تۇماۋ جۇقتىرعاندار سانى قاراشادا نەمەسە جەلتوقساندا ارتادى
اقش-تىڭ بالالار اۋرۋحاناسىندا اۋامەن جۇعاتىن اۋرۋعا شالدىققان كىشكەنتاي ناۋقاستار سانى كۇرت وسكەن، دەپ حابارلايدى Almaty-akshamy.kz Inform.kz-كە سىلتەمە جاساپ.
ABC news تەلەارناسى اقش-تاعى اۋرۋحانالاردا پەدياتور بولىمدەرى سوڭعى ەكى جىلدا ەڭ جوعارى دەڭگەيدە تولىپ قالعان. اقش دەنساۋلىق ساقتاۋ جانە حالىققا قىزمەت كورسەتۋ دەپارتامەنتىنىڭ مالىمەتى بويىنشا، بۇكىل ەلدە اۋرۋحانالار رەسپيراتورلىق اۋرۋلارى بار كىشكەنتاي ناۋقاستارعا تولى، ولار قازىرگى ۋاقىتتا شامامەن 40 مىڭ اۋرۋحانا توسەگىنىڭ 71%-ىن قۇرايدى.
رود-ايلەند شتاتىنداعى حاسبرو اۋرۋحاناسىنىڭ بالالار جۇقپالى اۋرۋلارى ءبولىمىنىڭ مەڭگەرۋشىسى، دوكتور مايكل كوستەر قىركۇيەكتىڭ ورتاسىنان قازان ايىنىڭ ورتاسىنا دەيىن جرۆي اسقىنىپ، اۋرۋحاناعا تۇسكەن جاس پاسيەنتتەردىڭ سانى ەكى ەسە وسكەنىن ايتتى.
«ءبىز 100 ميلدەن استام قاشىقتىقتا ورنالاسقان اۋدانداردان كەلگەن پاسيەنتتەردى قابىلدايمىز، ويتكەنى ولاردىڭ جەرگىلىكتى بالالار اۋرۋحاناسى تولىپ نەمەسە جابىلىپ قالعان»، - دەدى م.كوستەر ABC News-كە.
جەرگىلىكتى ساراپشىلاردىڭ پايىمداۋىنشا، تۇماۋدىڭ اسقىنۋى ءىشىنارا COVID-19 شەكتەۋلەرىن جەڭىلدەتكەننەن تۋىنداۋى مۇمكىن.
«بىزدە كوروناۆيرۋس پاندەمياسىمەن كۇرەسۋدەگى بارلىق كۇش-جىگەردىڭ ناتيجەسىندە تىنىش ۋاقىت بولعان. ياعني، بۇرىن جىل سايىن وتكەرىپ جۇرگەن كەيبىر ۆيرۋستار «ورالىپ»، ءقازىر ودان سايىن كۇشەيگەنىن كورىپ وتىرمىز»، - دەدى بوستون بالالار اۋرۋحاناسىنىڭ مەديسينالىق قىزمەتكەرى دجون براۋنشتەين.
CDC مالىمەتتەرى بويىنشا، وتكەن اپتادا عانا 1674 ناۋقاس تۇماۋدىڭ اسقىنۋىمەن اۋرۋحاناعا جاتقىزىلدى.
«ادەتتە تۇماۋ جۇقتىرعاندار سانى قاراشادا نەمەسە جەلتوقساندا ارتىپ، اقپاندا ەڭ جوعارى دەڭگەيگە جەتەدى. ءبىراق، بيىل قازاندا تۇماۋ ءورشىپ كەتتى»، - دەدى مامان.