ەلىمىزدىڭ وڭىرلەرىندە قىسقى كەزەڭدەگى توتەنشە جاعدايلاردىڭ الدىن الۋعا جانە ولاردى جويۋعا ازاماتتىق قورعاۋ مەملەكەتتىك جۇيەسىنىڭ اۋماقتىق كىشى جۇيەسىنىڭ ازىرلىگىن ارتتىرۋعا باعىتتالعان «قىس-2025» كوماندالىق-شتابتىق وقۋ-جاتتىعۋلارى ءوتتى، - دەپ حابارلايدى aqshamnews.kz.
وقۋ-جاتتىعۋدىڭ نەگىزگى ماقساتى باسقارۋ ورگاندارىنىڭ، ازاماتتىق قورعاۋ كۇشتەرى مەن قۇرالدارىنىڭ ءوزارا ءىس-قيمىلىن پىسىقتاۋ، ىقتيمال قىسقى تج-عا دەن قويۋدىڭ جەدەلدىگى مەن تيىمدىلىگىن ارتتىرۋ.
باتىس قازاقستان وبلىسىندا ءۇش قالالىق لوكاسيادا جەرگىلىكتى اتقارۋشى ورگانداردىڭ، پوليسيانىڭ جانە ۆولونتەرلەردىڭ قاتىسۋىمەن قىسقى توتەنشە جاعدايلارعا دەن قويۋ ءىس-قيمىلدارى پىسىقتالدى. «جايىقجىلۋقۋات» اق مەن «Qazaqgaz aimaq» اق باسقارۋ سيگنالدارى جەتكىزىلىپ، تاقىرىپتىق جاتتىعۋلار وتكىزىلدى. تج سالدارىن جويۋ كەزىندەگى جاعدايدى باعالاۋ جانە شەشىم قابىلداۋ الگوريتمى پىسىقتالدى. بالىقشىنىڭ جوعالۋىن مودەلدەۋ بويىنشا ىزدەستىرۋ-قۇتقارۋ ءىس-شارالارى جەكە ۇيىمداستىرىلدى: قىزمەتتىك ءيتتى قولدانا وتىرىپ جاعالاۋ سىزىعىن تەكسەرۋ، جاياۋ سىزىقتىق ىزدەۋ جانە جەدەل كومەك كورسەتۋ شارالارى اتقارىلدى. وڭىردە بارلىعى شامامەن 600 ادام جانە 200 بىرلىك تەحنيكا جۇمىلدىرىلدى.
پاۆلودار وبلىسىندا وقۋ-جاتتىعۋ كەنجەكول اۋىلىندا ءوتتى. قىسقى كەزەڭگە وڭىردە 188 جىلىتۋ پۋنكتى دايىندالدى، سونىڭ ىشىندە 11ء-ى جول-پايدالانۋ باسقارمالارىنىڭ بازالارىندا ورنالاسقان. بۇل پۋنكتتەر 20 مىڭنان استام ادامدى قابىلداي الادى، سونداي-اق 4300 توسەك-ورىنمەن قامتاماسىز ەتىلگەن. ىقتيمال توتەنشە جاعدايلاردى جويۋ ءۇشىن قۇرامىندا 2788 ادام جانە مىڭنان استام قار تازالايتىن، ينجەنەرلىك، ەۆاكۋاسيالىق جانە وتىمدىلىگى جوعارى تەحنيكالار بار توپ جاساقتالدى. تجد بولىمشەلەرى 90 بىرلىك وتىمدىلىگى جوعارى تەحنيكامەن جابدىقتالعان. داعدارىس جاعدايلارىندا قۇلاقتاندىرۋ جۇيەلەرىنىڭ جۇمىسى جانە جەدەل قىزمەتتەردىڭ ءوزارا ءىس-قيمىلى تەكسەرىلدى. ءتورت وقۋ-جاتتىعۋ سەنارييى پىسىقتالدى: رەسپۋبليكالىق ماڭىزى بار تراسساداعى جول-كولىك وقيعاسىنىڭ سالدارىن جويۋ، بوران سالدارىنان جولداردىڭ جابىلۋى كەزىندەگى ءىس-قيمىلدار، جىلىتۋ پۋنكتىن ورنالاستىرۋ، سونداي-اق ەنەرگيامەن جابدىقتاۋ نىسانىنداعى اۆاريالىق-قالپىنا كەلتىرۋ جۇمىستارى.
شىمكەنت قالاسىندا وتكەن جىلداردىڭ تالداۋىنا نەگىزدەلگەن قىسقى توتەنشە جاعدايلارعا دەن قويۋ بويىنشا ەكى كۇندىك وقۋ-جاتتىعۋ وتكىزىلدى. تىنىس-تىرشىلىكتى قامتاماسىز ەتۋ نىساندارىنا، اتاپ ايتقاندا سۋمەن جابدىقتاۋ، جىلۋ بەرۋ جانە ەنەرگيامەن جابدىقتاۋ جۇيەلەرىنە ءبولىندى. وقۋ-جاتتىعۋلار اياسىندا 11 وقۋ نۇكتەسىندە پراكتيكالىق شارالار جۇرگىزىلدى. پراكتيكالىق بولىمدە قاراتاۋ، ەڭبەكشى جانە تۇران اۋداندارىندا سۋ دەڭگەيىنىڭ شارتتى كوتەرىلۋىنەن تۋىندايتىن سۋ باسۋدىڭ الدىن الۋ ءىس-شارالارى اتقارىلدى. ماماندار حالىقتى ەۆاكۋاسيالاۋ، ارنالاردى تازارتۋ، بوگەندەردى نىعايتۋ جانە ينجەنەرلىك جۇيەلەردىڭ ۇزدىكسىز جۇمىسىن قامتاماسىز ەتۋ جۇمىستارىن پىسىقتادى. ەكىنشى كۇنى شارتتى اۆاريالار جويىلدى: گاز قۇبىرىنىڭ جارىلۋى جانە «3-ەنەرگوورتالىق» اق نىسانىندا ءورت، ا-2 اۆتوجولىندا گاز قۇبىرىنىڭ زاقىمدانۋى، ترانسفورماتوردىڭ ىستەن شىعۋى جانە قاراتاۋ اۋدانىندا ەلەكتر مەن گاز بەرۋىنىڭ ۋاقىتشا توقتاۋى. جۇمىستارعا 216 ادام جانە 41 بىرلىك تەحنيكا جۇمىلدىرىلدى. بارلىق شارتتى توتەنشە جاعدايلار دەر كەزىندە جويىلىپ، قىزمەتتەر دايىندىق دەڭگەيىن كورسەتتى.
«قىس-2025» وقۋ-جاتتىعۋلارى بارلىق قىزمەتتەردىڭ ۇيلەسىمدى جۇمىسىن جانە وڭىرلەردىڭ قىسقى كەزەڭگە دايىندىعىن كورسەتتى. قورىتىندىلار جاسالىپ، ءىس-قيمىلداردىڭ تيىمدىلىگى مەن قۇرىلىمداردىڭ ءوزارا ارەكەتتەستىگى تالداندى، ازاماتتىق قورعاۋ جۇيەسىن ودان ءارى جەتىلدىرۋ بويىنشا ۇسىنىمدار ازىرلەندى.