بۇل تۋرالى قۋاندىق بيشىمبايەۆتىڭ بۇرىنعى ايەلى Youtube-تە بەينەجازبا جاريالادى.
نازىم قاحارمان بيشىمبايەۆتار وتباسى اليمەنت تولەۋدەن تولىق باس تارتاتىنىن مالىمدەدى، دەپ حابارلايدى aqshamnews.kz
ونىڭ ايتۋىنشا، بيىل ۇلى كارىمنىڭ مەكتەپتەگى وقۋ اقىسى بويىنشا ءۇش ترانشتىڭ ەكەۋى تولەنبەگەن.
"قۋاندىق پەن ونىڭ وتباسى ونى تولەگەن جوق. بىلتىر دەمالىستىڭ ەشقايسىسى دا تولەنبەدى. سول سياقتى پسيحولوگتىڭ قىزمەتى دە تولەنگەن جوق. باسىمىزدان اۋىر پسيحولوگيالىق تراۆما وتكەرگەندىكتەن، پسيحولوگكە ءجيى جۇگىندىك. مەن بارلىق تولەگەن سوما تۋرالى اقپاراتتى ادۆوكات عازىمجانوۆقا جىبەرىپ وتىردىم. 1،5 جىل ىشىندە ۇلكەن سوما شىقتى. الايدا ولار ەشقانداي جاۋاپ بەرگەن جوق. دەنساۋلىق تاقىرىبىن كوتەرمەي-اق قويايىن. سەبەبى ەشبىر دارىگەردىڭ قىزمەتى، دارۋمەندەر مەن ءدارىنىڭ قۇنى تولەنگەن جوق. الايدا وسىنداي كۇيزەلىستىڭ زاردابىن ءتۇسىنىپ وتىرعان شىعارسىزدار. مەن مۇندا بارلىق شىعىن كولەمىنە توقتالىپ وتىرعان جوقپىن. 2020 جىلى اجىراسقان كەزدە اليمەنت تۋرالى كەلىسىم جاسالعان بولاتىن"، - دەدى ول ءوزىنىڭ Youtube-ارناسىنداعى جازبادا.
سوزىنشە، اجىراسقان كەزدە قۋاندىق بيشىمبايەۆتا اليمەنتتى تولەمەۋ مۇمكىندىگى بولدى. سەبەبى نازىم قاحارمان ونى اتا-انا قۇقىعىنان ايىرۋ تۋرالى ءوتىنىش بەرگەن.
"الايدا ول سوتتا جاۋاپكەرشىلىكتى الىپ، ءوزىنىڭ مىندەتتەرىن ورىندايتىنىن مالىمدەدى. وكىنىشكە قاراي، اليمەنت تۋرالى ەسكە سالىپ وتىرۋ كەرەك. مەن وسى ماسەلە تۋرالى بايان اتتى ادۆوكاتقا حابارلاسىپ وتىردىم. مىسالى، وسى ۆيدەو تاسپالانعان 28 ناۋرىز كۇنى وسى ناۋرىز ايى بويىنشا اليمەنت ءالى تۇسپەدى. ولار وتكەن جىلدىڭ قاراشا-جەلتوقسان ايلارىندا اليمەنتتى جۇيەلى تۇردە اۋدارىپ وتىردى"، - دەدى ول.
ەكس-مينيستردىڭ بۇرىنعى جۇبايى 30 ناۋرىز كۇنى وعان بيشىمبايەۆتار وتباسىنىڭ ادۆوكاتى حابارلاسقانىن ايتتى. سوزىنشە، ادۆوكات ولاردىڭ اليمەنت تولەۋدەن تولىق باس تارتاتىنىن مالىمدەگەن.
"وسىعان دەيىن ءابيۋزدىڭ تىكەلەي جاسالىنبايتىنىن، ول ءاردايىم ۇرىپ-سوعۋ دەگەندى بىلدىرمەيتىنىن ايتقان ەدىم. بۇل مانيپۋلياسيا دا بولۋى مۇمكىن"، - دەدى نازىم قاحارمان.