كينوتانۋ - كينو تەورياسى مەن تاريحىن زەرتتەۋدى قامتيتىن ەرەكشە سالا. بۇل باعىتتاعى مامانداردىڭ ەڭبەگى اكادەميالىق ىزدەنىس پەن عىلىمي تالداۋعا، سونداي-اق پۋبليسيستيكالىق وي تولعامدارعا ۇلاسىپ جاتادى. ال 20-26 قىركۇيەك ارالىعىندا وتكەن IV الماتى حالىقارالىق كينوتانۋشىلار مەن كينوسىنشىلار فورۋمى اتالمىش ماماندار ءۇشىن وي الماسۋدىڭ كەڭ الاڭىنا اينالدى. فورۋم بارىسىندا تمد ەلدەرىنەن كەلگەن بەدەلدى تۇلعالار وزدەرىنىڭ اۆتورلىق دارىستەرىن وتكىزىپ، تاربيەلىك ءارى تانىمدىق ماڭىزى زور جۇمىستار اتقاردى.
وسى ماڭىزدى ءىس-شارا اياسىندا «قازىرگى مادەني كەڭىستىكتەگى كينوتانۋ سالاسىنىڭ ورنى مەن ماڭىزى قانداي؟» دەگەن ساۋالدىڭ تۋۋى زاڭدىلىق. بۇل سۇراقتىڭ جاۋابىن تابۋ ماقساتىندا ءبىز وتاندىق، قىرعىزستاندىق، رەسەيلىك جانە ازەربايجاندىق كينوتانۋشىلارمەن سۇحباتتاسىپ، ولاردىڭ وي-پىكىرلەرىن جينادىق.
مولديار ەرگەبەكوۆ، كينوتانۋشى، ونەرتانۋ دوكتورى (قازاقستان)
قازىرگى مادەني كەڭىستىكتە، اسىرەسە كينو سالاسىندا، كوممۋنيكاسيا مەن جاڭا تەحنولوگيالاردىڭ قارقىندى دامۋى ۇلكەن سەرپىلىس اكەلدى. بۇگىندە فيلم ءتۇسىرۋ بۇرىنعىعا قاراعاندا الدەقايدا قولجەتىمدى بولىپ كورىنەدى. قارجىلىق تۇرعىدان دا ارزان سياقتى اسەر قالدىرعانىمەن، ەڭ باستىسى - بۇل ۇدەرىستىڭ اۋقىمى كەڭەيدى. ەندى فيلم تەك كاسىبي ستۋديالاردىڭ ەمەس، اۋەسقوي رەجيسسەرلەردىڭ دە قولىنان شىعا باستادى.
الايدا فيلم ءتۇسىرۋ مەن ونى كورۋ جەتكىلىكسىز. ەڭ ماڭىزدىسى - سول ءفيلمنىڭ نە جايىندا ەكەنىن، ونىڭ قالاي جانە قانداي ماقساتپەن تۇسىرىلگەنىن ءتۇسىنۋ. بۇل تۇستا بىزگە كومەككە كەلەتىن سالا - كينوتانۋ. كينوتانۋ تەك ءفيلمدى تالداۋ عانا ەمەس، ونىڭ مادەني، الەۋمەتتىك جانە تەحنولوگيالىق ماڭىزىن اشىپ كورسەتۋگە باعىتتالعان عىلىم.
سوندىقتان كينونى قابىلداۋ مادەنيەتىن، ياعني كورەرمەننىڭ ءفيلمدى ءتۇسىنۋ قابىلەتىن دامىتۋ قاجەت. بۇل «perceptiom» - قابىلداۋ كەزەڭى - كوركەم تۋىندىنىڭ قوعاممەن بايلانىسىن قالىپتاستىراتىن ماڭىزدى ءسات.
