انسامب قۇرامىندا 30 قىز بالا (ۇلكەن جانە كىشى توپ) بولسا، رەپەرتۋاردا وتىزعا تارتا ءان، تەرمە بار
باتىسقازاقستاندىق «قىز جىبەك» ءداستۇرلى انشىلەر ءانسامبلى تۇركيانىڭ يزمير قالاسىندا وتكەن «International Foça Forgotten Children Games and Dance Festival» اتتى حالىقارالىق فەستيۆال-بايقاۋىندا» ءبىرىنشى ورىنعا يە بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
اتالمىش بايقاۋعا ءازىربايجان، بولگاريا، رۋمىنيا، گرۋزيا، ماكەدونيا، كوسوۆو، بوسنيا جانە گەرسوۆينا، گرەكيا، سەربيا، مولدوۆا، ۋكراينا، تۇركيا، قازاقستان ەلدەرىنەن مىڭعا جۋىق بالا قاتىسىپ، ب ا ق سىنادى.
«قىز جىبەك» ءانسامبلىن 2011 جىلى بەلگىلى انشى-تەرمەشى، سازگەر، ۇستاز، «ەرەن ەڭبەگى ءۇشىن» مەدالىنىڭ يەگەرى بايان قابييەۆا كازتالوۆ اۋدانى، جالپاقتال اۋىلىندا ۇيىمداستىرعان بولاتىن. سودان بەرى رەسپۋبليكالىق، حالىقارالىق بايقاۋلاردا توپ جارىپ ۇلگەرگەن انسامبلگە بايان قۇبايقىزىمەن بىرگە ونىڭ ۇلى اسىلحان بولتانوۆ جەتەكشىلىك ەتىپ كەلەدى.
اسىلحان قىمىزباي ۇلىنىڭ ايتۋىنشا، قازىرگى كەزدە انسامب قۇرامىندا 30 قىز بالا (ۇلكەن جانە كىشى توپ) بولسا، رەپەرتۋاردا وتىزعا تارتا ءان، تەرمە بار.
«انسامبل قازاقتىڭ ءتول ونەرىن ناسيحاتتاپ قانا قويماي، تاتار، ورىس، قىرعىز، تۇرىك حالىقتارىنىڭ اندەرىن دە ورىندايدى. بۇل جولى مەنىڭ «قازاق ەلى جاساسىن!» اتتى انىمە قوسا ماحامبەتتىڭ تەرمەسىن، تۇرىكتىڭ بەسىك جىرىن شىرقادى. 23 ساۋىردە تۇركيانىڭ ۇلتتىق تاۋەلسىزدىك كۇنىمەن قوسا بالالار كۇنى دە اتالىپ وتىلەدى. ول ەلدە بالالارعا ەرەكشە كوڭىل بولىنەدى ەكەن. مينيسترلىكتەن كەلگەن باسشىلار ءار توپقا كەلىپ، «قوش كەلدىڭدەر!» دەپ قۇرمەت كورسەتتى. فەستيۆال قورىتىندىسىندا ءبىرىنشى ورىنمەن بىرگە بولگاريادا 29 ماۋسىم – 3 شىلدە ارالىعىندا وتەتىن «Sunny days in Sunny Beach» اتتى حالىقارالىق بايقاۋعا جولداما الدىق»، - دەدى ا.بولتانوۆ.