مەملەكەت باسشىسى قاسىم-جومارت كەمەل ۇلى توقايەۆ ۇلتتىق قۇرىلتايدىڭ IV وتىرىسىندا ەل دامۋىنىڭ ستراتەگيالىق باعىتتارىن ايقىنداپ، ءبىرقاتار ماڭىزدى باستامالاردى جاريالاعان بولاتىن. ەندى وسى باستامالاردى جۇزەگە اسىرۋعا ارنالعان كەشەندى جوسپار مەملەكەت باسشىسىنىڭ قول قويۋىمەن بەكىتىلدى.
53 تارماقتان تۇراتىن بۇل قۇجات – پرەزيدەنت اكىمشىلىگى مەن ۇكىمەتتىڭ بىرلەسىپ ازىرلەگەن جۇيەلى جوسپارى. ول تەك مەملەكەتتىك ورگاندارعا عانا ەمەس، بۇكىل قوعامعا ارنالعان ناقتى باعدار بولىپ تابىلادى.
اتالعان قۇجاتتا گۋمانيتارلىق جانە الەۋمەتتىك-ەكونوميكالىق باعىتتار قامتىلىپ وتىر.
گۋمانيتارلىق باستامالار اياسىندا:
-
«قازاقستان بالالارى» اتتى ءبىرىڭعاي باعدارلاما ازىرلەنەدى؛
-
جاڭا ىشكى ساياسات تۇجىرىمداماسى قابىلدانادى؛
-
2026-2028 جىلدارعا ارنالعان ناشاقورلىق پەن ەسىرتكى بيزنەسىنە قارسى كۇرەستىڭ كەشەندى جوسپارى دايىندالادى؛
-
ۇلتتىق سيفرلىق ارحيۆ قۇرىلىپ، تاريحي مۇرامىز زاماناۋي فورماتتا ساقتالادى؛
-
تەاتر ونەرىن دامىتۋ ماقساتىندا وڭىرلەردە جاڭا تەاترلار سالىنىپ، ۇلتتىق تەاترلارعا قولداۋ كورسەتىلەدى؛
-
اباي ينستيتۋتىنىڭ شەتەلدە اشىلۋى – ۇلتتىق مادەنيەتتى حالىقارالىق دەڭگەيدە ىلگەرىلەتۋدىڭ ماڭىزدى قادامى بولماق؛
-
بيولوگيالىق ءارالۋاندىقتى قورعاۋعا ارنالعان حالىقارالىق قور قۇرىلادى.
ال الەۋمەتتىك-ەكونوميكالىق سالالاردا:
-
«جايلى مەكتەپ» جوباسى جالعاسىپ، ءۇش جىلدا 1300 مەكتەپ جاڭعىرتىلادى؛
-
ەرەكشە قاجەتتىلىگى بار جاندارعا ارنالعان وڭالتۋ ورتالىقتارى ءار وبلىس ورتالىعىندا اشىلادى؛
-
وڭىرلەردى دامىتۋ تۇجىرىمداماسىنا جاڭا تاسىلدەر ەنگىزىلەدى؛
-
استانا–ارقالىق–تورعاي–ىرعىز باعىتىمەن ترانسكاسپيي حالىقارالىق كولىك دالىزىنە شىعاتىن اۆتوجولدار جاڭعىرتىلادى، ارقالىقتاعى اۋەجاي قايتا قالپىنا كەلتىرىلىپ، جاڭا اەروۆوكزال كەشەنى سالىنادى؛
-
جىل سايىن 200-گە جۋىق ينۆەستيسيالىق جوبالار جۇزەگە اسادى.
بۇدان بولەك، شەكارا ماڭىنداعى اۋدانداردى دامىتۋ، عىلىم قالاشىقتارىن قۇرۋ، ەرەكشە قاجەتتىلىكتەرى بار بالالارعا كەشەندى قولداۋ كورسەتۋ، ۇەۇ مەن مەملەكەتتىك الەۋمەتتىك تاپسىرىستى رەتتەيتىن زاڭداردى قابىلداۋ جوسپارلانعان.
بۇل – پرەزيدەنتتىڭ ەل بولاشاعى ءۇشىن ۇسىنعان ناقتى قادامدارعا نەگىزدەلگەن ۇلتتىق دامۋ ستراتەگياسى. بارلىق سالاداعى وسىنداي جۇيەلى رەفورمالار قازاقستاننىڭ ۇزاق مەرزىمدى وركەندەۋىنە جول اشادى.