ەلىمىزدىڭ ءبىرىنشى راكەتكاسى، ۋيمبلدون-2022 چەمپيونى ەلەنا رىباكينا "جىل ويىنشىسى" اتالىمى بويىنشا ۇمىتكەرلەر قاتارىنا كىردى. بۇل تۋرالى Almaty-akshamy.kz Inbusiness.kz-كە سىلتەمە جاساپ حابارلايدى.
جوعارى ماراپاتقا الەمنىڭ ءبىرىنشى راكەتكاسى، "رولان گارروس"، US Open جانە تاعى التى جارىستىڭ جەڭىمپازى، پولشا وكىلى يگا شۆەنتەك، دۇنيەجۇزىلىك رەيتينگىدە ەكىنشى تۇرعان US Open جانە ۋيمبلدون ءفيناليسى، مادريد پەن بەرلين چەمپيونى، تۋنيستىك ونس جابەر تالاسپاق. بۇدان بولەك، امەريكالىقتار، الەمنىڭ جەتىنشى راكەتكاسى، رولان گارروس ءفيناليسى كوري گاۋفف، رەيتينگىدە ۇزدىك ۇشتىكتەگى گۆادالاحارا چەمپيونى دجەسسيكا پەگۋلا، سونىمەن قاتار بيىل WTA قورىتىندى تۋرنيرىندە توپ جارعان فرانسيالىق كارولين گارسيا تىزىمگە ىلىككەن.
بيىل تاماشا ناتيجەگە قول جەتكىزگەن قازاقستاننىڭ ءبىرىنشى راكەتكاسى ەلەنا رىباكينا وتانداستارىنىڭ قولداۋىن ۇنەمى سەزىنەتىنىن ايتىپ، قتف باسپا ءسوز قىزمەتىنە سۇحبات بەردى.
- 2022 جىل اياقتالىپ كەلەدى. بۇل جىل ءوزىڭ ءۇشىن تابىستى بولدى عوي، ەلەنا، سولاي ما؟
- ءيا، تۇتاستاي العانداي، ءساتتى بولدى. اسىرەسە، ۋيمبلدونداعى جەڭىسىم تالايلار ارماندايتىن تيتۋل ەكەندىگى انىق. كوماندالىق جارىستى الساق، ءبىزدىڭ ۇلتتىق قۇراما العاش رەت الەم چەمپيوناتى – بيللي دجين كينگ كۋبوگىنىڭ فينالدىق كەزەڭىندە ونەر كورسەتتى. بۇل – ءبىز ءۇشىن ۇلكەن تاجىريبە، كەلەسىدە بۇدان دا جاقسى وينايمىز دەپ ۇمىتتەنەمىن.
- بيىل ۋيمبلدوندا جەڭىسكە جەتتىڭ. "ۇلكەن دۋلىعا" تۋرنيرىندەگى جەڭىستەن كەيىن ومىرىڭدە نە وزگەرىس بولدى؟
- ەلدىڭ نازارىنا ىلىگىپ، مىندەت پەن جاۋاپكەرشىلىك جۇگى اۋىرلاي ءتۇستى. ارينە، بۇل جەڭىستىڭ تىڭ سەرپىلىس بەرگەنى انىق. دەگەنمەن تۇبەگەيلى وزگەرىس بولدى دەپ ايتا المايمىن.
- ەلەنا، وتكەن جىلى توكيو وليمپياداسىندا ءساتتى ويناپ، جارتىلاي فينالعا دەيىن جەتتىڭ. سەن ءۇشىن "ۇلكەن دۋلىعا" جارىسىنداعى جەڭىس پە الدە وليمپيادا ويىندارىنىڭ "التىنى" ماڭىزدى ما؟
- بۇل كۇردەلى سۇراق ەكەن. ءسوز جوق، وليمپيادادا دا، "ۇلكەن دۋلىعا" دوداسىندا دا جەڭىسكە جەتكىم كەلەدى. وليمپيادا ويىندارىنان كەيىن بارلىق قازاقستاندىق جانكۇيەرلەردىڭ وراسان زور قولداۋىن سەزىندىم. ۋيمبلدوننان كەيىن دە سولاي بولدى. الەۋمەتتىك جەلى مەن مەسسەندجەرلەردە كوپتەگەن تىلەكتەر جازىلدى. بۇل ماعان كۇش بەرەدى، قاي تۋرنير بولماسىن، جەڭىسكە جەتكىم كەلەدى (كۇلدى).
