«رامىزدەر حالقىمىز ءۇشىن اسا قىمبات» - الماتىلىق پروفەسسور ق ر مەملەكەتتىك رامىزدەرى كۇنىنىڭ تاريحي ماڭىزىن ايتتى.
جىل سايىن 4 ماۋسىمدا ەلىمىزدە مەملەكەتتىك رامىزدەر كۇنى اتاپ وتىلەدى. الماتى قالاسى وڭىرلىك كوممۋنيكاسيالار قىزمەتىنىڭ الاڭىندا تاريح عىلىمدارىنىڭ كانديداتى، ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ جەتەكشى عىلىمي قىزمەتكەرى، قبتۋ پروفەسسورى ارمان ءجۇمادىل مەملەكەتتىك رامىزدەردىڭ قالىپتاسۋى مەن تاريحي ماڭىزى تۋرالى اڭگىمەلەدى، دەپ حابارلايدى Almaty-akshamy.kz.
سونىمەن بىرگە ول ءانۇران، مەملەكەتتىك تۋ مەن ەلتاڭبانى قاشان جانە قالاي قولدانۋ كەرەكتىگى مەملەكەتتىك رامىزدەر تۋرالى كونستيتۋسيالىق زاڭمەن بەلگىلەنگەندىگىن ەسكە سالدى.
«ءار ەلدىڭ مەملەكەتتىك رامىزدەرىندە حالىقتىڭ ارمانى، مۇراسى، ماقتانىشى مەن قۇندىلىقتارى بەينەلەنۋى كەرەك. قازاقستان رەسپۋبليكاسىنىڭ رامىزدەرىنىڭ تامىرى تەرەڭدە. ەلتاڭبامىزعا، تۋىمىزعا قاراساڭىز، بارلىق رامىزدەر تاريح قويناۋىنان بىزگە جەتكەن تاريحي جادىگەرلەر مەن الەمدىك ءبىلىمنىڭ قۇندىلىقتارى نەگىزىندە جاسالعان. سوندىقتان دا ولار حالقىمىزعا قىمبات»، – دەيدى ا. ءجۇمادىل.
پروفەسسور اتاپ وتكەندەي، تاريحي-ەتنيكالىق ۇدەرىستەردىڭ ساباقتاستىعىنىڭ بەلگىلەرى ەلىمىزدىڭ باستى رامىزدەرىنىڭ ءبىرى – تۋدا ايقىن كورىنەدى.
«مەملەكەتتىك تۋ – ۇلتتىق رامىزدەردىڭ ءبىرى. ال تۋدى ۇستاعان ءبىرىنشى ادامنىڭ بەينەسى ءبىرقاتار پەتروگليفتەردە بەينەلەنگەن. بۇل - تۋ ۇستاپ، اتقا قونعان ادامنىڭ بەينەسى. تۋلاردىڭ تۇرلەرى ءارتۇرلى بولعانىمەن، ماعىناسى مەن قىزمەتى بىردەي. بۇل – بابالار رۋحى مەن قايرات-جىگەرىن، ۇلى ىستەرى مەن جەڭىستەرىن بويىنا سىڭىرگەن اسىل بۇيىم. بۇگىندە جەلبىرەگەن كوك تۋ – اتا-بابامىز تابىنعان كوك اسپاننىڭ ءتۇسى. ال تۋداعى كۇن ەسىك قورعانىنان تابىلعان التىن ادامنىڭ باس كيىمىندە ورىلگەن ورنەك رەتىندە بەينەلەنگەن. ال كۇلتەگىننىڭ باس كيىمىندەگى سامۇرىق قىران قۇس بەينەسىندە. ءدال وسىنداي سامۇرىق بەينەسىنىڭ كەيىننەن التىن وردانىڭ مەملەكەتتىك ەلتاڭباسى رەتىندە قابىلدانۋى قازاق جەرىندەگى ەتنيكالىق ۇدەرىستەردىڭ ساباقتاستىعىنىڭ دالەلى»، - دەدى سپيكەر.
تاريحشى ەلتاڭباعا قاتىستى ويىن ءبىلدىرىپ، مۇندا دا ساباقتاستىقتىڭ ايقىن بەلگىلەرى بار ەكەنىن ايتتى. ونىڭ ايتۋىنشا، ەلتاڭباداعى بەلگىلەر حالىقتىڭ تاريحي جادىگەرلەرى مەن قۇندىلىقتارىن بەينەلەيدى.
«شاڭىراق – بۇكىل كوشپەلىلەر وركەنيەتىنىڭ سيمۆولى. ال شاڭىراقتىڭ ەكى جاعىنداعى اڭىزداعى قاناتتى پىراقتاردىڭ بەينەسى ويدان شىعارىلماعان، ول دا تاريحي جادىگەر. التىن ادامنىڭ باس كيىمىندە ايقىش ءتارىزدى تاڭبا – كۇننىڭ بەلگىسى، ال ونىڭ استىندا بەينەلەنگەن قاناتتى اتتار - ماڭگىلىكتىڭ بەلگىسى. ولاردىڭ ەكى جاققا دا قاراۋى شەكسىزدىكتى بىلدىرەدى. «ماڭگىلىك ەل» يدەياسى تۇركى جازبا ەسكەرتكىشتەرىندە كورىنىس تاپقان»، - دەيدى ول.
پروفەسسور قازاقستان ءانۇرانى بىرنەشە رەت وزگەرتىلگنىن ەسكە سالدى. سونىمەن بىرگە ول قازىرگى ءانۇراننىڭ اۋەنىنە شەتەلدىكتەر ءتانتى ەكەنىن اتاپ ءوتتى.
«ءان – حالىقتىڭ جانى. زامان وزگەرەدى، كۇي وزگەرەدى. ءانۇراننىڭ يدەياسى دا وسىلاي وزگەرەدى. كەڭەس داۋىرىندەگى قازاقستاننىڭ ءانۇرانى ەستەرىڭىزدە شىعار. ال تاۋەلسىزدىك العاننان كەيىن ءانۇراندى وزگەرتتىك. ونىڭ ءسوزى «التىن كۇن اسپانى» دەپ باستالادى. ونىڭ اۆتورلارى – ءشامشى قالداياقوۆ پەن جۇمەكەن ناجىمەدەنوۆ. ونىڭ ءماتىنىن ەستە ساقتاۋ وڭاي، ايبىندى ءارى اۋەزدى. گەنناديي گولوۆكيننىڭ كەزەكتى كەزدەسۋىنىڭ بىرىندە جەكپە-جەك باستالماي تۇرىپ، ديماش قۇدايبەرگەنوۆ ءانۇرانىمىزدى شىرقاعانىن ەسىمىزگە تۇسىرەيىكشى. شەتەلدىكتەر ءسۇيسىنىپ، سوزدەرىن تۇسىنبەسە دە، «قانداي ءانۇران! رۋحتى شابىتتاندىرادى» دەگەن جاعىمدى پىكىرلەر قالدىردى. ارينە، مۇنداي نارسەلەر ماقتانىش سەزىمىن تۋدىرادى »، - دەپ ءبولىستى ول.
مەملەكەتتىك رامىزدەر كۇنى سياقتى مەرەكەلەر قازاقستان حالقىنىڭ بىرلىگى مەن ءبىرتۇتاستىعىنىڭ قالىپتاسۋىنا ىقپال ەتەدى، دەپ تۇيىندەدى بايانداماشى.