وسى جىلدىڭ 6-8 ماۋسىم ارالىعىندا ەلىمىزدە قۇربان ايت مەرەكەسىنە وراي قازاقستان مۇسىلماندارى ءدىني باسقارماسى «Qurban 2025» رەسپۋبليكالىق قايىرىمدىلىق اكسياسىن ۇيىمداستىردى.
قمدب ءتوراعاسى، باس ءمۇفتي ناۋرىزباي قاجى تاعان ۇلىنىڭ باستاماسىمەن قۇرىلعان ارنايى رەسپۋبليكالىق شتاب قۇربان شالۋ راسىمدەرىن جۇيەلى تۇردە ۇيلەستىرىپ، بۇكىل ەل بويىنشا اۋقىمدى قايىرىمدىلىق جۇمىستارىن اتقاردى، دەپ حابارلايدى aqshamnews.kz.
قمدب مالىمەتىنشە، ازاماتتار قۇرباندىق شالۋ ءۇشىن QURBAN.MUFTYAT.KZ سايتى ارقىلى ونلاين تاپسىرىس بەرىپ، سونىمەن قاتار جەرگىلىكتى قاساپحانالاردا وفلاين تۇردە دە قۇربان شالۋعا مۇمكىندىك الدى.
قۇرباندىق شالۋ بارىسىندا رەسپۋبليكا كولەمىندە جالپى سانى 36 046 مال قۇرباندىققا شالىندى. اتاپ ايتقاندا، 31 906 باس قوي، 1 973 باس ەشكى، 2 119 ءىرى قارا جانە 48 تۇيە قۇرباندىققا شالىندى. قۇرباندىق ەتتەرى ارنايى قابىلداۋ پۋنكتتەرىنە جينالىپ، ءدىن قىزمەتكەرلەرى مەن ەرىكتىلەردىڭ قاتىسۋىمەن مۇقتاج جاندارعا ۇلەستىرىلدى.
قورىتا ايتساق، ەلىمىز بويىنشا قۇربان ايت كۇندەرى QURBAN.MUFTYAT.KZ سايتىنا 2149 تاپسىرىس بەرىلدى. رەسپۋبليكا بويىنشا 809 ادامنان قۇرالعان بىرنەشە شتاب ۇزدىكسىز جۇمىس اتقاردى.
ناتيجەسىندە 81 793 وتباسىعا قۇرباندىق ەتى جەتكىزىلىپ بەرىلدى. بۇعان قوسا، ارنايى سويىلعان مالدىڭ ەتتەرى ەلىمىزدەگى 1236 الەۋمەتتىك مەكەمەگە – مۇمكىندىگى شەكتەۋلى جاندار قورلارىنا، زاعيپتار قوعامىنا، اۋرۋحانالار مەن قارتتار ۇيلەرىنە تاراتىلدى.