قازاقستان رەسپۋبليكاسىنىڭ تۋريزم جانە سپورت ءمينيسترى ەربول مىرزابوسىنوۆ مىسىر اراب رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى يبتيسسام راكحا حاسسان حانىممەن كەزدەستى.
كەزدەسۋ بارىسىندا ەكى ەل اراسىنداعى تۋريزم جانە سپورت سالاسىنداعى ىنتىماقتاستىق جايى تالقىلاندى، دەپ حابارلايدى aqshamnews.kz تۋريزم جانە سپورت مينيسترلىگىنە سىلتەمە جاساپ.
مينيستر ەربول مىرزابوسىنوۆ مىسىر مەن قازاقستان اراسىنداعى تاريحي جانە مادەني بايلانىستاردىڭ تەرەڭدە جاتقانىن اتاپ ءوتتى.
«ەلىمىزدىڭ اۋماعىندا ءتۋريزمنىڭ بارلىق دەرلىك تۇرلەرى جىلدان جىلعا دامىپ كەلەدى. تاريحي جانە زاماناۋي قالالار، ورمان، تاۋلار مەن كولدەردى قامتيتىن كەرەمەت تابيعاتىمىز بار. سوندىقتان مىسىرلىق تۋريستەرگە ەكوتۋريزم، ەتنوتۋريزم جانە ءتۋريزمنىڭ باسقا دا تۇرلەرىن ۇسىنا الامىز. وكىنىشكە قاراي، مىسىردان قازاقستانعا كەلەتىن تۋريستەر سانى ايتارلىقتاي تومەن. 2024 جىلى بەس مىڭعا جۋىق تۋريست قانا ەلىمىزگە كەلگەن. جالپى تۋريزم سالاسىنداعى ىنتىماقتاستىقتى ودان ءارى دامىتۋ جانە نىعايتۋ ءۇشىن مۇمكىندىك جەتكىلىكتى»، — دەدى مينيستر.
سونداي-اق ۆەدومستۆو باسشىسى مىسىرداعى تۋريستىك كومپانيالاردىڭ وكىلدەرىن 2025 جىلعى 23-25 ءساۋىر ارالىعىندا الماتى قالاسىندا وتەتىن حالىقارالىق تۋريستىك كورمەگە قاتىسۋعا شاقىردى. سونىمەن قاتار قوس تاراپ 2025 جىلعى جەلتوقساندا تۋريزم سالاسىنداعى ءوزارا تۇسىنىستىك تۋرالى مەموراندۋمعا قول قويۋدى جوسپارلاپ وتىر.
سپورت سالاسىندا دا ىنتىماقتاستىق ارتىپ كەلەدى. 2024 جىلى مىسىردا قازاقستان سپورتشىلارى حالىقارالىق جارىستارعا قاتىسىپ، ەكى ەل اراسىنداعى سپورتتىق بايلانىستاردى نىعايتۋعا ۇلەس قوسقان. سونىمەن قاتار بىلتىر استانا قالاسىندا وتكەن 5ء-شى دۇنيەجۇزىلىك كوشپەندىلەر ويىندارىنا مىسىر سپورتشىلارى قاتىسقانىن ەرەكشە اتاپ وتكەن ءجون.
كەزدەسۋ قورىتىندىسىندا تاراپتار بىرلەسكەن جوبالاردى دامىتۋعا جانە ۇزاق مەرزىمدى ىنتىماقتاستىقتى نىعايتۋعا دايىن ەكەندىكتەرىن مالىمدەدى. مينيستر يبتيسسام راكحا حاسسان حانىمنىڭ قازاقستانداعى ديپلوماتيالىق قىزمەتىنە تابىس تىلەپ، ەكى ەل اراسىنداعى سەرىكتەستىكتى نىعايتۋعا دەگەن تالپىنىسى ءۇشىن العىس ءبىلدىردى.