ارميانى زاماناۋي جاراقتاندىرۋ مەن جاۋىنگەرلىك ازىرلىكتى قولداۋدىڭ اسا ماڭىزدى فاكتور
قورعانىس ۆەدومستۆوسىنىڭ باسشىسى گەنەرال-پولكوۆنيك رۋسلان جاقسىلىقوۆ جۇمىس ساپارىمەن الماتىعا باردى. ساپاردىڭ نەگىزگى ماقساتى – قارۋلى كۇشتەر مەن وتاندىق قورعانىس-ونەركاسىپ كەشەنىنىڭ بىرلەسكەن قىزمەتىن جانداندىرۋ، دەپ حابارلايدى Almaty-akshamy.kz.
قورعانىس ءمينيسترىنىڭ جوندەۋ-قالپىنا كەلتىرۋ بازاسىندا اسكەري تەحنيكا، قارۋ-جاراق پەن باسقا دا اسكەرگە قاجەتتى ونىمدەر شىعاراتىن جانە قىزمەت كورسەتۋمەن اينالىساتىن كاسىپورىنداردىڭ باسشىلارىمەن كەزدەسۋى وتكىزىلدى. ولاردىڭ قاتارىندا «كيروۆ اتىنداعى ماشينا جاساۋ زاۋىتى» اق، «سكبت «گرانيت» ج ش س، «گرانيت-تالەس ەلەكترونيكس» ج ش س، «الاتاۋ «اسكب عتو» ج ش س، «الماتىەنەرگوسەرۆيس» ج ش س جانە «سەمەي ينجينيرينگ» اق بار. كەزدەسۋگە سونداي-اق يندۋستريا جانە ينفراقۇرىلىمدىق دامۋ مينيسترلىگىنىڭ وكىلدەرى دە قاتىستى.
قورعانىس ۆەدومستۆوسىنىڭ وكىلدەرىنە قارۋ-جاراق پەن اسكەري تەحنيكانى جوندەۋ بويىنشا سەحتاردىڭ وندىرىستىك قۋاتىنىڭ مۇمكىندىكتەرى كورسەتىلدى، سونداي-اق قارۋلى كۇشتەردىڭ قازىرگى كەزدەگى وتاندىق قورعانىس-ونەركاسىپتىك كەشەنىنىڭ كۇشىمەن ىسكە اسىرىلۋى مۇمكىن اسكەري ماقساتتاعى ونىمدەر مەن قىزمەتتەرگە دەگەن قاجەتتىلىكتەرى دە اتالىپ ءوتىلدى. ءوز كەزەگىندە كاسىپورىن باسشىلارى قازاق اسكەرىنىڭ سۇرانىستارىن ەسكەرە وتىرىپ، كورسەتەتىن قىزمەت سالاسىنا سايكەس بەلگىلى ءبىر جۇمىس ءتۇرىن ورىنداۋ جونىندە ۇسىنىستارىن دا ايتتى.
گەنەرال-پولكوۆنيك رۋسلان جاقسىلىقوۆ قارۋلى كۇشتەردىڭ وتاندىق قورعانىس-ونەركاسىپ كەشەنىمەن ءوزارا ءىس-قيمىلى ەل ءۇشىن ستراتەگيالىق ماڭىزى بار ەكەنىن اتاپ ءوتتى. بىرىنشىدەن، بۇل ارميانى زاماناۋي جاراقتاندىرۋ مەن جاۋىنگەرلىك ازىرلىكتى قولداۋدىڭ اسا ماڭىزدى فاكتورى. ەكىنشىدەن، بۇل وتاندىق ءوندىرىستى قولداۋ جانە دامىتۋ، جاڭا جۇمىس ورىندارىن اشۋ، دەمەك، قازاقستان ەكونوميكاسىنا ەلەۋلى ۇلەس قوسۋ دەدى.
كەزدەسۋ بارىسىندا ايقىندالعان بىرلەسكەن ىس-ارەكەتتى ءارى قاراي دامىتۋ ماسەلەسى جاقىن ارادا مۇددەلى مينيسترلىكتەر مەن ۆەدومستۆولاردىڭ قاتىسۋىمەن پىسىقتالاتىن بولادى.
جۇمىس ساپارى بارىسىندا قورعانىس ءمينيسترى جەتىگەندەگى اۆيابازاعا بارىپ، اسكەري ينفراقۇرىلىمدى جەتىلدىرۋ جانە نىسانداردى سالۋ جۇمىستارىنىڭ بارىسىمەن تانىستى. وندا شتاتتىق بولىمشەلەردىڭ كۇشىمەن اۆياسيالىق تەحنيكاعا، ۇشقىشسىز باسقارىلاتىن اپپاراتتارعا، توراپتار مەن اگرەگاتتارعا جوندەۋ جانە رەگلامەنتتىك قىزمەت كورسەتۋ جۇرگىزىلەتىن سەحتار كورسەتىلدى. مينيستر اسكەري وبەكتىلەردىڭ ديۆەرسياعا قارسى قاۋىپسىزدىگىنە، قارۋ-جاراق پەن وق-دارىلەردى ساقتاۋدى ۇيىمداستىرۋعا ەرەكشە نازار اۋداردى.
گەنەرال-پولكوۆنيك رۋسلان جاقسىلىقوۆ سونىمەن قاتار اۋە قورعانىسى كۇشتەرىنىڭ كىشى ماماندارىن دايارلايتىن وقۋ-جاتتىعۋ ورتالىعىنا بارىپ، دايارلىقتىڭ ۇيىمداستىرىلۋى مەن ساربازداردىڭ تۇرمىستىق جاعدايلارىن دا تەكسەردى. وندا مەرزىمدى قىزمەتتەگى جاۋىنگەرلەر بۇگىندە ەكونوميكانىڭ ناقتى سەكتورىندا دا سۇرانىسقا يە اسكەري ماماندىقتار بويىنشا التى اي بويى ءبىلىم الاتىنىن ايتا كەتكەن ءجون.