ادامنىڭ ەرىك-جىگەرىنىڭ شەكسىز ەكەنىن پاش ەتتى. سىزدەردىڭ ءارقايسىلارىڭىزدىڭ ءومىر جولدارىڭىز – وسكەلەڭ ۇرپاق ءۇشىن شەبەرلىكتىڭ، باتىلدىقتىڭ، سونداي-اق تاباندىلىقتىڭ ۇلگىسى. ونسىز، ارينە جوعارى سپورتتىق ناتيجەلەرگە قول جەتكىزۋ مۇمكىن ەمەس»، — دەدى پرەمەر-مينيستر.

ءاليحان سمايىلوۆتىڭ ايتۋىنشا، جەتىستىككە جەتۋ جولىندا پاراليمپياداشىلارعا قولداۋ كورسەتكەن تالىمگەرلەر مەن جاتتىقتىرۋشىلار دا ەرەكشە قۇرمەتكە لايىق.

«سىزدەر تابىسقا جەتۋ جولىندا تالماي كۇرەستىڭىزدەر. ازيا پارا ويىندارىنداعى بۇگىنگى جەڭىستەر — بولاشاق پاراليمپيادا جەتىستىكتەرى ءۇشىن ماڭىزدى قادام»، — دەدى ول.

ۇكىمەت باسشىسىمەن كەزدەسۋگە قۇرلىقتىق جارىستاردىڭ جەڭىمپازدارى داۆيد دەگتياريەۆ (پارا پاۋەرليفتينگ)، نۇرداۋلەت جۇماعالي جانە دياس كەنجەبەك (پارا ءجۇزۋ)، اقمارال ناۋاتبەك، ەرعالي شامەي جانە ولجاس ورازالى ۇلى (پارا دزيۋدو)، داستان مۇقاشبەكوۆ (جەڭىل اتلەتيكا) قاتىستى.

ازيا رەكوردشىسى نۇرداۋلەت جۇماعالي مۇنداي ءىرى جارىس الاڭىندا ونەر كورسەتۋ ءارقاشان ۇلكەن جاۋاپكەرشىلىك جۇكتەيتىنىن اتاپ ءوتتى.

«جاتتىعۋ بارىسىندا ءبىز بارلىق تاپسىرمالاردى بۇلجىتپاي ورىندادىق. جارىس الدىندا دايىندىعىمىز جوعارى دەڭگەيدە ءوتتى. ازيا پارا ويىندارىندا بۇكىل قازاق ەلىنىڭ قولداۋىن ەرەكشە سەزىندىم. بارلىق سپورتشىلاردىڭ اتىنان، قازاقستان حالقىنا زور العىسىمدى بىلدىرەمىن. الداعى پاراليمپيادا ويىندارىندا ەلىمىزدىڭ ءانۇرانىن شىرقىراتۋعا بار كۇشىمىزدى سالامىز»، — دەدى ول.

پارا دزيۋدوشى اقمارال ناۋاتبەك ازيا پارا ويىندارى قازاقستاندىق سپورتشىلار ءۇشىن پاراليمپيادا الدىنداعى ۇلكەن سىناق بولعانىن اتاپ ءوتتى.

«ءبىزدىڭ جەتىستىگىمىز – بارلىق جاتتىقتىرۋشىلار مەن مەديسينا قىزمەتكەرلەرىنىڭ بىرلەسكەن ەڭبەگىنىڭ ناتيجەسى. بارلىق سپورتشىلاردىڭ اتىنان الداعى پاراليمپيادا ويىندارىنا تىڭعىلىقتى دايىندالىپ، ەلىمىزدى جاقسى جەتىستىكتەرمەن قۋانتامىز دەپ تولىق سەنىممەن ايتامىن»، — دەدى ول.

كەزدەسۋ بارىسىندا ءاليحان سمايىلوۆ ازيا پارا ويىندارىنىڭ جەڭىمپازدارى مەن جۇلدەگەرلەرىنە، سونداي-اق ولاردى دايىنداعان جاتتىقتىرۋشىلارعا مەملەكەت باسشىسىنىڭ اتىنان العىس حاتتار مەن ەستەلىك سىيلىقتارىن تابىس ەتتى. قازاقستاننىڭ پاراليمپيادالىق دزيۋدو فەدەراسياسى دا پرەزيدەنتتىڭ العىس حاتىمەن ماراپاتتالدى.