الەۋمەتتىك جەلىلەردە كەڭىنەن تاراعان «قازدان قاشقان بالا» ۆيدەوسىنىڭ كەيىپكەرى – ءۇش جاسار كەرەي ماحامبەت ۇلى كۇتپەگەن سىيلىققا يە بولدى.
اقتوبە قالاسىنداعى «اۋىل» پارتياسى فيليالىنىڭ وكىلدەرى كىشكەنتاي كەرەيگە 100 قاز تارتۋ ەتتى، - دەپ حابارلايدى Aqshamnews.kz.
جەلىدە ۆيرۋسقا اينالعان بەينەجازبا بۇگىندە 200 ميلليوننان استام قارالىم جيناعان. ءتىپتى اتى الەمگە تانىمال امەريكالىق رەپەر Snoop Dogg تا بۇل ۆيدەونى ءوز پاراقشاسىندا ءبولىسىپ، ميلليونداعان جازىلۋشىسىنا ۇسىنعان.
جەلى جۇلدىزى تۋرالى سايتىمىزدا بۇعان دەيىن دە جازعان ەدىك.
كەرەي اقتوبە قالاسىنداعى كۇنشۋاق شاعىناۋدانىندا تۇرادى. اكەسى — دەنە شىنىقتىرۋ ءپانىنىڭ ءمۇعالىمى. وتباسى مال شارۋاشىلىعىمەن اينالىسادى: جىلقى، پوني جانە قاز ۇستايدى.
الايدا جەلى قولدانۋشىلارى بۇل جاعدايعا ەرەكشە رەاكسيا ءبىلدىردى. كوپشىلىك ءازىل ارالاس پىكىر قالدىرىپ جاتىر:
«قازدان قاشقان بالاعا تاعى دا قاز سىيلاعانى قىزىق ەكەن»،
«نەدەن قورىقساڭ، سوعان تۇتىلاسىڭ دەيدى عوي»،
«ءجۇز جىلقىنىڭ الدىنا ءتۇسىپ جۇگىرسەم بە ەكەن؟..»
كەرەيدىڭ قازدان قاشقان ءساتى كۇلكى مەن ىقىلاسقا تولى رەاكسيالار تۋدىرعانىمەن، ەلگە تانىمال بولۋىمەن بىرگە وسىنداي توسىن سىيعا دا سەبەپ بولدى.