«سيفرلىق ارميا» باعدارلاماسىن ىسكە اسادى
جەرگىلىكتى اسكەري باسقارۋ ورگاندارىن سيفرلاندىرۋ شەڭبەرىندە قارۋلى كۇشتەر باس شتابىنىڭ ۇيىمداستىرۋ-جۇمىلدىرۋ جۇمىستار دەپارتامەنتى مەملەكەتتىك قىزمەتتەردىڭ قولجەتىمدىلىگىن قامتاماسىز ەتۋ جانە اقپاراتتىق قاۋىپسىزدىكتى ارتتىرۋ بويىنشا اۋقىمدى جۇمىس جۇرگىزۋدە، دەپ حابارلايدى Almaty-akshamy.kz قازاقپارات-قا سىلتەمە جاساپ.
مەملەكەت باسشىسى قاسىم-جومارت توقايەۆ سيفرلاندىرۋدى ەلدىڭ باسەكەگە قابىلەتتىلىگىنىڭ باستى فاكتورلارىنىڭ ءبىرى دەپ اتادى. بۇل باعىتتا قارۋلى كۇشتەردە «سيفرلىق ارميا» باعدارلاماسىن ىسكە اسىرۋ بويىنشا ءىس-شارالار كەشەنى ىسكە اسىرىلۋدا. باسقارۋ جۇيەسىن اۆتوماتتاندىرۋ جانە اسكەري ماقساتتاعى اقپاراتتىق جۇيەلەردى ەنگىزۋ باسقارۋ ورگاندارىنىڭ قىزمەتىن بيۋروكراتياسىزداندىرۋعا، شەشىمدەر قابىلداۋدىڭ جەدەلدىگىن ارتتىرۋعا جانە سىبايلاس جەمقورلىق دەڭگەيىن تومەندەتۋگە ىقپال ەتەتىن بولادى.
وسىعان وراي، قورعانىس مينيسترلىگى جەكە قۇرامدى وقىتۋعا ەرەكشە نازار اۋدارىپ وتىر. وسىلايشا، ۇيىمداستىرۋ-جۇمىلدىرۋ جۇمىستارى دەپارتامەنتى مەملەكەتتىك قۇپيالاردى قورعاۋ بولىمشەلەرى باستىقتارىنىڭ مامانداردىڭ سيفرلىق قۇزىرەتتەرىن دامىتۋعا باعىتتالعان وقۋ-ادىستەمەلىك جيىندارىن وتكىزدى.
«ساباق بارىسىندا مەملەكەتتىك قۇپيالاردى قورعاۋ بولىمشەلەرىنىڭ باستىقتارى اقپاراتتى كريپتوگرافيالىق قورعاۋدىڭ باعدارلامالىق قۇرالىن پايدالانا وتىرىپ، جەرگىلىكتى اسكەري باسقارۋ ورگاندارىندا قۇجاتتاردى ەلەكتروندىق فورماتقا كوشىرۋدى ۇيىمداستىرۋ ءتارتىبىن ۇيرەندى. بۇل رەتتە وفلاين رەجيمىندە قىزمەتتىك مالىمەتتەردى بەرۋمەن قورعالعان بايلانىس پايدالانىلدى»، - دەلىنگەن اقپاراتتا.
مۇنداي ءتاسىل قۇجاتتاردىڭ قايتالانۋىن بولدىرمايدى، قاعاز قۇجات اينالىمىن بارىنشا ازايتادى جانە فەلدەگەرلىك جانە ارنايى پوشتا بايلانىسى ارنالارى ارقىلى جونەلتۋگە ارنالعان اقشالاي شىعىستاردى قىسقارتادى. سونىمەن بىرگە اقپارات الماسۋدىڭ تيىمدىلىگى ەداۋىر ارتادى. اقپاراتتى كريپتوگرافيالىق قورعاۋ قۇرالىن جاڭعىرتۋ جاقىن ارادا ونلاين رەجيمىنە وتۋگە مۇمكىندىك بەرەدى.
2020-2021 جىلدار ارالىعىندا قورعانىس مينيسترلىگى «سيفرلىق جەرگىلىكتى اسكەري باسقارۋ ورگانى» پيلوتتىق جوباسىن ىسكە اسىرعان بولاتىن. بۇل جوبا ءوزىنىڭ تيىمدىلىگىن دالەلدەدى. باسقا مەملەكەتتىك ورگانداردىڭ اقپاراتتىق جۇيەلەرىمەن ءتيىمدى ينتەگراسيانىڭ ارقاسىندا حالىق ءۇشىن مەملەكەتتىك قىزمەتتەردىڭ قولجەتىمدىلىگىن قامتاماسىز ەتۋگە ايتارلىقتاي قادام جاسالدى.