قازىرگى تاڭدا كينو الەمى سان قىرلى ءارى الۋان ءتۇرلى. سول سەكىلدى كينوتانۋ سالاسى دا كەڭەيىپ، جاڭا باعىتتارمەن تولىقۋى كەرەك. ءبىز تەك فيلم ءوندىرىسىن عانا ەمەس، ونى زەرتتەيتىن، تالدايتىن، تۇسىندىرەتىن مامانداردى دا كوبەيتۋىمىز قاجەت. ول ءۇشىن كينوتانۋ سالاسىندا ءبىلىم بەرۋدىڭ مازمۇنىن جاڭارتىپ، باعدارلامالاردىڭ ساپاسىن ارتتىرۋ - ۋاقىت تالابى دەپ ەسەپتەيمىن.
سۋلتان ۋسۋۆالييەۆ، كينوتانۋشى، ونەرتانۋ كانديداتى (قىرعىزستان)
كينوتانۋ سالاسىنىڭ ماڭىزى تۋرالى ءسوز قوزعاۋ - بۇگىنگى مادەني كەڭىستىكتە اسا وزەكتى ماسەلە. مىسالى، قىرعىزستانداعى جاعدايعا كوز جۇگىرتسەك، كاسىبي كينوتانۋشىلاردىڭ سانى وتە از. ولاردىڭ قاتارىندا وتىز جىلدان استام تاجىريبەسى بار گۋلبارا تولومۋشوۆا جانە مەن عانا بارمىز دەۋگە بولادى. ال قازاقستاندا بۇل سالا الدەقايدا جۇيەلى دامىپ كەلەدى. مۇندا بەلگىلى عالىم، كينوتانۋشى گۇلنار ابىكەيەۆا نەگىزىن قالاعان كينوسىنشىلار اسسوسياسياسى تابىستى جۇمىس ىستەيدى. بۇگىندە ونىڭ قۇرامىندا 29 مۇشەسى بار، بۇل ءوز كەزەگىندە كاسىبي قاۋىمداستىقتىڭ قالىپتاسقانىن كورسەتەتىن ايقىن بەلگى.
دەگەنمەن، كينوتانۋدىڭ تۇپكى ءمانى نەدە؟ ەڭ الدىمەن، ول - كينو ونەرىنىڭ جىلناماسىن ساقتاۋ جانە زەردەلەۋ. كينو تاريحىن زەرتتەۋ ارقىلى ءبىز قوعامداعى مادەني، الەۋمەتتىك، رۋحاني وزگەرىستەردى تۇسىنەمىز. كينوتانۋشىنىڭ باستى مىندەتى - ءفيلمدى تەك جاقسى نە جامان دەپ باعالاۋ ەمەس، ونىڭ كوركەمدىك تابيعاتىن، قۇرىلىمىن، يدەيالىق مازمۇنىن تەرەڭ تالداۋ.
كينوتانۋ - وبەكتيۆتى كوزقاراس قالىپتاستىرۋدىڭ، كينوپروسەستىڭ باعىت-باعدارىن ايقىنداۋدىڭ ماڭىزدى قۇرالى. وكىنىشكە قاراي، بىزدە كينونى اكادەميالىق عىلىم رەتىندە زەرتتەيتىن ورتالىقتار مەن سىنشىلار قاۋىمى ءالى دە جەتكىلىكسىز. سول سەبەپتى كينوتانۋشىلار ەڭبەگىنە دەگەن قىزىعۋشىلىق تا باياۋ قالىپتاسىپ كەلەدى.
سوعان قاراماستان، مەن بۇل سالانىڭ بولاشاعىنا سەنەمىن. كينوتانۋ -ۋاقىت وتە كەلە ءوز قۇندىلىعى ايقىندالاتىن عىلىم. سەبەبى كينو ارقىلى ءبىز ءوز ءداۋىرىمىزدىڭ رۋحىن، مادەنيەتىمىزدىڭ ءوسۋ جولىن جانە قوعامنىڭ كوركەم جادىن ساقتايمىز. ۋاقىتى كەلگەندە ءبىزدىڭ ەڭبەكتەرىمىز بولاشاق ۇرپاققا باعىت-باعدار بولىپ، سول كەزەڭنىڭ رۋحاني ايناسىنا اينالاتىنىنا كامىل سەنەمىن.
