№7 قالالىق كلينيكالىق اۋرۋحاناعا جەتكىزىلگەن 42 جاستاعى ناۋقاس وڭ جاق قولىنداعى ەكىنشى ساۋساعىن بالا كۇنىندە جاراقاتتاپ العان. سودان بەرى ونداعان جىل بويى ساۋساعىنىڭ باسى قاتتى اۋىرىپ، ارى قاراي شىنتاق، يىق پەن جاۋىرىندا اۋىرسىنۋ پايدا بولاتىن. جانىن جەگىدەي جەگەن اۋرۋ سالدارىنان ناۋقاس جۇمىس ىستەۋ بىلاي تۇرسىن، وڭ قولىن قوزعالتۋدان قالعان.
وسى ۋاقىت ىشىندە تالاي كلينيكانىڭ تابالدىرىعىن توزدىرعانمەن، ءارتۇرلى دياگنوز قويىلىپ، ەمنەن ەشبىر ناتيجە بولماپتى. باررە-ماسسون ىسىگى دەگەن ناقتى دياگنوزدى جەتىنشى اۋرۋحانانىڭ نەيروحيرۋرگيا ورتالىعى ماماندارى قويدى.
اۋرۋحانا نەيروحيرۋرگتەرى ساۋساققا ميكروحيرۋرگيالىق جولمەن وتا جاساپ، ىسىكتى الىپ تاستادى. ءمامس ارقىلى قارجىلاندىرىلعان بىرەگەي وپەراسيانى نەيروحيرۋرگ ماماندار ءاليحان حاليموۆ، باقىت اعلاقوۆ، التاي انارباي، بەكتۇرعان – ۇسەن بەكسۇلتان جاسادى.
«وسكىن تىرناقتىڭ استىنا شىققاندىقتان تىرناقتى الىپ تاستاۋعا تۋرا كەلدى. اينالاسىنداعى تىندەرگە تىعىز بىتكەن ىسىك تەحنيكالىق قيىندىقتار تۋدىردى، دەگەنمەن ءبىز ونى تولىق كەسىپ الىپ تاستادىق. وتا ناتيجەسى دە تاڭقالدىردى، وپەراسيادان كەيىن ساۋساقتاعى عانا ەمەس، شىنتاق، يىق پەن جاۋىرىننىڭ اۋىرعانى دا بىردەن باسىلدى. ساۋساعىنىڭ ۇشىنا بىردەڭە ءتيىپ كەتسە جانى كوزىنە كورىنىپ، جىلدار بويى سونىڭ زاردابىن تارتىپ كەلگەن پاسيەنتتىڭ قۋانىشىندا شەك جوق»، - دەيدى 40 جىلدىق ءوتىلى بار تاجىريبەلى نەيروحيرۋرگ ءالىمحان حاليموۆ.
ايتۋىنشا، باررە-ماسسون ىسىگى – سيرەك كەزدەسەتىن دەرتتىڭ ءبىرى. ول 20 مەن 50 جاس ارالىعىنداعى ناۋقاستاردىڭ 1-5 پروسەنتىندە عانا بولادى ەكەن. تەرىنىڭ تامىر شۋماقتارىنان قۇرالاتىن ىسىك ادەتتە، ساۋساقتىڭ تىرناق بولىگىنە شىعادى، دەيدى مامان.
تاعى ءبىر ايتا كەتەرلىگى، بۇل دەرتتى انىقتاپ، ناقتى دياگنوز قويۋ قيىن. سيرەك كەزدەسەتىندىكتەن ءارى وزىنە ءتان بەلگىلەرىنە بايلانىستى كەش، پايدا بولعان ساتتەن باستاپ شامامەن 7 جىلدان كەيىن عانا انىقتالىپ جاتادى. الەمدە ناقتى دياگنوزى 40 جىلدان كەيىن قويىلعان جاعدايلار دا بار، سوندىقتان باررە-ماسسون ىسىگىنىڭ دياگنوستيكاسى كۇردەلى پروبلەما بولىپ قالىپ وتىر، دەيدى مامان.