باس باپكەر ۋرازباحتين 18 جاستاعى قاقپاشى شەرحان قالمۇرزا تۋرالى پىكىر ءبىلدىردى، - دەپ حابارلايدى Aqshamnews.kz ءتىلشىسى.
كوماندا ساپىندا قاقپاشىلار ءارقاشان ەرەكشە ءرول اتقارادى. بۇل جولى نەگىزگى جاۋاپكەرشىلىك جاس قاقپاشى شەرحانعا جۇكتەلدى. باسشىلىق پەن باپكەرلەر شتابى وعان ۇلكەن سەنىم ارتىپ وتىر.
قاقپاشىلاردىڭ دايىندىعى ادەتتە وزگەشە جۇرەدى. بۇل باعىتتا تاجىريبەلى مامان يليا سەرگەيەۆيچ جۇمىس ىستەپ جاتىر.
"قاقپاشىلار – بولەك الەم. سوندىقتان ول باعىتقا مەن ارالاسپايمىن، يليا ءوزى اينالىسادى"، – دەيدى باس باپكەر رافاەل ۋرازباحتين.
جاس قاقپاشى ءوزىن سىرت الاڭداعى كەزدەسۋلەردە جاقسى قىرىنان كورسەتە الدى. ەڭ باستىسى، ول الاڭدا قوبالجىپ، ساسقالاقتاعانىن بىلدىرتپەدى. بۇل ونىڭ مىنەزى مەن كاسىبي دايىندىق دەڭگەيىن كورسەتەدى.
باس باپكەردىڭ ايتۋىنشا، شەرحانعا ارتىلعان سەنىم ونىڭ كاسىبي دامۋى ءۇشىن ۇلكەن مۇمكىندىك بولماق. كوماندا جاس قاقپاشىعا سەنىپ وتىر، ال ول جانكۇيەرلەر مەن ۇجىم ءۇمىتىن اقتاۋعا تىرىسادى.
"شەرحانمەن تىكەلەي جۇمىس ىستەگەن ەمەسپىن، ءبىراق وعان ۇلكەن جاۋاپكەرشىلىك ءتۇستى. ءبىز بارىنشا قولداۋعا تىرىسىپ جاتىرمىز"، – دەيدى فۋتبولشى ەگور سوروكين.
ايتا كەتەيىك، ەرتەڭ الماتىداعى ورتالىق ستاديوندا ۋەفا چەمپيوندار ليگاسىنىڭ اياسىندا "قايرات" – "رەال مادريد" وينايدى.