ەۆگەنيي مايزەل، كينوسىنشى، كينوتانۋشى، «يسكۋسستۆو كينو» جۋرنالىنىڭ اۆتورى مەن رەداكتورى (رەسەي)
بۇگىنگى كينوتانۋ سالاسى كوبىنە وتكەن عاسىردىڭ فيلمدەرىنە سۇيەنەدى. الايدا، قازىرگى زاماننىڭ ماسەلەلەرىن زەرتتەۋگە دەن قويعان عالىمدار دا بارشىلىق. دەگەنمەن كينوتانۋدىڭ عىلىمي سالا رەتىندەگى ماڭىزى ءجيى نازاردان تىس قالىپ جاتادى. تەوريالىق ءبىلىم ەكىنشى ورىنعا ىسىرىلىپ، تاجىريبە مەن ينتۋيسياعا عانا يەك ارتۋ ۇردىسكە اينالعانداي.
مەنىڭ ويىمشا، ەگەر جاس كينەماتوگرافيستەر كينوسىنشىلار مەن كينوتانۋشىلاردىڭ ەڭبەكتەرىنە نازار اۋدارماسا، ءوز دامۋ جولىندا كوپتەگەن مۇمكىندىكتى جوعالتىپ الۋى ىقتيمال. سەبەبى تەورياسىز ىزدەنىس - باعىتسىز قوزعالىس ىسپەتتى. ءبىر قاتەلىكتى قايتا-قايتا قايتالاۋ ءقاۋپى دە سودان تۋىندايدى.
سوندىقتان دا، رەجيسسەر مەن سەناريست ءۇشىن تەوريانى زەرتتەۋ - ءوز كاسىبىن تەرەڭ ۇعىنۋدىڭ العاشقى باسپالداعى. تەوريانىڭ كومەگىمەن ادام تەك ءوز تۇيسىگى مەن تاجىريبەسىنە سۇيەنىپ بايقامايتىن، ونەردىڭ ىشكى مەحانيزمدەرىن اشادى. كينو ونەرىن تەوريالىق تۇرعىدان زەرتتەۋ ارقىلى كوكجيەك كەڭەيىپ، شىعارماشىلىق تۇيسىك تەرەڭدەي تۇسەدى.
ونەردە دارا كۇش جەتكىلىكسىز. شىنايى جاڭالىق پەن ساپالى ناتيجە تەك ادامزاتتىڭ جيناعان ءبىلىمىن مەڭگەرۋ ارقىلى كەلەدى.
كينوتانۋ - كينەماتوگرافتىڭ تابيعاتىن، ونىڭ زاڭدىلىقتارى مەن كوركەمدىك پرينسيپتەرىن ايقىندايتىن عىلىم. بۇگىنگى مادەني كەڭىستىكتەگى كينوتانۋدىڭ ءرولى ەرەكشە: ول رەجيسسەرلەر مەن سەناريستەرگە بەينەنىڭ ءتىلى ارقىلى كورەرمەنمەن سىرلاسۋدىڭ جولىن ۇيرەتەدى. كينونىڭ قالاي جۇمىس ىستەيتىنىن ءتۇسىنۋ - شىنايى ونەردىڭ باستاۋى.
يننا سمايلوۆا، كينوسىنشى، ونەرتانۋ كانديدايى، FIPRESCI مۇشەسى (قازاقستان)
مەنىڭ ويىمشا، كينوتانۋ مەن كينو سىنى – كينەماتوگرافتىڭ بارلىق قوزعالىسىن بىرىكتىرىپ، ونىڭ ىشكى ءمانىن ايقىندايتىن، كوركەم ويدى جيناقتايتىن ۇردىستەر. بۇگىنگى تاڭدا قازاقستاندىق كينونىڭ جان-جاقتى دامۋىنىڭ ورتاسىندا كينوتانۋ سالاسىنىڭ ماڭىزى ەرەكشە. ول زاماناۋي مادەني كەڭىستىكتە نە بولىپ جاتقانىن تۇسىنۋگە، رەجيسسەرلىك ويلاۋدىڭ قىر-سىرىن اشۋعا، قازاق كينوسىنىڭ جاڭا تەندەنسيالارىن سارالاۋعا مۇمكىندىك بەرەدى.
