قازاقستان حالقى اسسامبلەياسىنىڭ عىلىمي-ساراپتامالىق كەڭەسى ەلدەگى ماڭىزدى قوعامدىق ماسەلەلەردى عىلىمي ساراپتاۋ، تالداۋ جانە ەتنوسارالىق كەلىسىمدى دامىتۋدا ۇلكەن ءرول اتقارادى. بۇل تۋرالى تاريح عىلىمدارىنىڭ كانديداتى، پروفەسسور، قحا مۇشەسى جانە الماتى قالاسىنىڭ عىلىمي-ساراپتامالىق توبىنىڭ وكىلى مەندىگانىم شايمەردەنوۆا وڭىرلىك كوممۋنيكاسيالار قىزمەتىنىڭ بريفينگىندە مالىمدەدى.
ونىڭ ايتۋىنشا، كەڭەس قۇرامىنا ءارتۇرلى سالاداعى عالىمدار مەن ماماندار كىرەدى. ولار ەلىمىزدىڭ بارلىق ءىرى قالالارىندا قۇرىلعان ساراپتامالىق توپتار اياسىندا جۇمىس ىستەيدى، ونىڭ ىشىندە الماتى دا بار.
پروفەسسوردىڭ ايتۋىنشا، كەڭەستىڭ باستى مىندەتتەرىنىڭ ءبىرى – ەتنوسارالىق كەلىسىمدى نىعايتۋ جانە مادەني ءوزارا ارەكەتتەستىكتى دامىتۋ. وسى ماقساتتا عىلىمي كونفەرەنسيالار، سەمينارلار مەن دوڭگەلەك ۇستەلدەر، قازاقستاندىق اۆتورلاردىڭ كىتاپتارىن تانىستىرۋ، عالىمدارمەن جانە جازۋشىلارمەن كەزدەسۋلەر وتكىزىلەدى.
«كەڭەس جوعارى وقۋ ورىندارىمەن تىعىز ىنتىماقتاستىقتا جۇمىس ىستەيدى. بۇل وقۋ ورىندارىندا قازاقستاننىڭ ءتىلى، مادەنيەتى جانە تاريحىن زەرتتەيتىن كافەدرالار قىزمەت اتقارادى. سونىمەن قاتار، عىلىمي-تالدامالىق جۇمىس جۇرگىزىلىپ، وقۋ ورىندارى مەن كىتاپحانالارعا تاراتىلاتىن ماتەريالدار جاريالانادى»، – دەدى ول.
كەڭەستىڭ ماڭىزدى باستامالارىنىڭ ءبىرى – ءارتۇرلى ەتنوستار مەن مادەني بىرلەستىكتەردى بىرىكتىرەتىن «دوستىق ءۇيى» جوباسى. ونىڭ اياسىندا حالىقتار اراسىنداعى دوستىق پەن ءوزارا تۇسىنىستىكتى نىعايتۋعا باعىتتالعان بىرلەسكەن ءىس-شارالار ۇيىمداستىرىلادى.