الماتىلىق قۇتقارۋشىلار جىل باسىنان بەرى قالانىڭ 117 تۇرعىنىنىڭ ءومىرىن ساقتاپ قالدى. سونىمەن قاتار، الماتى قالاسى تج دەپارتامەنتىنىڭ ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ كۇشىمەن ءقاۋىپتى ايماقتاردان 520 ادام ەۆاكۋاسيالاندى، 449 ءورت ءوشىرىلدى، دەپ حابارلايدى Almaty-akshamy.kz
الماتى قالاسىنىڭ ءورت سوندىرۋشىلەرى، قۇتقارۋشىلارى، ۇشقىشتارى، دارىگەرلەرى، كينولوگتارى، پسيحولوگتارى وسىنداي جەتىستىكپەن وزدەرىنىڭ كاسىبي مەرەكەلەرىن اتاپ ءوتىپ جاتىر. بۇگىن، 19 قازان كۇنى قازاقستاندا قۇتقارۋشىلار كۇنى اتاپ وتىلەدى. ءدال وسى كۇنى 1995 جىلى توتەنشە جاعدايلار جونىندەگى مەملەكەتتىك كوميتەت قۇرىلدى، ال 2008 جىلدان باستاپ قازاقستانداعى كاسىبي مەرەكەلەردىڭ تىزىمىنە كىرەدى.
مەگاپوليستە توتەنشە جاعدايلار كەزىندەگى ىس-ارەكەتتەر تۋرالى قالا تۇرعىندارىن قۇلاقتاندىرۋعا ەرەكشە نازار اۋدارىلادى. مىسالى، تجد قالالىق كۋرستارىندا تابيعي جانە تەحنوگەندىك سيپاتتاعى تج ءقاۋپى مەن تۋىنداۋى كەزىندەگى ءجۇرىس-تۇرىس پەن العاشقى مەديسينالىق كومەك كورسەتۋ ەرەجەسىنە 1 263 ادام وقىتىلدى.
ءبىلىم باسقارماسىمەن بىرلەسىپ 270 مىڭنان استام وقۋشىنى قامتيتىن 124 ينتەراكتيۆتى ساباق وتكىزىلدى. ۇيىمدار 9 364 جاتتىعۋ وتكىزدى.
اپاتتار مەديسيناسى ورتالىعى مەن ق ر قىزىل جارتى اي قوعامىنىڭ ماماندارىن جۇمىلدىرا وتىرىپ، 67 مىڭ ادام ستاسيونارلىق تۇردە وقۋدان ءوتىپ، 279 كوشپەلى ساباق وتكىزىلدى.
قازاقستاندىق قۇتقارۋشىلار ەلىمىزبەن بىرگە، شەتەلدەردە دە توتەنشە جاعدايلاردىڭ الدىن الۋ جانە جويۋ بارىسىندا قۇزىرەتتىلىگى مەن جەدەلدىگىن بىرنەشە رەت دالەلدەدى. مىسالى، وتاندىق ماماندار تۇركيا رەسپۋبليكاسىنداعى جويقىن جەر سىلكىنىسىنەن كەيىن زارداپ شەككەندەرگە شۇعىل كومەك كورسەتۋگە قاتىستى. ايتا كەتەيىك، بيىل كوكتەمدە الماتى قالاسى بويىنشا ق ر تجم اپاتتار مەديسيناسى ورتالىعىنىڭ دارىگەرى – فيليال باسشىسى جازىلباي قوزىباحوۆ قىزمەتتىك بورىشىن وتەۋ كەزىندە جانقيارلىق ەرلىك كورسەتىپ، «ەرلىگى ءۇشىن» مەدالىمەن ماراپاتتالدى.
«تۇركيادا جۇمىس ىستەگەن كەزدە الماتىلىق قۇتقارۋشىلار ۇلكەن تاجىريبە الدى، ول قاجەت بولعان جاعدايدا باسقا ەلدەردە قولدانىلادى. سول كەزدە تۇرىك ارىپتەستەرى الماتىدا تۇرىك قۇتقارۋشىلارىن وقىتۋدى ۇسىندى، ماماندارىن جىبەرۋگە دايىن ەدى. بۇل ارينە، بارلىعىمىز ءۇشىن قيىن جاعدايدا جەدەل جۇمىس ىستەۋگە جانە قاجەت بولعان كەزدە ۋاقىتىلى كومەك كورسەتۋگە ىنتالاندىرۋ. مەن ءوزىم دارىگەرلەر وتباسىندا ءوستىم، سوندىقتان بۇل ءىس مەنىڭ ءومىرىم»، - دەيدى فيليال باسشىسى – الماتى قالاسى بويىنشا ق ر تجم اپاتتار مەديسيناسى ورتالىعىنىڭ دارىگەرى جازىلباي قوزىباحوۆ.
بارلىق تابيعي جانە تەحنوگەندىك سيپاتتاعى تج-نىڭ 80%-دان استامى ءورت. ءورت ءسوندىرۋشى ماماندىعى ەڭ ءقاۋىپتى ماماندىقتاردىڭ ءبىرى. سولاردىڭ ءبىرى - №1 مامانداندىرىلعان ءورت ءسوندىرۋ ءبولىمىنىڭ ءورت ءسوندىرۋشى-قۇتقارۋشىسى ءادىل داۋرەنقۇلوۆ. ءبىر جىل بۇرىن ول مۇمكىندىگى شەكتەۋلى ەكى جاسار بالانى وتقا ورانعان پاتەردەن الىپ شىقتى. سونىمەن قاتار، قازاقستاندىق سپورتشى ارداق نازاروۆ ءوزىنىڭ Instagram پاراقشاسىنا بولعان وقيعا تۋرالى جازىپ، قۇتقارۋشىلاردىڭ ىس-ارەكەتتەرىنە تاڭدانىس ءبىلدىردى. كەيىن بالانى قۇتقارۋ كەزىندە كورسەتكەن ەرلىگى مەن كاسىبيلىگى ءۇشىن قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ ەرجۇرەك قۇتقارۋشىعا «ەرلىگى ءۇشىن» مەدالىن تابىستادى.
«ماماندىعىمدى ماقتان تۇتامىن. بالا كەزىمنەن ادامدارعا كومەكتەسۋ ءۇشىن فورما كيۋدى ارماندادىم. مەن ءۇشىن جاۋاپتى ميسسيا - ادام ءومىرىن قۇتقارۋ»، - دەيدى ءادىل داۋرەنقۇلوۆ.
الماتىنىڭ اۆاريالىق-قۇتقارۋ قىزمەتىندە بارلىعى 1،5 مىڭنان استام ادام جۇمىس ىستەيدى. ءوز ءومىرىن قاتەرگە تىگە وتىرىپ، ولار ۋاقىتپەن ساناسپاي ءورتتى سوندىرەدى، تابيعي اپاتتىڭ سالدارىمەن كۇرەسىپ، ءتۇرلى جاعدايدا ادامداردىڭ ومىرىنە اراشات ۇسەدى.