لوندون ۋاقىتى استانا ۋاقىتىنان 4 ساعات ارتتا ەكەنىن ەسكەرسەك، 6 قازاندا قازاقستاندا اەس سالۋ ماسەلەسىنە ارنالعان رەسپۋبليكالىق رەفەرەندۋمعا داۋىس بەرۋ لوندوندا كەشىرەك اياقتالادى. بۇل تۋرالى انگلياداعى ءتىلشىمىز حابارلايدى.
ۇلىبريتانيا استاناسىنداعى №376 سايلاۋ ۋچاسكەسى قازاقستان ەلشىلىگىنىڭ عيماراتىندا ورنالاسقان.
بۇرىنعى سايلاۋلاردىڭ تاجىريبەسى كورسەتكەندەي، داۋىس بەرۋشىلەردىڭ سانى تۇسكە قاراي كوبەيەدى، سەبەبى ەلدىڭ ءار تۇكپىرىنەن كەلەتىن قازاقستاندىقتارعا لوندونعا جەتۋ ءۇشىن ءبىراز ۋاقىت قاجەت. داۋىس بەرۋشىلەردىڭ كوپشىلىگى ستۋدەنتتەر بولادى دەپ كۇتىلۋدە، سەبەبى ولار بۇرىن دا بەلسەندىلىك تانىتقان. سونىمەن قاتار، وسى ەلدە ۋاقىتشا تۇرىپ جاتقان، تۋريست رەتىندە كەلگەن، ىسساپارمەن جۇرگەن قازاقستاندىقتار دا ەلشىلىك عيماراتىندا ءوز تاڭداۋلارىن جاساي الادى.
"رەفەرەندۋمعا دايىندىق قىزۋ ءجۇرىپ جاتىر. اككرەديتتەلگەن جۋرناليستەرگە دە حابار تاراتۋعا قاجەتتى جاعدايدىڭ ءبارى جاسالدى،" - دەدى №376 سايلاۋ ۋچاسكەسىنىڭ ءتوراعاسى رۋسلان قارابۇلوۆ.
6 قازاندا اتالمىش سايلاۋ ۋچاسكەسى لوندون ۋاقىتىمەن تاڭعى ساعات 7:00-دە اشىلىپ، كەشكى ساعات 20:00-دە جابىلادى.