قاسيەتتى رامازان – مۇسىلمان بالاسىن رۋحاني تاربيەلەپ، قاراپايىمدىلىق پەن كىشىپەيىلدىككە باۋلىپ، داۋلەتتى مەن مۇقتاجدىڭ اراسىن جاقىنداستىرا تۇسەتىن اي. بۇل ايدا جاسالاتىن ءاربىر جاقسىلىقتىڭ ساۋابى ەسەلەنەدى. سونداي-اق مۇقتاجعا قول ۇشىن بەرۋ – ۇلكەن ساۋاپتى ءىس. سول ساۋاپتى ءىستىڭ ءبىرى – اۋزى بەرىك جانعا اۋىزاشار بەرۋ.
وكىنىشكە قاراي، سوڭعى كەزدەرى ەلىمىزدەگى ءبىرقاتار مەيرامحانا، كافەلەر مەن ءدامحانالاردىڭ يەلەرى اۋىزاشار ءمازىرىنىڭ باعاسىن وتە جوعارى ۇسىنىپ، حالىق اراسىندا تۇسىنبەۋشىلىكتىڭ تۋىنداۋىنا سەبەپشى بولۋدا، دەپ حابارلايدى aqshamnews.kz ءمۇفتيات سايتىنا سىلتەمە جاساپ.
اسىل ءدىنىمىز اۋىزاشار داستارقانىندا اس تا توك ىسىراپقا جول بەرۋگە، داستارقان جاساۋدا باسەكەلەسۋدى قۇپتامايدى. ونداي ارەكەت ساۋاپقا ەمەس كۇناعا جەتەلەيدى. اۋىزاشار داستارقانى قاراپايىمدىلىققا نەگىزدەلۋى ءتيىس. قاسيەتتى قۇراندا: «... ىشىڭدەر، جەڭدەر، الايدا ىسىراپقا جول بەرمەڭدەر. ويتكەنى اللا ىسىراپ ەتۋشىلەردى جاقسى كورمەيدى» دەلىنگەن («اعراف» سۇرەسى، 31-ايات).
قازاقستان مۇسىلماندارى ءدىني باسقارماسى مەيرامحانا، كافەلەر مەن تاماقتانۋ ورىندارىنىڭ يەلەرىنە حالىققا قولجەتىمدى قاراپايىم اۋىزاشار ءمازىرىن ۇسىنۋعا شاقىرادى.
اللا تاعالا حالقىمىزعا ەكى دۇنيە باقىتىن ءناسىپ ەتىپ، قاسيەتتى رامازان ايىندا جاساعان ىزگى امالدارىمىزعا مول ساۋاپتان جازعاي. ءاۋمين!