ءقازىر «رەجيسسەر»، «قازاق كينوسى» سەكىلدى ۇعىمداردى قايتا قاراۋ قاجەتتىگى تۋىنداپ وتىر. بۇل ۇعىمداردى ۇلتتىق مادەنيەت كونتەكستىندە ءتۇسىندىرۋ - ۋاقىت تالابى. زاماناۋي قازاق مادەنيەتىنىڭ وتكەنمەن توعىسۋى ەكراندا ەرەكشە سيپاتتا كورىنىس تابۋدا، ال وسى ۇدەرىستى تەرەڭ تالداۋ - كينوتانۋشىنىڭ باستى مىندەتى. تاريحي جانە مۇراعاتتىق دەرەكتەرمەن جۇمىس ىستەۋ دە ايرىقشا ماڭىزدى، سەبەبى ونسىز وتاندىق كينونىڭ ەۆوليۋسياسىن تولىق اشۋ مۇمكىن ەمەس.
كينوتانۋ تەك تەوريالىق ىزدەنىس پەن ءماتىن جازۋدان تۇرمايدى. بۇگىندە كينوتانۋشى بەينەمەن، كادرمەن، ۆيزۋالدى تىلمەن سويلەي ءبىلۋى ءتيىس. بۇل - ۋاقىتپەن بىرگە وزگەرگەن كاسىبي بولمىستىڭ جاڭا كورىنىسى. سوندىقتان مەن جاس كينوتانۋشىلاردىڭ وسى باعىتتا ەركىن ويلاپ، بەينەلى ويدى زەرتتەۋ مەن تالداۋدا جاڭا ادىستەردى يگەرۋىنە ۇلكەن ءۇمىت ارتامىن.
گۋلبارا تولومۋشوۆا، كينوتانۋشى، NETPAC پەن FIPRESCI مۇشەسى (قىرعىزستان)
كسرو ىدىراعاننان كەيىن قىرعىزستاندا جاس مامان رەتىندە جالعىز قالىپ ەدىم. اعا بۋىن ارىپتەستەرىمنىڭ ءبىرى زەينەتكە كەتىپ، ءبىرى شەتەلگە قونىس اۋداردى. ال مەن ءوز ەلىمنىڭ ۇلتتىق كينوسىن زەرتتەۋگە دەن قويدىم. ول 1990-شى جىلدار ەدى - ءبارى مۇلدە باسقاشا بولاتىن. فيلمدەردى VHS-كاسسەتالارعا جازىپ، پوشتا ارقىلى جىبەرىپ، جاۋاپتى اپتالاپ كۇتەتىنبىز. تەحنيكا دا، جاعداي دا شەكتەۋلى بولسا دا، ول كەزەڭدى ەنتۋزيازم مەن سەنىمنىڭ ۋاقىتى دەپ اتار ەدىم. سول جىلدارى بارلىعىمىزدىڭ ارمانى ءبىر - رەجيسسەر بولۋ ەدى.
بۇگىندە جاعداي وزگەردى. كينوتانۋ ماماندىعى تانىلىپ، جاستاردىڭ نازارىن وزىنە اۋدارا باستادى. ءقازىر ولار بۇل سالانىڭ قانشالىقتى قىزىقتى ءارى بولاشاعى بار ەكەنىن ءتۇسىنىپ كەلەدى. پۋبليكاسيالار مەن سۇحباتتار، فەستيۆالدەر مەن ماراپاتتار - مۇنىڭ ءبارى جاس بۋىنعا شابىت بەرىپ، ولاردى جاڭا ىزدەنىستەرگە جەتەلەيدى. كينوتانۋ - مادەني ءومىردىڭ ورتاسىندا بولۋعا، كينو ارقىلى قوعامنىڭ تامىرىن سەزىنۋگە مۇمكىندىك بەرەدى.
