قازاقستاندىق ۆاكسينا ەلىمىزدە دە، شەتەلدە دە ۇلكەن سۇرانىسقا يە بولىپ وتىر.
كۇزگە قاراي جامبىل وبلىسىنداعى QazVac ۆاكسيناسىن شىعاراتىن زاۋىت ىسكە قوسىلادى. بۇل تۋرالى ق ر دەنساۋلىق ساقتاۋ ءمينيسترى الەكسەي سوي ايتتى، دەپ حابارلايدى Almaty-akshamy.kz.
«شىنىمەن دە قازاقستاندىق ۆاكسينا ەلىمىزدە دە، شەتەلدە دە ۇلكەن سۇرانىسقا يە بولىپ وتىر. ارينە، QazVac ۆاكسيناسىنىڭ تانىمالدىعىن ارتتىرۋ جانە ونى وزگە ەلدەرگە جەتكىزۋ جۇمىستارىن جۇرگىزۋ جوسپارلانعان. پروسەدۋرا ۇزاققا سوزىلادى. ەلدەردىڭ ۆاكسينانى ءوزارا مويىنداۋى، جەتكىزىلەتىن ەلدە تىركەلۋى قاجەت. بۇل جۇمىستاردى بىرتىندەپ باستايمىز. ءقازىر بۇل ۆاكسينانى الۋعا نيەت تانىتقان سەرىكتەستەردى ىزدەستىرىپ جاتىرمىز. بارلىق رەتتەۋشى قۇرالدار ىسكە قوسىلعان»، - دەدى مينيستر ورتالىق كوممۋنيكاسيالار قىزمەتىندەگى بريفينگ بارىسىندا.
الەكسەي سويدىڭ ايتۋىنشا، جامبىل وبلىسىنداعى QazVac ۆاكسيناسىن شىعاراتىن زاۋىتتىڭ قۇرىلىسى اياقتالۋعا جاقىن. زاۋىت ىسكە قوسىلعاننان كەيىن ىشكى جانە سىرتقى نارىقتى قاجەتتى ۆاكسينامەن قامتاماسىز ەتۋگە قاۋقارلى بولادى.
«زاۋىتتى ىسكە قوسۋ جانە جوندەۋ جۇمىستارى اياقتالدى. قۇرال-جابدىقتاردى تەكسەرۋ جۇمىستارى جۇرگىزىلىپ جاتىر. جامبىل وبلىسى اكىمدىگىنىڭ اقپاراتىنا سايكەس، رەگلامەنتكە بايلانىستى پروسەدۋرالار جۇرگىزىلۋ ۇستىندە. كۇزگە قاراي بۇل زاۋىت ىسكە قوسىلىپ، وندىرىستىك قۋاتىن بىرتىندەپ ارتتىرۋى ءتيىس»، - دەدى مينيستر.