الماتى اكىمى دارحان ساتىبالدى جۇمىس ساپارى اياسىندا «الاتاۋ جارىق كومپانياسىنا» باردى، - دەپ حابارلايدى Aqshamnews.kz.
اتالعان كومپانيا – الماتى مەن الماتى وبلىسىنداعى 4 ميلليونعا جۋىق تۇتىنۋشىنى ەلەكتر ەنەرگياسىمەن قامتيتىن ەڭ ءىرى ەنەرگيا تاراتۋشى ۇيىم.
الماتى اكىمى دارحان ساتىبالدىعا ءوڭىردىڭ ەنەرگەتيكالىق ينفراقۇرىلىمىن دامىتۋداعى كاسىپورىننىڭ قىزمەتىن، جۇزەگە اسىرىلىپ جاتقان جوبالاردى جانە ستراتەگيالىق جوسپارلاردى «الاتاۋ جارىق كومپانياسى» اق باسقارما ءتوراعاسى اباي اسىلوۆ تانىستىردى.
ساپار بارىسىندا قالا اكىمى كاسىپورىننىڭ وندىرىستىك بولىمشەلەرىن ارالاپ، ەلەكتر جابدىقتارىن جوندەۋ سەحىن، دياگنوستيكالىق قىزمەتتى جانە اپاتتىق جاعدايدى جەدەل جويۋعا ارنالعان زاماناۋي ارنايى تەحنيكانى كوردى.
سونداي-اق سوڭعى جىلدارداعى ينۆەستيسيالىق باعدارلامانىڭ قورىتىندىلارى تالقىلاندى. ونىڭ اياسىندا 344 شاقىرىمنان استام كابەلدىك جەلى سالىندى، 129 ترانسفورماتورلىق قوسالقى بەكەت جاڭعىرتىلدى، 20 شاقىرىمعا جۋىق اۋە جەلىسى جاڭارتىلدى جانە جاڭا ەلەكتر نىساندارى پايدالانۋعا بەرىلدى. 2025 جىلى 115 شاقىرىمنان استام كابەلدىك جەلى سالۋ، 21 قوسالقى بەكەتتى جاڭعىرتۋ جانە 15 ترانسفورماتورلىق قوسالقى بەكەتتى زاماناۋي كەشەندى-بلوكتىق ۇلگىگە اۋىستىرۋ جوسپارلانىپ وتىر.
دارحان ساتىبالدىنىڭ ايتۋىنشا، سەنىمدى ءارى ۇزدىكسىز ەلەكترمەن جابدىقتاۋ – الماتىلىقتاردىڭ جايلى ءومىر ءسۇرۋى مەن قالانىڭ تۇراقتى ەكونوميكالىق ءوسىمىنىڭ باستى شارتى.
ساپار قورىتىندىسى بويىنشا اكىم ءبىرقاتار تاپسىرما بەردى: ەسكىرگەن كابەلدىك جەلىلەر مەن قوسالقى بەكەتتەردى جاڭعىرتۋ قارقىنىن جەدەلدەتۋ، حالىق تىعىز ورنالاسقان اۋداندارعا باسا نازار اۋدارا وتىرىپ، كۇزگى-قىسقى كەزەڭگە دايىندىقتى كۇشەيتۋ. سونىمەن قاتار، دارحان ساتىبالدى اجك باسشىلىعىنا جەلىلەردى باقىلاۋ مەن باسقارۋدىڭ تيىمدىلىگىن ارتتىرۋ ءۇشىن سيفرلىق تەحنولوگيالاردى ەنگىزۋدى، اپاتتىق جاعدايلاردا حالىقتى جەدەل اقپاراتتاندىرۋ ماقساتىندا اكىمدىكپەن ءوزارا بايلانىستى كۇشەيتۋدى تاپسىردى.
قالا باسشىسى جوندەۋ جۇمىستارىنىڭ ساپاسىن ارتتىرۋ جانە قايتا قۇرۋ كەستەسىن قاتاڭ ساقتاۋ قاجەتتىگىن اتاپ ءوتىپ، كەز كەلگەن كىدىرىس تۇرعىنداردىڭ جايلىلىعىنا تىكەلەي اسەر ەتەتىنىن ايتتى.