الماتى اكىمى دارحان ساتىبالدىنىڭ بەيجىڭ قالاسىنا جاساعان جۇمىس ساپارى بارىسىندا China Professionals-Workers International Travel Service Head Office (CPITS) كومپانياسىنىڭ وكىلدەرىمەن كەزدەسۋ ءوتتى. كەزدەسۋ ناتيجەسىندە تۋريزم سالاسىنداعى ىنتىماقتاستىق تۋرالى مەموراندۋمعا قول قويىلدى، دەپ حابارلايدى aqshamnews.kz
قۇجات جۇڭگو حالىق رەسپۋبليكاسىنان الماتىعا جىل سايىن 50 مىڭعا دەيىن تۋريستەر اعىنىن ۇيىمداستىرۋدى جانە ۇيلەستىرۋدى كوزدەيدى. كەلىسىم ەكى جاقتى ءتۋريزمدى دامىتۋعا، مادەني بايلانىستاردى نىعايتۋعا جانە الماتىنى ورتالىق ازياداعى جەتەكشى تۋريستىك باعىتتاردىڭ ءبىرى رەتىندە ىلگەرلەتۋگە باعىتتالعان. الدىن الا ەسەپ بويىنشا، ءبىر قىتايلىق ءتۋريستىڭ قوناقۇيگە ورنالاسۋ، تاماقتانۋ، ەكسكۋرسيالار جانە ساتىپ الۋلارعا جۇمسايتىن شىعىنى ورتا ەسەپپەن 1 500 اقش دوللارىنا بارادى.
وسىلايشا، 50 مىڭ تۋريست قابىلداۋدان كۇتىلەتىن ەكونوميكالىق اسەر جىلىنا شامامەن 75 ملن اقش دوللارى بولماق. بۇل قالانىڭ ەكونوميكاسى، قىزمەت كورسەتۋ سالاسى جانە شاعىن بيزنەس ءۇشىن ايتارلىقتاي سەرپىن بەرەدى.
الماتى اكىمى دارحان ساتىبالدى مەموراندۋمنىڭ ماڭىزدىلىعىن اتاپ ءوتتى: «الماتى وڭىردەگى تۋريستىك كارتادا ءاردايىم جەتەكشى ورىنعا يە. قىتايدان كەلەتىن قوناقتاردى تارتۋدا ۇلكەن الەۋەت بار ەكەنىن كورىپ وتىرمىز. بۇل كەلىسىم ۇزاق مەرزىمدى سەرىكتەستىككە جانە ءوزارا ءتيىمدى ىنتىماقتاستىققا نەگىز بولادى دەپ سەنەمىز»، دەدى ول.
CPITS — قىتايداعى ەڭ ءىرى تۋروپەراتورلاردىڭ ءبىرى. كومپانيا الماتىعا ۇيىمداستىرىلعان تۋريستىك توپتاردى قالىپتاستىرۋ جانە تۋريستىك باعدارلامالاردى ىلگەرلەتۋ جۇمىستارىن جۇزەگە اسىرادى. كەلىسىمدى ىسكە اسىرۋ الداعى تۋريستىك ماۋسىمدا باستالادى.