«رەزەڭكەدەن جاسالعان بولار» - الماتى حايۋاناتتار باعىنا كەلۋشىلەر ونداعى قولتىراۋىننىڭ راس - وتىرىگىنە كۇماندانىپ جاتادى.
وسىعان بايلانىستى الماتى زووباعىنىڭ الەۋمەتتىك جەلىسىندە قولتىراۋىننىڭ شىنايى ەكەنىن كورسەتەتىن ۆيدەوسى جاريالاندى، دەپ حابارلايدى Almaty-akshamy.kz
وندا از ۋاقىت قوزعالىسسىز تۇرعان قولتىراۋىننىڭ سالدەن كەيىن، قوزعالىپ بارا جاتقانىن كورۋگە بولادى. شىن مانىندە، بۇل جىرتقىش جانۋارعا ءتان قاسيەت. سوندىقتان وعان قاتتى جاقىنداۋ ءومىرىڭىز ءۇشىن ءقاۋىپتى ەكەنىن ەسكە سالعان ارتىق بولماس.
«شىنىندا دا، ول بىرنەشە ساعات بويى قيمىلداماي، قوزعالىسسىز جاتادى. ءبىز ەڭ ۇلكەن باۋىرىمەن جورعالاۋشى – كۋبالىق قولتىراۋىن تۋرالى ايتىپ وتىرمىز. وعان وزىنە ءتان ەرەكشە فيدەل دەگەن ات بەرىلدى. ول 1986 جىلى تۋعان، فيدەل بىزگە 2001 جىلى لاتۆيا ەلىنىڭ ريگا قالاسىنداعى حايۋاناتتار باعىنان اكەلىندى. ءقازىر ول 37 جاستا جانە ۇزىندىعى شامامەن 2،5 مەترگە جەتەدى. فيدەلدىڭ راسيونىندا سيىر ەتى، تاۋىق ەتى جانە بالىق بار. فيدەل اپتاسىنا ءبىر رەت، كەيدە ەكى اپتادا ءبىر رەت قورەكتەنەدى. سەبەبى، ءبىز تاماق ۇنەمدەيتىندىكتەن ەمەس، ول اپتا بويى قوزعالىسسىز جاتىپ، جەگەنىن قورىتادى. تابيعاتتا قولتىراۋىندار وتىرىقشى ءومىر سالتىن ۇستانادى جانە كۇندەلىكتى قورەكتەنبەيدى. مۇنداي ساتتەردە ونى ءبىزدىڭ كەلۋشىلەر سۋدا نەمەسە جاعالاۋدا تويىمدى تۇسكى استان كەيىن ءجيى كورەدى. قولتىراۋىندار تاماقتى كۇندەلىكتى جەپ، شامادان تىس قورەكتەنەتىن بولسا ول سەمىرىپ، جۇرەك، قان تامىرلارى مەن اسقازان-ىشەك جولدارىنىڭ اۋرۋلارى پايدا بولا باستايدى
قولتىراۋىندى ۇزاق باقىلاپ، وعان قاراپ تۇرساڭ اندا-ساندا كوزىن اشىپ-جۇمىپ، اۋزىن قاتتى اشىپ، جاۋىپ تۇراتىنىن كورۋگە بولادى.
قولتىراۋىنداردىڭ اسقازانىنا سۋدىڭ تۇسۋىنە جول بەرمەۋ ءۇشىن وڭەشتەرىن تاڭداي پەردەسى جاۋىپ تۇرادى. سونىڭ ارقاسىندا سۋدا ءجۇزىپ ءجۇرىپ جانۋارلارعا شابۋىل جاساعاندا اسقازانىنا سۋ تۇسپەيدى.
الماتى حايۋاناتتار باعىندا قولتىراۋىنداردىڭ ءۇش ءتۇرى بار: كۋبالىق، سيامدىق جانە كايمان قولتىراۋىنى. ءبىراز كۇندە ولار جىلى ءارى جايلى قىسقى تۇراقتارىنا ورنالاستىرىلادى.
ازىرگە، كۇزدىڭ جايماشۋاق كۇندەرىندە دالاداعى قورشاۋلاردا تۇرادى»، - دەگەن سيپاتتاما بەرىلگەن ۆيدەونىڭ تومەنگى جاعىندا.
قولتىراۋىنعا قالاي تاماق بەرىلەتىنىن ءار سارسەنبى كۇنى ساعات 14.00-دەن 15.00-گە دەيىن بارىپ كورۋگە بولادى.