4 قازاندا الماتى ونكولوگيالىق ورتالىعىندا ءسۇت بەزى قاتەرلى ىسىگىنە قارسى كۇرەس ايلىعى "قىزعىلت قازان" اياسىندا اشىق ەسىك كۇنى ءوتتى.
اكسيانىڭ ماقساتى — ايەلدەردىڭ ونكولوگيالىق اۋرۋلاردى ەرتە انىقتاۋدىڭ ماڭىزدىلىعىن ارتتىرۋ جانە پروفيلاكتيكالىق تەكسەرۋدەن تۇراقتى ءوتۋ مادەنيەتىن قالىپتاستىرۋ.
اشىق ەسىك كۇنى اياسىندا 81 ايەل مامانداردىڭ قابىلداۋىندا بولدى. تەكسەرۋ ناتيجەسىندە 6 ايەلدەن قوسىمشا زەرتتەۋدى قاجەت ەتەتىن كۇماندى وزگەرىستەر انىقتالدى. ال وزىنە قويىلعان دياگنوزدى ناقتىلاپ، وزگە ماماننان كەڭەس الۋعا كەلگەن ءبىر ناۋقاستا ءسۇت بەزى قاتەرلى ىسىگى دياگنوزى بۇرىننان راستالعان ەكەن. قازىرگى تاڭدا ول الماتى ونكولوگيالىق ديسپانسەرىندە ەم قابىلداپ جاتىر. ەمدەۋ بارىسى وڭ ناتيجە كورسەتىپ، دارىگەرلەر سانيتارلىق ماستەكتوميانى ۇسىنىپ وتىر.
سونىمەن قاتار، 62 ايەلگە ءسۇت بەزىنىڭ ۋلترادىبىستىق زەرتتەۋى (ۋدز) جۇرگىزىلدى.
ايتا كەتەيىك، اكسيا الماتى تۇرعىندارىنىڭ عانا ەمەس، سونىمەن بىرگە قونايەۆ قالاسى مەن الماتى وبلىسىنىڭ، سونداي-اق استانا مەن اقمولا وبلىسىنىڭ ايەلدەرىنىڭ دە قىزىعۋشىلىعىن تۋعىزدى.
"قىزعىلت قازان" ايلىعى اياسىندا وسىنداي اشىق ەسىك كۇندەرى 11 جانە 18 قازان كۇندەرى دە جالعاسىن تابادى. كەز كەلگەن ايەل وسى كۇندەرى تەگىن تەكسەرۋدەن ءوتىپ، قاتەرلى ىسىكتىڭ الدىن الۋ مەن ەرتە انىقتاۋ جولدارى جونىندە مامانداردان كەڭەس الا الادى.
مۇنداي شارالار دەرتتى ەرتە انىقتاۋعا مۇمكىندىك بەرىپ قانا قويماي، ايەلدەردىڭ ءوز دەنساۋلىعىنا دەگەن جاۋاپكەرشىلىگىن ارتتىرۋعا سەپتىگىن تيگىزەدى.