المالى اۋدانىندا قالا تۇرعىندارى ءۇشىن جايلى دەمالىس ايماعىن اباتتاندىرۋ جۇمىستارى باستالدى. جوندەۋ جۇمىستارى روزىباكييەۆ كوشەسىنىڭ بويىندا، روزىباكييەۆ پەن تولە بي كوشەلەرىنىڭ قيىلىسىندا جۇرگىزىلىپ جاتىر، -دەپ حابارلايدى اqshamnews.kz ءتىلشىسى.
وسى اپتادا اۋدان اكىمى تۇرعىندارمەن كەزدەسىپ، الداعى اباتتاندىرۋ جۇمىستارىنىڭ بارىسىن تالقىلادى. ەستەرىڭىزگە سالا كەتەيىك، بىلتىر «حالىق قاتىساتىن بيۋدجەت» جوباسى اياسىندا تۇرعىندارمەن بىرلەسىپ، بۇرىنعى بەيبەرەكەت ساۋدا ورنىنىڭ ورنىندا جاڭا ساياباق سالىنعان بولاتىن. ول روزىباكييەۆ كوشەسىنىڭ بويىندا (روزىباكييەۆ پەن دۇيسەنوۆ كوشەلەرىنىڭ قيىلىسىندا) ورنالاسقان جانە اشىلعان ساتتەن باستاپ-اق اۋدان تۇرعىندارىنىڭ سۇيىكتى دەمالىس ورنىنا اينالدى.
ال ءدال وسى ساياباقتان ءسال جوعارىراق، تولە بي كوشەسىنە جاقىن جەردە تاعى ءبىر سكۆەر بار، ول 2016 جىلدان بەرى، ياعني ون جىلعا جۋىق ۋاقىتتان بەرى جاڭارتىلماعان. تۇرعىنداردىڭ كوپتەگەن وتىنىشىمەن بيىل بۇل اۋماقتى جاڭارتۋ جۇمىستارى اعىمداعى جوندەۋ اياسىندا قولعا الىندى.
جوسپارلانعان جۇمىستار:
– كورشى سكۆەرمەن ءبىرىڭعاي ستيلدە زاماناۋي جارىقتاندىرۋ ورناتۋ (كابەلدەردى اۋىستىرۋ، جاڭا تىرەكتەر قويۋ)؛
– جاسىل جەلەكتى كوبەيتۋ: كوگال توسەۋ، بۇتالار مەن ءىرى اعاشتار وتىرعىزۋ، اۆتوماتتى سۋارۋ جانە تامشىلاتىپ سۋارۋ جۇيەسىن ورناتۋ؛
– دەمالىس جانە سپورت ايماعىن اباتتاندىرۋ: جاتتىعۋ قۇرىلعىلارى، اتكەنشەكتەر، پەرگولا، ورىندىقتار مەن قوقىس جاشىكتەرىن ورناتۋ.
جاڭارتۋ ناتيجەسىندە ەكى كورشىلەس اۋماق — وتكەن جىلى سالىنعان سكۆەر مەن بيىل اباتتاندىرىلىپ جاتقان ايماق ءبىرتۇتاس جاسىل دەمالىس كەڭىستىگىن قالىپتاستىرادى. قاراشا ايىنىڭ سوڭىنا دەيىن جاقىن ماڭداعى تۇرعىندار روزىباكييەۆ كوشەسىنىڭ باتىس جاعىندا، تولە بي كوشەسىنەن دۇيسەنوۆ كوشەسىنە دەيىنگى كەڭ، كورىكتى جاسىل ايماقتا سەرۋەندەپ، سپورتپەن شۇعىلدانىپ، دەمالا الادى.
المالى اۋدانىنىڭ اكىمدىگى قالالىق ورتانى جۇيەلى تۇردە جاڭارتىپ، اۋداننىڭ ەكولوگيالىق كەلبەتىن جاقسارتىپ، ونى تۇرعىندار ءۇشىن بارىنشا جايلى ءارى قولايلى ەتۋ باعىتىندا جۇمىستاردى جالعاستىرىپ جاتىر.