2024 جىلدىڭ 14 قازانىندا قىتايدىڭ سيان قالاسىندا جانە 16 قازانىندا پەكيندە الماتى قالاسىنىڭ تۋريزم كۇندەرى وتەدى. ءىس-شارانىڭ ماقساتى – تۋريستىك سالاداعى حالىقارالىق ىنتىماقتاستىقتى دامىتۋ جانە نىعايتۋ، سونداي-اق الماتىعا تۋريستەردى تارتۋ، دەپ حابارلايدى aqshamnews.kz
دوستىق كەزدەسۋلەر اياسىندا جۇڭگو حالىق رەسپۋبليكاسىنىڭ جەتەكشى شەتەلدىك تۋروپەراتورلارىنىڭ، حالىقارالىق اۋە كومپانيالارىنىڭ، تۋريستىك قاۋىمداستىقتار مەن قوناقۇيلەردىڭ وكىلدەرىمەن كەلىسسوزدەر جوسپارلانعان. كەزدەسۋ قورىتىندىسى بويىنشا قازاقستان رەسپۋبليكاسى مەن جۇڭگو حالىق رەسپۋبليكاسى اراسىنداعى تۋريستىك اعىندى ارتتىرۋعا باعىتتالعان ىنتىماقتاستىق تۋرالى مەموراندۋمدارعا قول قويۋ كوزدەلۋدە.
ءىس-شارا بارىسىندا الماتىنىڭ بىرەگەي تۋريستىك ونىمدەرىن تانىستىرۋ قاراستىرىلعان. قاتىسۋشىلار ءۇشىن قازاقستاندىق ارتىستەردىڭ ونەر كورسەتۋىمەن جانە قولونەرشىلەردىڭ شەبەرلىك ساعاتتارىمەن مادەني باعدارلاما ۇيىمداستىرىلادى. بۇل جارقىن جانە ەستە قالارلىق اتموسفەرا سىيلارى انىق. ونەرپازدار ءداستۇرلى قازاق اندەرى مەن بيلەرىن ورىنداپ، قاتىسۋشىلاردى قازاقستاننىڭ باي مادەنيەتىمەن تانىستىرادى. سونىمەن قاتار، كەلۋشىلەر ۇلتتىق تاعامداردان ءدام تاتىپ، الماتىنىڭ اسپازدىق داستۇرىمەن دە جاقىنىراق تانىسپاق.
ءىس-شارا سوڭىندا جۇڭگو حالىق رەسپۋبليكاسىنىڭ ءىرى تۋروپەراتورلارى اراسىندا الماتىعا تۋر ۇتىس ويىنى وتكىزىلەدى. جەڭىمپازدار قالاعا كەلىپ، «مەدەۋ» مۇز ايدىنى، «شىمبۇلاق» تاۋ شاڭعى كۋرورتى جانە مادەني-تاريحي مۇرا نىساندارى سىندى كورىكتى جەرلەرمەن تانىسۋعا مۇمكىندىك الادى.