الماتىدا تەاتر جانە كينو اكتەرى، مەملەكەتتىك سىيلىقتىڭ يەگەرى ءاشىموۆ ساعي ءاسانالى ۇلىنىڭ قۇرمەتىنە مەموريالدىق تاقتا اشىلدى
الماتىدا تەاتر جانە كينو اكتەرى، مەملەكەتتىك سىيلىقتىڭ يەگەرى ءاشىموۆ ساعي ءاسانالى ۇلىنىڭ قۇرمەتىنە ارنالعان مەموريالدىق تاقتا سالتاناتتى تۇردە اشىلدى. ءىس-شاراعا الماتى قالاسى اكىمىنىڭ ورىنباسارى ارمان قىرىقبايەۆ، قازاقستاننىڭ ەڭبەك ەرى، حالىق ءارتيسى، مەملەكەتتىك سىيلىعىنىڭ لاۋرەاتى ءاسانالى ءاشىموۆ، قازكسر حالىق ءارتيسى، قازكسر ەڭبەك سىڭىرگەن ونەر قايراتكەرى ەسمۇحان وبايەۆ، م. اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن جۋاسبەك، قازاقستاننىڭ ەڭبەك سىڭىرگەن قايراتكەرى بولات ءابدىلمانوۆ، قازكسر ەڭبەك سىڭىرگەن ءارتيسى جاننا قۋانىشيەۆا، «قازاقفيلم» اق پرەزيدەنتى ازامات ساتىبالدى جانە ت.ب. قاتىستى، دەپ حابارلايدى Almaty-akshamy.kz
ساعي ءاشىموۆ 1961 جىلى 18 شىلدەدە دۇنيەگە كەلگەن. «ءوز ءدانىڭدى ءوسىر» (1978)، «مازاسىز بالالارى» (1980)، «ويلانۋعا ءبىر اي» (1981)، «قارالى سۇلۋ» (1982)، «ايسۇلۋ جايلى اڭىزداعى» (1990)، «فارا» (1999) سىندى فيلمدە 20-دان استام رولدە ويناعان. 1982-1984 جىلدارى اكەسى ءاسانالى ءاشىموۆتىڭ «شوقان ءۋاليحانوۆ» اتتى 4 سەريالى تەليەۆيزيالىق فيلمىندە شوقاننىڭ ءرولىن سومدايدى. ساعي ءاشىموۆ 1999 جىلى 18 قازاندا «توعىسقان تاعدىرلار» اتتى العاشقى قازاقستاندىق سەريالدىڭ ءتۇسىرىلىمى كەزىندە قايتىس بولدى.
«قۇيرىقتى جۇلدىزداي جارق ەتتى دە، جوق بولدى». بۇل ءسوزدى ايتقاندا ءيىسى قازاقتىڭ ويىنا ەكى ادام ورالادى. ءبىرى – شوقان ءۋاليحانوۆ. ەكىنشىسى – سول شوقاننىڭ بەينەسىن ەكرانعا اكەلگەن ساعي ءاشىموۆ. ساعي سومداعان ءار كەيىپكەر ىشكى تازالىعىمەن، شىنايىلىعىمەن استاساتىن. ساعيدىڭ كينوفيلمدەردە سومداعان رولدەرى ءارقاشان ەل جادىندا قالاتىنى ءسوزسىز. ومىرگە الۋ ءۇشىن ەمەس، بەرۋ ءۇشىن كەلگەن ازامات. دوسىنا، ەلىنە، جەرىنە، وتباسىنا، بالا-شاعاسىنا نۇر بوپ كەلگەن ادام ەدى. ءبىراق سول نۇرىمىز ەرتەرەك ءسوندى»، - دەدى اشىلۋ سالتاناتىندا الماتى قالاسى اكىمىنىڭ ورىنباسارى ارمان قىرىقبايەۆ.
مەموريالدىق تاقتا ورناتىلعان عيماراتتىڭ مەكەنجايى: دوستىق داڭعىلى، 40 (قابانباي باتىر كوشەسىنىڭ قيىلىسى).