تەاتر ۇجىمى ۇلتتىق كىتاپ كۇنى قارساڭىندا الماتىلىق كورەرمەن نازارىنا «ورمان عاجايىپتارى» ەرتەگىسىنىڭ پرەمەراسىن ۇسىندى. قويىلىم الەمگە ايگىلى نەمىس جازۋشىسى وتفريد پرويسلەردىڭ بالالار ادەبيەتىنىڭ جاۋھارى سانالاتىن «كىشكەنتاي سيقىرشى» پوۆەسىنىڭ جەلىسىمەن ساحنالاندى.
بالالار ادەبيەتىنىڭ التىن قورىنان ورىن العان بۇل شىعارما – جاقسىلىق پەن زۇلىمدىق، باتىلدىق پەن مەيىرىم، ادالدىق پەن ىزگىلىك تاقىرىپتارىن قوزعايتىن ويلى تۋىندى. سپەكتاكلدىڭ رەجيسسەرى – ەلىمىزدەگى قۋىرشاق تەاتر رەجيسسۋراسىنىڭ دامۋىنا سۇبەلى ۇلەس قوسىپ جۇرگەن، ەرەكشە دارىنىمەن تانىلعان تالانتتى ونەر يەسى انتون زايسيەۆ.
– بۇل – قالىپتاسقان ارحەتيپتەردى جەڭىپ، سانالى تۇردە جاقسىلىقتى تاڭداعان كىشكەنتاي قىز جايلى وقيعا. بۇكىل الەم سەنى جاماندىققا يتەرمەلەيدى، ال سەن بولساڭ، كىشكەنتاي عانا ادام بولا تۇرا، جاقسىلىقتى تاڭدايسىڭ. بالاعا وسىنى ايتىپ، وعان ءتىپتى ءوزى دە ناداندىققا، ادىلەتسىز كورىنەتىن دۇنيەلەرگە قارسى تۇرا الاتىنىن، سونىمەن قاتار مەيىرىمدى بولىپ، جاقسى ىستەر جاساي الاتىنىن كورسەتۋ – مەن ءۇشىن شىن مانىندە ۇلكەن ءىس، – دەيدى انتون زايسيەۆ.
سپەكتاكلدىڭ ساحنالىق سۋرەتشىسى – اقتوبە وبلىستىق قۋىرشاق تەاترىنىڭ ديرەكتورى، قازاقستاننىڭ مادەنيەت قايراتكەرى، حالىقارالىق جانە رەسپۋبليكالىق قۋىرشاق تەاترلارى فەستيۆالدەرىنىڭ بىرنەشە مارتە «ۇزدىك سۋرەتشى» نوميناسياسى بويىنشا جەڭىمپازى ءاسيا قۇرمانالينا بولدى. جاڭا قويىلىمدا 20-عا جۋىق ءتۇرلى قۋىرشاق ءتۇرى قولدانىلدى. ال ساحنا كەڭىستىگى قۇپياعا تولى كىتاپحانا اتموسفەراسىن بەينەلەيتىن قويۋ ءارى تەرەڭ رەڭكتەرمەن كومكەرىلدى.
- ۇلتتىق كىتاپ كۇنى – رۋحاني بايلىققا باس يەتىن، ادەبيەتتىڭ قۇدىرەتىن دارىپتەيتىن ەرەكشە كۇن. مەملەكەتتىك قۋىرشاق تەاترى بۇل مەرەكەنى كىتاپ پەن تەاتر اراسىنداعى التىن كوپىردى جالعاۋ ارقىلى اتاپ ءوتۋدى ءجون كوردى. قويىلىم بارىسىن تاماشالاي وتىرىپ، كورەرمەن تەك ەرتەگى الەمىنە ساپار شەكپەيدى – ول كىتاپتىڭ شىنايى قۇندىلىعىن، پاراق اراسىنداعى عاجايىپ ءومىردى سەزىنەدى. قويىلىمنىڭ تۇپكى ماقساتى – جاس كورەرمەنگە كىتاپتىڭ سيقىرلى كۇشىن سەزىندىرۋ، ولاردى وقۋعا باۋلۋ. بۇل – وتە ماڭىزدى تاربيە. ويتكەنى، قازىرگى ساندىق زاماندا كىتاپتىڭ رۋحاني ماڭىزىن بالا بويىنا ءسىڭىرۋ وڭاي شارۋا ەمەس، – دەدى مەملەكەتتىك قۋىرشاق تەاترىنىڭ ديرەكتورى المات امانگەلدى.