ق ر عىلىم جانە جوعارى ءبىلىم مينيسترلىگى باستاعان دەلەگاسيا 2025 جىلدىڭ قاڭتار ايىنىڭ 23-25 ارالىعىندا ۇلىبريتانيادا ءوتىپ جاتقان حالىقارالىق Bett UK كونفەرەنسياسىنا قاتىسۋدا.
حالىقارالىق شارادا ەلىمىزدىڭ جوعارى وقۋ ورىندارىنىڭ ارنايى پاۆيلونى ورناتىلدى، دەپ حابارلايدى aqsamnews.kz.
Bett UK كونفەرەنسياسى اياسىندا QyzPU باسقارما ءتوراعاسى – رەكتورى گۇلميرا قاناي جانە حالىقارالىق باعدارلامالار ورتالىعىنىڭ پرەزيدەنتى ءادىل قۇسمانوۆ ساسسەكس ۋنيۆەرسيتەتىنىڭ ۆيسە-كانسلەرى ساشا روسنيلمەن كەزدەسۋ وتكىزىپ، ەكى ۋنيۆەرسيتەت اراسىنداعى قوس ديپلوم باعدارلامالارىن ىسكە قوسۋ ماسەلەسىن تالقىلادى.
2023 جىلى ەكى ۋنيۆەرسيتەت اراسىندا ءوزارا ىنتىماقتاستىق تۋرالى مەموراندۋمعا قول قويىلىپ، قازىرگى ۋاقىتتا بىرنەشە ماڭىزدى جوبا جۇزەگە اسىرىلىپ جاتىر.
«QyzPU مەن ۇلىبريتانيا كەڭەسى اراسىندا ىنتىماقتاستىق تۋرالى مەموراندۋم اياسىندا فيلولوگيا ينستيتۋتىنان 3 دوكتورانت جانە 5 وقىتۋشى ساسسەكس ۋنيۆەرسيتەتىندەگى جازعى مەكتەپكە قاتىسىپ، تاجىريبە الماستى. ايتا كەتەرلىك جايت، ساسسەكس ۋنيۆەرسيتەتى ۇلىبريتانيانىڭ ۇزدىك 50 جوعارى وقۋ ورنىنىڭ قاتارىنا كىرەدى. سونىمەن قاتار، «بولاشاق» حالىقارالىق باعدارلاماسىنىڭ «500 عالىم» عىلىمي تاعىلىمداما اياسىندا 2023 جىلى فيلولوگيا ينستيتۋتىنىڭ 2 وقىتۋشىسى تاعىلىمدامادان ءساتتى ءوتتى. قازىرگى ۋاقىتتا 2 وقىتۋشى وسى ۋنيۆەرسيتەتتە بىلىكتىلىكتەرىن ارتتىرۋدا. بريتاندىق كەڭەسپەن بىرلەسكەن مەموراندۋم نەگىزىندە فيلولوگيا ينستيتۋتىنىڭ ستۋدەنتتەرى Future English Online Teacher Community باعدارلاماسىنا قاتىسۋ مۇمكىندىگىنە يە بولدى. 2023 جىلى بۇل باعدارلاماعا 25 ستۋدەنت، ال 2024 جىلى 19 ستۋدەنت قاتىسىپ، حالىقارالىق دەڭگەيدەگى سەرتيفيكاتتارعا يە بولدى»، – دەدى فيلولوگيا ينستيتۋتىنىڭ ديرەكتورى اشينوۆا كۋنيپا احاتوۆنا.
قازاق ۇلتتىق قىزدار پەداگوگيكالىق ۋنيۆەرسيتەتى مەن ساسسەكس ۋنيۆەرسيتەتى اراسىنداعى ىنتىماقتاستىق عىلىم مەن ءبىلىم سالاسىندا جاڭا بەلەستەردى باعىندىرۋعا باعىتتالعان ماڭىزدى قادام بولىپ تابىلادى. 2023 جىلى وتكىزىلگەن 7 كۇندىك سەمينار ەكى ۋنيۆەرسيتەتتىڭ پروفەسسورلىق-وقىتۋشىلىق قۇرامىنىڭ جانە دوكتورانتتارىنىڭ عىلىمي الەۋەتىن ارتتىرۋعا زور ۇلەس قوستى.
«2023 جىلدىڭ شىلدە ايىندا ساسسەكس ۋنيۆەرسيتەتى مەن قازاق ۇلتتىق قىزدار پەداگوگيكالىق ۋنيۆەرسيتەتى اراسىندا پروفەسسورلىق-وقىتۋشىلىق قۇرام مەن دوكتورانتتارعا ارنالعان سەمينار ۇيىمداستىرىلدى. سەمينار بارىسىندا ساسسەكس ۋنيۆەرسيتەتىنىڭ بىلىكتى دوكتورلارى مەن پروفەسسورلارى دارىستەر وقىپ، وزىق تاجىريبەلەرىمەن ءبولىستى. ال سەميناردىڭ كەلەسى كۇندەرىندە توپتىق جۇمىستار جۇرگىزىلىپ، قاتىسۋشىلار وزدەرىنىڭ زەرتتەۋ تاقىرىپتارىن تانىستىرىپ، ولاردى ءارى قاراي دامىتۋ جولدارى بويىنشا كاسىبي كەڭەستەر الدى. ساراپشىلار تاراپىنان ۇسىنىلعان پىكىرلەر قاتىسۋشىلاردىڭ عىلىمي-زەرتتەۋ داعدىلارىن جەتىلدىرۋگە ايتارلىقتاي ىقپال ەتتى. 2024 جىلى ءبىز شەتەلدىك ارىپتەستەرىمىزدىڭ زەرتتەۋ جوباسىنا قاتىسۋ مۇمكىندىگىنە يە بولدىق. بۇل ءىس-شارا عىلىمي جۇمىسىمىزدى ءارى قاراي دامىتۋ ءۇشىن زور مۇمكىندىك بولدى. بۇل تازا كاسىبي تاجىريبە الماسۋ بولدى دەپ ايتۋعا تولىق نەگىز بار. سەمينارعا قاتىسقان ءبىرقاتار وقىتۋشى ءبىر اپتا كولەمىندە وزدەرىنىڭ ارىپتەستەرىنە كۋرس ۇيىمداستىردى. سول باعىتتاعى وقۋ جانە تاجىريبە الماسۋ ماقساتتارى جۇزەگە اسىپ، وقۋ ورنىنىڭ عىلىمي الەۋەتىن ارتتىرۋعا ۇلەس قوستى»، – دەدى ماگيستر، QyzPU اعا وقىتۋشىسى سابيت بوتاكوز.