ءقازىر مەن بىرنەشە فەستيۆالدەردە قاتار جۇمىس ىستەيمىن. بۇل فيلمگە دەگەن ءبىلىم مەن شەكسىز قۇمارلىقتى تالاپ ەتەتىن، توقتاۋسىز جۇرەتىن جۇمىس. ستۋدەنت كەزىمدە تەلەديداردا وندىرىستىك تاجىريبەدەن ءوتتىم. سول كەزدە ءبىر رەداكتور ماعان قىرعىز كينوسى تۋرالى باعدارلاما دايىنداۋدى ۇسىندى. كەيىن، اكادەميانى ءتامامداعان سوڭ، ماعان:
«قىرعىز انيماسياسىنىڭ تاريحىن ەشكىم جازعان جوق، وسى تاقىرىپتى زەرتتەپ كورسەڭ قايتەدى؟» - دەدى.
سول ءسات مەنىڭ ومىرىمدەگى جاڭا بەتبۇرىس بولدى. ارحيۆتەردى اقتارىپ، سيرەك ماتەريالداردى جينادىم، دەرەكتەردى تالداپ، زەرتتەۋ جۇمىسىن جازدىم. ۋاقىت وتە كەلە، مەنىڭ ەڭبەگىم حالىقارالىق دەڭگەيدە مويىندالدى. اراعا ون بەس جىل سالىپ، ول «دۇنيەجۇزىلىك انيماسيا تاريحى» اتتى ءۇش تومدىق جيناققا ەندى.
بيىل قىرعىزستاندا تۇڭعىش رەت «ToonDook» اتتى انيماسيالىق كينوفەستيۆال ءوتتى. ماعان وسى فەستيۆال اياسىندا قىرعىز انيماسياسىنىڭ تاريحىنا ارنالعان ءبىر ساعاتتىق باعدارلاما ازىرلەۋ تاپسىرىلدى. انيماسيا سالاسىنىڭ ارداگەرلەرىن شاقىرىپ، ولاردىڭ فيلمدەرىن كورسەتتىك، بىرگە پىكىرتالاس وتكىزدىك. بۇل مەن ءۇشىن ەرەكشە ءسات بولدى. سەبەبى كەزىندە شاعىن كۋرستىق جۇمىس رەتىندە باستالعان دۇنيەم بۇگىندە ۇلتتىق مادەني مۇرانىڭ ءبىر بولشەگىنە اينالدى.
ءوز جولىما كوز جۇگىرتسەم، كينوتانۋ جاي عانا تەوريالىق عىلىم ەمەس ەكەنىن انىق تۇسىنەمىن. ول - ءتىرى مادەنيەتپەن، ادام جادىمەن، ۋاقىتتىڭ ىزىمەن جۇمىس ىستەۋ ونەرى.
جازگۋل يبرايموۆا، كينوسىنشى (قىرعىزستان)
بۇل شىنىمەن دە ورىندى سۇراق. كينوتانۋدىڭ ماڭىزى وراسان، ويتكەنى بۇگىنگى كينو كەڭىستىگىندە بولىپ جاتقان ۇدەرىستەردى ءتۇسىنۋ - مادەني دامۋدىڭ اجىراماس بولىگى.
دەگەنمەن ماسەلە كينوتانۋدىڭ ءوزى قانداي جاعدايدا دامىپ جاتقانىنا كەلىپ تىرەلەدى. مىسالى، قىرعىزستاندا ءالى كۇنگە دەيىن كينو سىنى مەن كينوتانۋعا ارنالعان تۇراقتى وقۋ جۇيەسى قالىپتاسقان جوق. ارنايى مەكتەپتىڭ بولماۋى دا سەزىلەدى. سول سەبەپتى كاسىبي دەڭگەيدە كينو زەرتتەۋمەن اينالىساتىن ماماندار وتە از. اسىرەسە بۇل سالادا اكادەميالىق دايىندىقتان وتكەن زەرتتەۋشىلەردىڭ جەتىسپەۋى ايقىن بايقالادى.
