دانيادا العاش رەت قاسيەتتى قۇرانعا قۇرمەتسىزدىك كورسەتكەن ەكى ادامنىڭ ۇستىنەن سوت پروسەسى باستالدى.
بۇل جايىندا islam.kz پورتالى yeniasir.com.tr اقپارات كوزىنە سىلتەمە جاساي وتىرىپ ءمالىم ەتەدى، دەپ حابارلايدى aqshamnews.kz.
كوپەنگاگەن پروكۋراتۋراسىنىڭ جازباشا وتىنىشىندە ايتىلعانداي، العاش رەت دانيانىڭ قىلمىستىق كودەكسىنە سايكەس قاسيەتتى قۇرانعا قارسى ارەكەت ەتكەن ەكى ادامنىڭ ۇستىنەن ءىس قوزعالعان. 2024 جىلدىڭ ماۋسىم ايىنىڭ 15ء-ى كۇنى بورنحولم ارالىندا وتكەن اكسيا بارىسىندا قاسيەتتى قۇرانعا قۇرمەتسىزدىگىمەن كوزگە تۇسكەندەرگە قاتىستى ءىس كارتوتەكاسى بورنحولمدەگى سوتقا جىبەرىلگەنى جانە سوت تالقىلاۋىنىڭ كەستەسى انىقتالماعانى ايتىلعان حابارلامادا.
پىكىرلەرى مالىمدەمەگە ەنگىزىلگەن كوپەنگاگەن پروكۋرورى ليس لوتتە نيلاس: «ءبىزدىڭ بەرگەن باعامىز تۇرعىسىنان قوعامدىق ورىندا قۇرانعا قارسى ورىنسىز ارەكەتتەر جاسالدى جانە كوپتەگەن ادامدار وسى وقيعانىڭ كۋاسى بولدى. وقيعالار Facebook الەۋمەتتىك جەلىسىندە جاريالانىپ، ودان دا كەڭ اۋديتورياعا جەتتى»، دەپ مالىمدەدى. پروكۋرور كۇدىكتىلەردىڭ زاڭعا قايشى ارەكەتى دالەلدەنسە، ولارعا ايىپپۇل سالىناتىنىن جەتكىزدى.
وسى ورايدا 2023 جىلدىڭ جەلتوقسان ايىنىڭ 7ء-ى كۇنى دانيادا قاسيەتتى قۇراندى جانە وزگە دە كيەلى كىتاپتاردى ورتەۋگە تىيىم سالۋ قاراستىرىلعان زاڭ جوباسىنىڭ قابىلدانعانىن ايتا كەتپەكپىز. اتالعان زاڭ تالاپتارىن ەلەمەگەندەر ەكى جىلعا دەيىن باس بوستاندىعىنان ايىرىلادى نەمەمەسە ءىرى مولشەردە ايىپپۇل سالىنادى.