قىزىلوردادا جاسوسپىرىمدەر اراسىنداعى داۋ اۋىر جاراقاتقا ۇلاستى. قالاداعى №267 مەكتەپتىڭ 15 جاستاعى وقۋشىسىن پىشاقتاپ كەتكەن. وقيعا كۇندىزگى ۋاقىتتا، ياعني ساباقتان تىس مەزگىلدە بولعان، - دەپ حابارالايدى aqshamnews.kz ءتىلشىسى ينفورمبيۋرو 31-گە سىلتەمە جاساپ.
كۋاگەرلەردىڭ ايتۋىنشا، جوعارى سىنىپ وقۋشىسى مەن كوللەدج ستۋدەنتى اراسىندا سوزگە كەلىسپەۋشىلىك تۋىنداپ، ارتىنشا جانجال توبەلەسكە ۇلاسقان. سول ساتتە تاراپتاردىڭ ءبىرى ەكىنشىسىنە سۋىق قارۋ قولدانعان. وسىلايشا مەكتەپ وقۋشىسى ءىش جانە كەۋدە تۇسىنان جاراقات العان. دارىگەرلەر زارداپ شەككەن ءجاسوسپىرىمنىڭ جاعدايىن ورتاشا اۋىر دەپ باعالاپ وتىر. ءقازىر ول قالالىق اۋرۋحانانىڭ جانساقتاۋ بولىمىندە ەم قابىلداپ جاتىر.
ال كۇدىكتى كوپ ۇزاماي پوليسيا قىزمەتكەرلەرىمەن ۇستالىپ، ۋاقىتشا ۇستاۋ يزولياتورىنا قامالدى. قىزىلوردا وبلىستىق پوليسيا دەپارتامەنتى باسشىسىنىڭ ورىنباسارى سەرىك توقتىبايەۆتىڭ ايتۋىنشا، وقيعا بويىنشا قىلمىستىق كودەكسىنىڭ 106-بابى، 1-بولىگى "كامەلەتكە تولماعان ادامعا قاساقانا اۋىر دەنە جاراقاتىن سالۋ" بويىنشا قىلمىستىق ءىس قوزعالعان.
"ءقازىر وقيعانىڭ بارلىق ءمان-جايىن انىقتاۋعا باعىتتالعان تەرگەۋ امالدارى جۇرگىزىلىپ جاتىر. ساراپتامالار تاعايىندالدى"، – دەدى سەرىك توقتىبايەۆ.
مەكتەپ اكىمشىلىگى بولسا، وقيعا ساباقتان تىس ۋاقىتتا بولعانىن ايتىپ، بۇل جاعدايدىڭ ءبىلىم ورداسىنا قاتىسى جوق ەكەنىن جەتكىزدى. قۇقىق قورعاۋ ورگاندارى اتا-انالار مەن ۇستازداردى بالالاردىڭ مىنەز-قۇلقىنا، ورتاسىنا جانە الەۋمەتتىك جەلىدەگى بەلسەندىلىگىنە كوبىرەك نازار اۋدارۋعا شاقىردى.