كينوتانۋدىڭ ءمانىن مەن ۇرپاقتار ساباقتاستىعىمەن سالىستىرار ەدىم. سەبەبى كينو - ءوز ءداۋىرىنىڭ كوركەم ايناسى. ول ۋاقىتتىڭ ءۇنىن، قوعامنىڭ تىنىسىن، ادامنىڭ تاعدىرىن، ۇلتتىڭ مادەني جادىن ءدال ءارى اسەرلى تۇردە جەتكىزەتىن ونەر. باسقا ەشبىر ونەر ءتۇرى زاماندى ءدال وسىلاي بەينەلەپ، سول قالپىندا ساقتاي المايدى.
وسى تۇرعىدان العاندا، كينوتانۋ - ۋاقىتتىڭ بەينەسىن تالداپ، ءتۇسىندىرىپ، ونى ساقتاپ قالۋعا باعىتتالعان ەرەكشە عىلىم. ەگەر فيلمدەرگە عىلىمي جانە سىني تۇرعىدا كوز جۇگىرتپەسەك، ولار تەك سورەدە شاڭ باسىپ جاتقان ماتەريالعا اينالىپ، ءوز ءومىرىن جالعاستىرا الماي قالار ەدى.
كينوتانۋ فيلمگە جاڭا تىنىس بەرەدى. ول ەكراندىق تۋىندىنى مادەني قۇجاتقا اينالدىرىپ، ءداۋىر مەن ادامدى تانۋدىڭ قاينار كوزىنە جەتكىزەدى. سوندىقتان ونىڭ قازىرگى مادەني كەڭىستىكتەگى ءرولى ايرىقشا. قالاي دەسەك تە، كينوتانۋ بۇگىن جاسالعان تۋىندىلار ارقىلى ەرتەڭگى ۇرپاققا جەتەتىن رۋحاني جادى مەن مادەني تاجىريبەنى ساقتاپ قالۋدىڭ جولى بولىپ كەلەدى.
ايگيۋن اسلانوۆا، كينوتانۋشى (ازەربايجان)
مەنىڭشە، كينوتانۋدىڭ ماڭىزى الدەقاشان دالەلدەنگەن. بۇل قۇبىلىستى ءبىز فرانسۋزدىڭ «جاڭا تولقىنى»، يتالياندىق نەورەاليزم نەمەسە وزگە دە كينو اعىمدارىنىڭ داۋىرىنەن ايقىن بايقاي الامىز. ءتىپتى بريتان كينوسىنىڭ «اشۋلى جاس جىگىتتەرى» ساحناعا شىققان تۇستا دا، وسى قوزعالىستاردىڭ ءتۇپ-تامىرى كينو سىنى مەن كينوتانۋدان باستاۋ العانى انىق كورىنەدى. كينەماتوگراف تاريحىن تۇبەگەيلى وزگەرتكەن تۇلعالار ءدال وسى سىن مەن زەرتتەۋ ورتاسىنان شىقتى. مىسالى، فرانسۋا تريۋففو مەن جان-ليۋك گودار تەك رەجيسسەر عانا ەمەس، كينونى ءتۇسىنۋ مەن زەردەلەۋدىڭ جاڭا پاراديگماسىن قالىپتاستىرعان تۇلعالار ەدى. ولار ەكراندىق ءتىلدى زەرتتەپ، بەينەلەۋ مۇمكىندىكتەرىن كەڭەيتىپ، كينو ونەرىنىڭ بولاشاق باعىتىن بولجاۋعا تالپىندى.
سوندىقتان كينوتانۋدىڭ ءرولى ايقىن: ول كينونىڭ ارتىندا ءۇنسىز باقىلاۋشى بولىپ قالمايدى، قايتا ونىڭ دامۋ جولىن ايقىنداپ، بولاشاعىن قالىپتاستىرادى. عىلىمي زەرتتەۋلەر، سىني ماقالالار مەن تالداۋلار – كينونىڭ قاي ارناعا بەت الىپ بارا جاتقانىن، الداعى ۋاقىتتا قانداي پىشىنگە ەنە الاتىنىن تۇسىنۋگە مۇمكىندىك بەرەدى.