- ۇلىبريتانيا اشىق چەمپيوناتىنان كەيىن مول تابىس تاپتىڭ. وسىعان بايلانىستى قارىز سۇراپ نەمەسە كومەك كورسەتۋدى وتىنگەن ادامدار كوبەيدى مە؟
- ءيا، جاردەم سۇرايتىندار بار، مۇمكىندىگىمە قاراي قول ۇشىن بەرۋگە تىرىسامىن.
- قازاقستاننىڭ نامىسىن ابىرويمەن قورعاپ كەلەسىڭ. جانكۇيەرلەرىڭ ءۇشىن قازاق تىلىندە ءۇش ءسوز ايتشى؟
- سالەم، راحمەت جانە العا!
- ايەلدەر اراسىنداعى جارىستاردا الەمنىڭ ماڭدايالدى تەننيسشىلەرىمەن سىنعا ءتۇستىڭ. ءبىرازىن جەڭدىڭ. ەگەر جىگىتتەرمەن ويناۋعا مۇمكىندىك بولسا، كىمدى تاڭدار ەدىڭ؟
- ماعان رودجەر فەدەرەردىڭ ويىنى ۇنايدى. ونىمەن كورتقا شىققىم كەلەدى. وكىنىشكە قاراي، ول كاسىبي مانسابىن اياقتادى. مۇمكىن، الداعى ۋاقىتتا كەزدەسىپ، شەبەرلىك بايقاسىپ قالارمىن.
- ۋيمبلدوندا ەرلەر اراسىندا نوۆاك دجوكوۆيچ جەڭىسكە جەتتى. ول – "ۇلكەن دۋلىعا" تۋرنيرلەرىن 21 رەت ۇتقان ويىنشى. وسىنداي اتاقتى تەننيسشىمەن قاتار العاشقى تيتۋلعا يە بولۋ سەن ءۇشىن قانشالىقتى ماڭىزدى؟
- ءيا، الەمدەگى ەڭ بايىرعى دا بەدەلدى جارىستا نوۆاكپەن بىرگە جەڭىس تۇعىرىندا تۇرۋ – مەن ءۇشىن ۇلكەن قۇرمەت. ماراپات تاپسىرىلعان سالتاناتتى راسىمدە ونىمەن قاتار تۇرىپ، ازداپ اڭگىمەلەسۋدىڭ ءساتى ءتۇستى. تولقىدىم ءارى ەرەكشە قۋانىش قۇشاعىندا بولدىم.
- كاسىبي ويىنشى بولعاندىقتان، ۇنەمى جول ۇستىندە جۇرەسىڭ، سوندىقتان قازاقستانعا كەلۋىڭ دە سيرەك. بوس ۋاقىت بولىپ، ەلگە كەلگەندە، قاي قالادا بولاسىڭ، قاي جەرلەر كوبىرەك ۇنايدى؟
- استانادا جيىرەك بولامىن. الماتىعا دا جول ءتۇسىپ ءجۇر. استانالىقتار وكپەلەمەس، ازىرگە الماتى ۇنايدى (كۇلدى).
- سۇحبات سوڭىندا ءوز جانكۇيەرلەرىڭە نە ايتار ەدىڭ؟
- جەڭىس كەزىندە عانا ەمەس، ۇتىلىپ قالعان ساتتە دە مەنى قولدايتىنداردىڭ بارىنە رياسىز العىس ايتقىم كەلەدى. مەن ءارقاشان سىزدەردىڭ قولداۋلارىڭىزدى سەزىنەمىن. بۇدان بىلاي دا سولاي بولادى دەپ ۇمىتتەنەمىن. كەلەسى جىلى كەزدەسكەنشە! العا، قازاقستان!