اۋرۋمەن كۇرەسۋ ءۇشىن جۇيەلى شارالار قابىلدانۋدا. بۇل تۋرالى وڭىرلىك كوممۋنيكاسيالار قىزمەتىنىڭ ونلاين بريفينگى بارىسىندا الماتى قالاسى سانيتارلىق-ەپيدەميولوگيالىق باقىلاۋ دەپارتامەنتىنىڭ وكىلدەرى حابارلادى.
«الماتى قالاسىندا 2023 جىلدىڭ ناۋرىز ايىنان باستاپ قىزىلشانىڭ 5563 زەرتحانالىق راستالعان جاعدايى تىركەلدى، ونىڭ ىشىندە 14 جاسقا دەيىنگى بالالار اراسىندا 4011 جاعداي (72،1%)، 15 جاستان 18 جاسقا دەيىنگى جاسوسپىرىمدەر اراسىندا – 217 (3،9%) جانە ەرەسەكتەر اراسىندا – 1335 (23،9%)»، - دەپ حابارلادى الماتى قالاسى سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى قاسىمحان الپىسباي ۇلى.
بالالار اراسىندا اۋرۋشاڭدىق نەگىزىنەن ۆاكسيناسيادان باس تارتۋ سەبەبىنەن، سونداي-اق ۆاكسيناسيادان مەديسينالىق ايىرۋ جانە ەگۋ جاسىنا جەتپەۋ سەبەبىنەن ۆاكسيناسيالانباعاندار اراسىندا تىركەلەدى.
سانيتارلىق-ەپيدەميولوگيالىق قىزمەت ماماندارى پروفيلاكتيكالىق جانە ەپيدەمياعا قارسى ءىس-شارالار جۇرگىزەدى.
قالادا قىزىلشاعا، پاروتيت قىزامىعىنا قارسى حالىقتى قوسىمشا جاپپاي يممۋنداۋ جالعاسۋدا.
2023 جىلعى 6 قاراشا مەن 2024 جىلعى 14 اقپان ارالىعىندا قالادا قىزىلشاعا قارسى قجي شەڭبەرىندە بارلىعى 156 794 ادام قامتىلدى، ونىڭ ىشىندە 6 ايدان باستاپ 10 اي 29 كۇنگە دەيىنگى 12 201 بالا، 2 جاستان 4 جاسقا دەيىنگى بالالار – 77 807، مەديسينا قىزمەتكەرلەرى – 8676 جانە باسقا جاستاعى بۇرىن قىزىلشاعا قارسى جوسپارلى ەكپە الماعان تولىقتىرا يممۋنداۋ بويىنشا 58 110 بالا.
بالالاردى جوسپارلى ۆاكسيناسيالاۋ تۇرعىلىقتى جەرى بويىنشا قالانىڭ ەمحانالارىنىڭ بارلىق ەگۋ كابينەتتەرىندە تەگىن جۇرگىزىلەدى. ۆاكسيناسيا جۇرگىزۋ ءۇشىن ددۇ سەرتيفيكاتتاعان جانە قازاقستان رەسپۋبليكاسىندا تىركەلگەن قىزىلشاعا، قىزامىققا، ەپيدەميالىق پاروتيتكە قارسى ارالاس ۆاكسينا قولدانىلادى.
قىزىلشا – بۇل اۋا-تامشىلى ينفەكسيالار توبىنا جاتاتىن قۇرامىندا رنق ۆيرۋسى بار جەدەل رەسپيراتورلىق جوعارى جۇقپالى ۆيرۋستىق اۋرۋ.
اۋرۋ ناۋقاس ادامنان ساۋ ادامعا اۋا ارقىلى، تىنىس الۋ جولدارىنان تامشىلارمەن نەمەسە جۇقتىرعان ادامداردىڭ مۇرنىنان نەمەسە تاماعىنان سەكرەسيالارمەن تىكەلەي بايلانىستا بولعاندا جۇعادى.
«قىزىلشانى جۇقتىرۋدان، سونداي - اق ولاردىڭ اسقىنۋلارىنىڭ الدىن الاتىن جالعىز ءتيىمدى قۇرال-بۇل تەك ۆاكسيناسيا»، - دەپ ەسكە سالدى سەبد-دە.
اۋرۋ بەلگىلەرى پايدا بولعان جاعدايدا ەپيدەميولوگتار كەلەسىدەي كەڭەستەر بەرەدى:
- ءوزىن-وزى ەمدەۋمەن اينالىسپاۋ، دارىگەردى ۇيگە شاقىرىپ جانە دارىگەردىڭ نۇسقاۋى بويىنشا ەم الۋ؛
- ۇيدە بولۋ، جۇمىس جانە وقۋ ورىندارىنا، سونداي-اق قوعامدىق جانە مادەني-بۇقارالىق ءىس-شارالار ورىندارىنا بارماۋ.
اسىرەسە، امبۋلاتوريالىق ەمدەلىپ جاتقان ناۋقاستار ۇيدە وقشاۋلاۋدى قاتاڭ ساقتاۋى كەرەك؛
- اۋىرعان بالالاردى ۇيىمداسقان ۇجىمدارعا، مەكتەپتەرگە، مادەني-بۇقارالىق ءىس-شارالار وتەتىن ورىندارعا جىبەرمەۋ.