قازىرگى زامان مادەنيەتىندە كينوتانۋ ەرەكشە ورىن الادى. بۇل سالا تەك فيلمدەر تۋرالى تالداۋ جاساۋمەن شەكتەلمەي، قوعامنىڭ رۋحاني بەت-بەينەسىن، كوركەمدىك دامۋ دەڭگەيىن، ەستەتيكالىق تالعامىن ايقىندايتىن ماڭىزدى قۇرالعا اينالىپ وتىر. كينوتانۋشىنىڭ ەڭبەگى رەجيسسەردىڭ ويىمەن، كورەرمەننىڭ قابىلداۋىمەن، ۋاقىتتىڭ ۇنىمەن تىعىز بايلانىستى. سول سەبەپتى كينوتانۋ - ونەر مەن عىلىمنىڭ، وي مەن سەزىمنىڭ توعىسقان كەڭىستىگى.
فورۋم اياسىندا ءتۇرلى ەلدەن كەلگەن مامانداردىڭ وي-پىكىرلەرى وسىنىڭ دالەلى ىسپەتتى. ولار كينونى تەك مادەني ءونىم رەتىندە ەمەس، ۇلتتىڭ دۇنيەتانىمىن، قوعامنىڭ قوزعالىسىن، تاريحتىڭ ءىزى مەن بولاشاقتىڭ باعدارىن بەينەلەيتىن كۇردەلى قۇبىلىس رەتىندە قاراستىرادى. قازىرگى كەزدە سيفرلىق تەحنولوگيالار مەن جاھاندانۋ ءۇردىسى كينوونەردىڭ جاڭا مۇمكىندىكتەرىن اشىپ، سونىمەن قاتار ونىڭ مازمۇندىق ساپاسىنا ۇلكەن سىن قويىپ وتىر. وسىنداي جاعدايدا كينوتانۋدىڭ ماڭىزى ودان ءارى ارتا تۇسەدى، سەبەبى ول كينونى تەك كوركەمدىك تۇرعىدا ەمەس، الەۋمەتتىك، فيلوسوفيالىق، ءتىپتى ەتيكالىق تۇرعىدا تۇسىندىرۋگە ۇمتىلادى. ءاربىر ءفيلمدى زەرتتەۋ ارقىلى ءبىز ءوز ۋاقىتىمىزدىڭ رۋحىن، قوعامنىڭ ويلاۋ مادەنيەتىن جانە كورەرمەننىڭ ىشكى الەمىن تانىپ بىلەمىز.
بۇگىندە كينونى كورۋ مادەنيەتى مەن ونى ءتۇسىنۋ مادەنيەتى قاتار دامۋى قاجەت. كينوتانۋ وسى ەكى باعىتتىڭ اراسىنداعى كوپىر قىزمەتىن اتقارادى. ول رەجيسسەردىڭ كوركەمدىك ويىن كورەرمەنگە جەتكىزۋدىڭ، ال كورەرمەننىڭ قابىلداۋىن تەرەڭدەتۋدىڭ تەتىگى بولىپ تابىلادى. كينوتانۋ ارقىلى ءبىز ۇلتتىق كينەماتوگرافيانىڭ دامۋ جولىن سارالاپ قانا قويماي، ونىڭ الەمدىك كينو ۇدەرىسىندەگى ورنىن ايقىنداي الامىز. بۇل سالا - رۋحاني جاڭعىرۋدىڭ، مادەني تاۋەلسىزدىكتىڭ جانە ۇلتتىق بىرەگەيلىكتىڭ اجىراماس بولىگى. سول سەبەپتى كينوتانۋدىڭ دامۋى ەلدىڭ مادەني ءورىسىن كەڭەيتىپ، جاڭا شىعارماشىلىق ۇرپاقتىڭ قالىپتاسۋىنا جول اشادى. كينو تۋرالى وي ايتۋ - بولاشاق تۋرالى وي ايتۋ، ال كينوتانۋ سول بولاشاققا باستايتىن زياتكەرلىك باعىت بولىپ قالا بەرمەك.