قازىرگى تاڭدا QyzPU-دىڭ پروفەسسور، وقىتۋشىلارى «بولاشاق» حالىقارالىق باعدارلاماسىنىڭ «500 عالىم» جوباسى اياسىندا ۇلىبريتانيادا ساسسەكس ۋنيۆەرسيتەتىندە عىلىمي تاعىلىمدامادان ءوتىپ جاتىر. سولاردىڭ ءبىرى – شەتەل ءتىلىن كاسىبي وقىتۋ كافەدراسىنىڭ اعا وقىتۋشىسى ماريتا سنابەكوۆا 2024 جىلدىڭ 1 ناۋرىزىنان باستاپ اتالعان ۋنيۆەرسيتەتتىڭ ءبىلىم بەرۋ جانە الەۋمەتتىك جۇمىستار مەكتەبىندە تاعىلىمدامادان ءوتىپ جاتىر. ءبىلىم بەرۋدەگى مەنەدجمەنت باعىتىن تاڭداعان عالىم جوعارى ءبىلىم بەرۋ پەداگوگيكاسىنداعى زەرتتەۋلەر مەن يننوۆاسيالار تاقىرىبىن زەرتتەۋدە.
«جوعارى وقۋ ورىندارىنداعى پەداگوگيكا، زەرتتەۋ جانە كوشباسشىلىققا باسا نازار اۋدارىپ، ەكسپەريمەنتالدى تاجىريبەلەرىنە، تاجىريبەلى مۇعالىمدەردىڭ تالىمگەرلىك كومەگىنەن جانە ءبىلىم بەرۋ سالاسىنداعى ساراپشى زەرتتەۋشىلەردىڭ تاجىريبەلەرىنەن كاسىبي بىلىكتىلىگىمدى ارتتىرىپ جاتىرمىن. تاعىلىمداما اياسىندا دارىستەر، سەمينارلار، تاجىريبەلىك ساباقتارعا قاتىسۋ ارقىلى ءبىلىم بەرۋ سالاسىنداعى كاسىبي ءبىلىمىمدى ارتتىرىپ قانا قويماي، سونىمەن قاتار شەتەلدىك ارىپتەستەرىمىزدەن جوعارى ءبىلىم بەرۋدەگى تاجىريبەلەرىن، ستۋدەنتتەرمەن كوممۋنيكاسيا ورناتۋ تاسىلدەرىن، باعالاۋ ادىس-تاسىلدەرىن جانە جوعارى وقۋ ورىندارىندا وقىتۋ مەن وقۋ ساپاسىن ارتتىرۋ مۇمكىندىگىنە يە بولدىم. مادەني ءىس-شارالارعا قاتىسۋ ارقىلى اعىلشىن مادەنيەتىمەن جاقىننان تانىستىم. «500 عالىم» تاعىلىمداماسى بويىنشا «بولاشاق» حالىقارالىق ستيپەندياسىنىڭ يەگەرى اتانۋىما جانە ۇزدىك شەتەلدىك وقۋ ورىندارىنىڭ ءبىرى ساسسەكس ۋنيۆەرسيتەتىندە ءبىلىم الۋىما باستى سەبەپكەر – ەكىجاقتى ءوزارا ىنتىماقتاستىق تۋرالى مەموراندۋمعا قول قويىلىپ، بىزگە بىلىكتىلىكتى ارتتىرۋ كۋرسىنا قاتىسۋعا مۇمكىندىكتىڭ بەرىلۋى دەپ بىلەمىن. ۋنيۆەرسيتەتىمىزدىڭ رەكتورى گۇلميرا ءامىرحان قىزى قانايعا وسىنداي مۇمكىندىك ءۇشىن العىسىمدى بىلدىرەمىن»، – دەدى ماريتا مۋرزابەكوۆنا.
2023 جىلدان بەرى ەكى ۋنيۆەرسيتەت بريتاندىق كەڭەستىڭ ءۇش بىردەي گرانتىنا يە بولدى: قوس ديپلوم باعدارلامالارىن دايىنداۋ ماقساتىندا – 10 000 فۋنت ستەرلينگ؛ ءوزارا وكىلەتتىكتەر اشۋ ماقساتىندا – 25 000 فۋنت ستەرلينگ؛ جانە اعىلشىن ءتىلى مۇعالىمدەرىنىڭ بىلىكتىلىگىن ارتتىرۋ ماقساتىندا – 30 000 فۋنت ستەرلينگ گرانتتىق قولداۋ بەرىلدى.
جاقىن ارادا ەكى ۋنيۆەرسيتەت اراسىندا PGCE (Postgraduate Certificate Programme) جانە split PhD باعدارلامالارىن باستاۋ جوسپارلانۋدا.