رەسپۋبليكا كۇنىنە وراي قانداي ونەركاسىپتىك جانە الەۋمەتتىك نىساندار اشىلماق؟

تۇركىستان وبلىسىندا مەرەكەگە وراي ءبىرقاتار ءبىلىم بەرۋ نىسانى – قازىعۇرت اۋىلىندا 150 وقۋشىعا ارنالعان جەكەمەنشىك مەكتەپ، سارىاعاش قالاسىندا 900 وقۋشىعا ارنالعان مەكتەپ، اقسۋكەنت اۋىلىندا 1 200 بالاعا ارنالعان جەكەمەنشىك مەكتەپ، قارابۇلاق اۋىلىندا 400 بالاعا ارنالعان جالپى ءبىلىم بەرەتىن مەكتەپ، تۇركىستاندا 500 ورىندىق دارىندى بالالارعا ارنالعان مەكتەپ جانە 200 بالاعا ارنالعان مەكتەپ-بالاباقشا اشىلادى. سونىمەن قاتار، وڭىردە ءىرى ماقتا وڭدەۋ زاۋىتى ىسكە قوسىلادى. تاۋلىگىنە 100 مىڭ كىرپىش شىعاراتىن جاڭا زاۋىت قولدانىسقا بەرىلدى. يتاليا، جاپونيا، فرانسيا جانە رەسەي وندىرەتىن زاماناۋي جابدىقتارمەن جاساقتالعان كاسىپورىن ەلدىڭ باسقا ايماقتارىن دا ساپالى كىرپىشپەن قامتاماسىز ەتە الادى.

سولتۇستىك قازاقستان وبلىسىندا جىلىنا 5 000 توننا قاعاز ونىمدەرىن شىعاراتىن كاسىپورىن، 1،5 مىڭ توننا قۇس ەتىن وندىرەتىن فابريكا، 3،5 توننا ءسۇت وندىرەتىن ءتاۋارلى-سۇت فەرماسى ىسكە قوسىلدى.

جامبىل وبلىسىندا جىلىنا 500 مىڭ توننا امموفوس وندىرەتىن «قازفوسفات» ج ش س جاڭا مينەرال تىڭايتقىشتار سەحى اشىلدى. وسى جوبانى ىسكە اسىرۋ ارقاسىندا الداعى جىلى قازاقستاندىق اگرارييلەردىڭ امموفوسقا دەگەن سۇرانىسىن تولىق قاناعاتتاندىرۋ جوسپارلانىپ وتىر.

پاۆلودار وبلىسىندا مەرەكەگە وراي ەكىباستۇزدا ورنالاسقان 108 پاتەردەن تۇراتىن توعىز قاباتتى تۇرعىن ءۇي پايدالانۋعا بەرىلدى، 260 بالاعا ارنالعان بوبەكجاي-باقشا اشىلدى.

قاراعاندىدا 600 ورىندىق ءاۋتيزمى بار بالالاردى قولداۋ ورتالىعىن ىسكە قوسۋ جوسپارلانىپ وتىر، وندا ءار بالاعا جەكە تۇزەتۋ باعدارلاماسى ازىرلەنەتىن بولادى.

تەمىرتاۋدا زاماناۋي جابدىقتارمەن جابدىقتالعان جاڭا ەمحانا مەن مادەني-ساۋىقتىرۋ كەشەنى اشىلدى. سونىمەن قاتار، قالادا كوپ پاتەرلى تۇرعىن ءۇي سالىندى، كەزەكتە تۇرعان 90 ازامات كىلتتەرىن الدى.

قاراعاندى وبلىسىنىڭ دوسكەي اۋىلىندا مادەنيەت جانە ونەر ۇيىمدارىنىڭ اتىنان كەزەكتە تۇرعاندار ءۇشىن كوپ پاتەرلى تۇرعىن ءۇي جوندەلدى.

اقمولا وبلىسىنىڭ قوياندى اۋىلىندا ءبىر اۋىسىمدا 200 ادام قابىلدايتىن جاڭا وتباسىلىق دەنساۋلىق ورتالىعى اشىلدى، ول حالىققا ساپالى مەديسينالىق قىزمەت كورسەتۋگە باعىتتالعان. سونىمەن قاتار، بالكاشينو اۋىلىندا «اۋىل – ەل بەسىگى» جوباسى اياسىندا «ۋروجاي» ستاديونى پايدالانۋعا بەرىلدى، ول كاسىبي ماماندار ءۇشىن دە، بوس ۋاقىتتى ءتيىمدى وتكىزگىسى كەلەتىن قاراپايىم تۇرعىندار ءۇشىن دە پايدالى ورتالىق بولماق.

ماڭعىستاۋ وبلىسىندا شىنى-پلاستيك بۇيىمدار، جەلىم جانە قىمتاق وندىرەتىن زاۋىت ىسكە قوسىلادى، ونىڭ ونىمدەرى 100% ەلىمىزدە وندىرىلمەك.

قىزىلوردا وبلىسىندا ءبىر ۋاقىتتا 80 بالالار سپورت-ويىن الاڭى، وقۋشىلار سارايى، ونەر مەكتەبى، بالاباقشا جانە دارىگەرلىك امبۋلاتوريا اشىلدى.

قوستاناي وبلىسىندا وتباسىن قولداۋ ورتالىعى جۇمىسىن باستادى، وندا قيىن جاعدايعا تاپ بولعان ادامدارعا پسيحولوگيالىق جانە قۇقىقتىق تۇرعىدان كومەك كورسەتىلەدى. سونىمەن قاتار، تابيعي ورتتەن زارداپ شەككەندەرگە ارنالعان 91 تۇرعىن ءۇيدىڭ قۇرىلىسى اياقتالدى.

اباي وبلىسىنىڭ ستەپنوي كەنتىندە بارلىق زاماناۋي تالاپتارعا ساي كەلەتىن 300 وقۋشىعا ارنالعان جاڭا وقۋ ورنى اشىلدى.

سونىمەن قاتار، وڭىرلەردە ءبىرقاتار اكىمشىلىك، ءوندىرىس، تۇرعىن ءۇي، مەديسينا، اۋىل شارۋاشىلىعى، سپورت جانە مادەني ويىن-ساۋىق نىساندارى پايدالانۋعا بەرىلەدى دەگەن جوسپار بار.

رەسپۋبليكا كۇنى ناعىز حالىقتىڭ مەرەكەسىنە اينالادى. 25 قازاندا ەلىمىزدىڭ ءىرى تەلەارنالارىندا مەرەكەلىك باعدارلامالار، فيلمدەر مەن كونسەرتتەر كورسەتىلەدى. وڭىرلەردە ءتۇرلى فەستيۆالدەر، كورمەلەر، عىلىمي-تاجىريبەلىك كونفەرەنسيالار، سونداي-اق ەكولوگيالىق جانە قايىرىمدىلىق اكسيالارى وتەدى. «جاس ورەن»، URKER جانە ت.ب. رەسپۋبليكالىق بايقاۋلاردىڭ قورىتىندىسى شىعارىلادى. استانادا، الماتىدا جانە رەسپۋبليكانىڭ باسقا قالالارىندا مەرەكەلىك كونسەرتتەر وتەدى.