كەمەل شاعىن اۋدانىنداعى جاڭا ينجەنەرلىك جەلىلەر 20 مىڭنان استام ابونەنتتى تۇراقتى ەلەكترمەن قامتاماسىز ەتەدى، دەپ حابارلايدى Almaty-akshamy.kz
الماتى اكىمى ەربولات دوسايەۆ جۇمىس ساپارى بارىسىندا جەتىسۋ اۋدانىنىڭ تۇرعىندارىمەن كەزدەسىپ، ينجەنەرلىك كوممۋنيكاسيالاردىڭ دايىندىق دەڭگەيىن تەكسەردى، ولاردى رەكونسترۋكسيالاۋ بيىل جەلتوقسان ايىندا اياقتالۋعا ءتيىس.
تۇرعىنداردى تۇراقتى ەلەكترمەن قامتاماسىز ەتۋ اكىمدىك جۇمىسىنىڭ ماڭىزدى باعىتى. قالاداعى جەلىلەردى جاڭعىرتۋدى كەمەل شاعىن اۋدانىندا 2022 جىلدىڭ ساۋىرىنەن باستاپ «EC Energy Qazaqstan» ج ش س مەردىگەرلىك ۇيىمى جۇرگىزىپ كەلەدى.
بيىل 7 قىركۇيەكتە حالىقپەن كەزدەسۋدە قالا باسشىسىنا ءالقيسسا، وكتيابرسكايا، پەرەكرەستنايا، اقسۋات كوشەلەرىنىڭ تۇرعىندارى جۇگىنگەن ماسەلەنىڭ شەشىمى باياندالدى. بۇل اۋماقتارداعى ۇيلەر ەلەكترمەن جابدىقتاۋ جەلىلەرىن جۇرگىزۋ جوباسىنا كىرگەن جوق. الماتى اكىمىنىڭ تاپسىرماسىمەن اتالعان كوشەلەردە تۇراتىن 110 ابونەنت كوممۋنيكاسياعا قوسىلادى.
كەمەل شاعىن اۋدانىنداعى ينجەنەرلىك جەلىلەردى قايتا قۇرۋ اياسىندا 1200-دەن استام تەمىربەتون تىرەكتەرى، 14 ترانسفورماتورلىق قوسالقى ستانسيانىڭ 10-ى ورناتىلدى، 30 كم-دەن استام اۋە جانە 8 كم-گە جۋىق كابەل جەلىلەرى تارتىلدى، دەپ حابارلادى قالا باسشىسىنا ەنەرگەتيكا جانە سۋمەن جابدىقتاۋ باسقارماسىنىڭ باسشىسى تالعات مالىبايەۆ. بۇل جۇمىستى 2023 جىلدىڭ جەلتوقسانىندا تولىق اياقتاۋ جوسپارلانعان.
ينجەنەرلىك جەلىلەردى قايتا جاڭارتۋ كەمەل شاعىن اۋدانىنىڭ 20 مىڭنان استام تۇرعىنىن جالپى قۋاتى 12 706،5 كۆت ەلەكترمەن جابدىقتاۋمەن قامتاماسىز ەتۋگە مۇمكىندىك بەرەدى.
ەربولات دوسايەۆ ءتيىستى باسقارما باسشىلىعىنا كوممۋنيكاسيا تارتۋ ماسەلەسىن باقىلاۋدا ۇستاۋدى جانە بەلگىلەنگەن مەرزىمدەرگە سايكەس ينجەنەرلىك ينفراقۇرىلىمدى پايدالانۋعا بەرۋدى قامتاماسىز ەتۋدى تاپسىردى. ينجەنەرلىك جەلىلەردى قايتا قۇرۋدى اياقتاۋ – بۇل اۋدان تۇرعىندارى ءۇشىن تۇيتكىلدىڭ تۇپكىلىكتى شەشىمى.
الماتى اكىمى جۇمىس ساپارى بارىسىندا مادەنيەت ءۇيى مەن كىتاپحاناعا دا باردى. تۇرعىندار قالا باسشىسىنا شاعىن اۋداندى جوسپارلى تۇردە دامىتقانى ءۇشىن العىس ايتىپ، جاڭا مادەنيەت ءۇيىنىڭ جاستاردىڭ ورداسىنا اينالعانىن اتاپ ءوتتى. ەربولات دوسايەۆ، ءوز كەزەگىندە، مادەنيەت ۇيىنە جاقىن ماڭنان ساياباق سالۋدىڭ جوسپارلانعانىن ايتتى.
بۇعان قوسا، قالا باسشىسى كەمەل شاعىن اۋدانىنىڭ تۇرعىندارىمەن كەزدەسىپ، جاڭا مەكتەپ سالۋ، جول توسەمىن جوندەۋ تۋرالى سۇراقتارعا جاۋاپ بەردى. ەربولات دوسايەۆ №80 مەكتەپتىڭ قۇرىلىسى بويىنشا جۇمىستار اياقتالىپ جاتقانىن، وندا وقۋ جاڭا جىلدىق مەرەكەلەردەن كەيىن باستالۋى مۇمكىن ەكەنىن اتاپ ءوتتى. جول توسەمىن قالپىنا كەلتىرۋ «سۇڭقار» مەردىگەرلىك كومپانياسىنىڭ كەپىلدىگى بويىنشا جۇزەگە اسىرىلادى. سونىمەن قاتار، قالا باسشىسى شاعىن اۋدان تۇرعىندارىنا جالپى ۇزىندىعى 68،9 كم سۋمەن قامتاماسىز ەتۋ جانە سۋ تاراتۋ جەلىلەرىنىڭ قۇرىلىسى تۋرالى ايتىپ، گامارنيك كوشەسىنەن سولتۇستىك اينالما كوشەسىنە دەيىن ەسەنتاي وزەنىنىڭ بويىنداعى ساياباق ايماعىن اباتتاندىرۋ جۇمىستارىنىڭ بارىسى تۋرالى باياندادى.