قوستاناي وبلىسىندا "تازا قازاقستان" ەكولوگيالىق باعدارلاماسىن جۇزەگە اسىرۋعا ارنالعان كەڭەيتىلگەن جيىن ءوتتى. اتالعان شارادا وبلىس اكىمى قۇمار اقساقالوۆ بۇل باستامانىڭ ۇلتتىق سانا-سەزىم مەن بولاشاق ۇرپاققا دەگەن قامقورلىقتىڭ كورىنىسى ەكەنىن اتاپ ءوتتى. بۇل تۋرالى Aqshamnews.kz سايتى حابارلايدى.
ايماق باسشىسى "تازا قازاقستان" باعدارلاماسىن مەملەكەت باسشىسى قاسىم-جومارت توقايەۆتىڭ ءوزى ۇسىنعانىن، ال بۇگىندە ول جالپىۇلتتىق سيپاتقا يە قۋاتتى ينفراقۇرىلىمدىق جوباعا اينالىپ كەلە جاتقانىن ايتتى. باعدارلاما تەك قالالارمەن شەكتەلمەي، شالعاي اۋىلداردى دا قامتي باستادى.
جيىندا وبلىس اكىمىنىڭ ورىنباسارى بەرىك تانجاريكوۆ العاشقى جارتىجىلدىقتاعى ناتيجەلەرمەن ءبولىستى. ونىڭ ايتۋىنشا، 85 مىڭ اۋلا اباتتاندىرىلىپ، 105 كوپقاباتتى ءۇي جوندەۋدەن وتەدى. ءۇش جىلدا 500-دەن استام ءۇي رەتكە كەلتىرىلگەن. سونىمەن قاتار، 1030 كوشە جوندەلىپ، 17،5 مىڭ كوشە شامى ورناتىلادى. 123 جاڭا بالالار جانە سپورت الاڭى سالىنادى. جاسىل جەلەك كولەمى 105 مىڭ بىرلىكتەن اسىپ، زاڭسىز قوقىس كولەمى ءۇش ەسەگە ازايعان.
وبلىستىڭ بارلىق اۋداندارىندا "جاسىل ەل" جاستار قوزعالىسى جۇمىس ىستەپ، "تازا اۋلا"، "ۇزدىك اۋىل" سەكىلدى بايقاۋلار وتكىزىلىپ كەلەدى. ماسەلەن، التىنسارين اۋدانىندا 12 اۋىل جارىقپەن قامتىلىپ، ساياباقتار اباتتاندىرىلسا، امانگەلدى اۋدانىندا كوكتەم ايلارىندا 285 توننا قوقىس شىعارىلىپ، 1200 اعاش ەگىلگەن. ءجىتىقارا اۋدانىندا جاساندى ينتەللەكت ارقىلى بەينەباقىلاۋ ەنگىزىلىپ، كۇن ەلەكتر ستانسيالارى ىسكە قوسىلدى.
بالالار مەن جاسوسپىرىمدەردىڭ باستامالارى دا نازاردان تىس قالمادى. زارەچنوە اۋىلىنان 11-سىنىپ وقۋشىسى انگەلينا بەلوسلۋدسيەۆا ەكوچەللەندجدەر مەن قالدىقتاردى بولەك جيناۋ باستاماسىن كوتەرسە، ۋزۋنكول اۋدانىنىڭ وقۋشىسى ارسەنيي بيبيك "مەنىڭ جايلى اۋلام" بايقاۋىنىڭ جەڭىمپازى اتاندى.
ەكولوگيالىق ءتارتىپ پەن باقىلاۋ باعىتىندا "ەكو پاترۋل" ۆولونتەرلىك قوزعالىسى بەلسەندى جۇمىس ىستەپ كەلەدى. ولار 100-دەن استام نىساندى تەكسەرىپ، 71 زاڭ بۇزۋشىلىق انىقتاعان. بۇل قوزعالىسقا قولداۋ رەتىندە وبلىس باسشىلىعى ماتەريالدىق جانە تەحنيكالىق كومەك كورسەتەتىنىن مالىمدەدى.
سونداي-اق، ءبىرقاتار اۋىلدار ءوز اۋماعىن اباتتاندىرۋدا بەلسەندىلىك تانىتىپ وتىر. سارىكول اۋدانىنىڭ سوروچينكا اۋىلىندا "اگرو-پاراسات" كومپانياسى تەك ءوز نىساندارىن ەمەس، بۇكىل اۋىلدى كوركەيتىپ جاتىر. توبىل قالاسىندا 600-دەن استام ءتارتىپ بۇزۋشى اكىمشىلىك جاۋاپكەرشىلىككە تارتىلعان.
جيىن سوڭىندا وبلىس اكىمى قۇمار اقساقالوۆ ورمان القاپتارىن دامىتۋ، چات-بوت جۇمىسىن جانداندىرۋ، جاستار مەن كاسىپكەرلەردى كەڭىنەن تارتۋ سياقتى ناقتى تاپسىرمالار بەردى. ميچۋرين ورمان القابىن دەمالىس ورنى رەتىندە دامىتۋعا ەرەكشە نازار اۋدارىلدى.
قۇمار اقساقالوۆتىڭ ايتۋىنشا، شىنايى ەكولوگيالىق مادەنيەت تەك كۇندەلىكتى تاجىريبەگە اينالعاندا عانا قالىپتاسادى.