ماماننىڭ ايتۋىنشا، ۆاكسينادان بۇرىن انتيدەنەلەرگە تەست جاساۋ ءتيىمسىز. ويتكەنى ولاردىڭ بولۋى ۆاكسيناعا اسەر ەتپەيدى.
الماتى قالاسى وڭىرلىك كوممۋنيكاسيالار قىزمەتى الاڭىندا وتكەن بريفينگتە اسفەندياروۆ اتىنداعى قازۇمۋ يممۋنولوگيا كافەدراسىنىڭ مەڭگەرۋشىسى ەلميرا بيتانوۆا قالا تۇرعىندارىن كوروناۆيرۋسقا قارسى ۆاكسينا تۋرالى جالعان اقپاراتقا سەنبەۋگە شاقىردى، دەپ حابارلايدى Almaty-akshamy.kz.
ەلميرا بيتانوۆا كوروناۆيرۋس ينفەكسياسىن جۇقتىرعان ادامداردىڭ ۆاكسينادان باس تارتپاۋ كەرەكتىگىن ايتتى. ۋاقىت وتە كەلە، COVID-19 انتيدەنەلەرىنىڭ سانى ازايىپ، ىندەتتى قايتا جۇقتىرۋ ءقاۋپى بار.
يممۋنولوگ ۆاكسينانىڭ ءبىرىنشى كەزەڭىنەن كەيىن يممۋنيتەت تومەندەپ، كوروناۆيرۋس ينفەكسياسىن جۇقتىرۋ ءقاۋپى ارتادى دەگەن اڭىزدى جوققا شىعاردى. سپيكەر جاناما اسەردىڭ قالىپتى ەكەنىن مالىمدەدى. ويتكەنى ۆيرۋستىڭ ءوزى ۇلكەن ءقاۋىپ توندىرەدى. سونداي-اق ۆاكسينا ونكولوگيا مەن باسقا دا گەنەتيكالىق اۋرۋلاردى تۋدىرمايدى. بۇل اقپارات جالعان.
ەلميرا بيتانوۆا ۆاكسينا جۇقپالى اۋرۋلارعا قارسى تۇراتىنىن ايتا كەلىپ، كەز كەلگەن ۆاكسينانىڭ قالاي اسەر ەتەتىنىن ءتۇسىندىردى.
«ۆاكسينا يممۋندىق جۇيەنى قالىپتاستىرۋ ءۇشىن جاسالعان. بۇل تۋا بىتكەن يممۋنيتەت سياقتى. ءارى قاراي ءاداپتيۆتى يممۋنيتەت قالىپتاسادى. بۇل تىزبەك انتيگەنمەن العاشقى كەزدەسۋدە اياقتالادى. سودان كەيىن جاد جاسۋشالارى پايدا بولادى. ولار بىرەگەي ءارى قوزدىرعىش تۇرىندە كەلەدى. بۇل ۆاكسينانىڭ ەكى كەزەڭىن بىلدىرەدى»، - دەدى ەلميرا بيتانوۆا.
ول ۆاكسينادان كەيىن تەمپەراتۋرا كوتەرىلسە، الاڭداماۋعا شاقىردى. ايتۋىنشا، بۇل يممۋندىق جاۋاپقا ءتان رەاكسيا.
يممۋنولوگ ۆاكسينا العان ادامدارعا سانيتارلىق-ەپيدەميولوگيالىق شارالاردى دا ساقتاۋ كەرەكتىگىن ەسكەرتتى. ويتكەنى ۆيرۋس ءالى بار.
جۋرناليستەردىڭ سۇراقتارىنا جاۋاپ بەرە وتىرىپ، ەلميرا بيتانوۆا اۋاسى تىعىز ءارى جەلدەتىلمەيتىن بولمەلەردەن اۋلاق بولۋ كەرەكتىگىن ەسكەرتتى. ۆيرۋس جابىق نەمەسە اۋا جەلدەتكىشى قوسۋلى بولمەدە تاسىمالدانۋ ءقاۋپى جوعارى ەكەنىن ايتتى.
«ۆيرۋستى ءبىر بولمەدەن ەكىنشى بولمەگە تاسىمالداۋعا بولادى. ويتكەنى جاپونياداعى لاينەرلەردە ادامدار ءوز كابينالارىنان شىقپاي-اق جۇقتىرعان»، - دەدى ەلميرا بيتانوۆا.
ونىڭ ايتۋىنشا، ءبىر بولمەگە ورناتىلعان جەلدەتكىش ۆيرۋس تۋدىرمايدى، ءبىراق ول سۋىق تيۋگە سەبەپ بولادى.
ەلميرا بيتانوۆا انتيدەنەلەر ماسەلەسىن دە قوزعادى. ونىڭ ايتۋىنشا، عىلىمي ورتادا وسى تاقىرىپ بويىنشا پىكىرتالاستار ءالى دە جالعاسۋدا. يممۋنولوگ انتيدەنەلەردىڭ سانىن ەسەپتەمەۋگە شاقىردى. ويتكەنى ولار تاۋسىلادى، سونىمەن بىرگە ادامنىڭ جاد جاسۋشالارى ساقتالادى.
«مەن قورعالۋىم كەرەك» قاعيداتىن ۇستانا وتىرىپ، سانيتارلىق نورمالاردى ساقتاپ، ۆاكسينا العان ءجون»، - دەدى دارىگەر.
ءسوز سوڭىندا ەلميرا بيتانوۆا سوڭعى ەكى عاسىردا ميلليونداعان ادامنىڭ، سونىڭ ىشىندە بالالاردىڭ ءومىرىن قيعان ءبىرقاتار ىندەتتەردى اتاپ ءوتتى. وسىعان بايلانىستى ول بارلىق جۇقتىرعان ادامداردان شەكتەۋ رەجيمىن بۇزباۋدى سۇرادى. بارشا جۇرتتى بەتپەردە تاعىپ، كوروناۆيرۋسقا قارسى ەكپەنى الۋعا شاقىردى.