الماتىنىڭ ناۋرىزباي اۋدانىندا 2025 جىلى جول ينفراقۇرىلىمىن جاڭارتۋ بويىنشا اۋقىمدى جۇمىستار جۇرگىزىلىپ جاتىر. جۇمىستار نەگىزگى كوشەلەردى قامتىپ وتىر، دەپ اتاپ ءوتتى ناۋرىزباي اۋدانىنىڭ اكىمدىگى.
تۇرعىنداردىڭ ءوتىنىشى جانە اۋدان اكىمدىگىنىڭ باستاماسى بويىنشا الماتى موبيلدىلىك باسقارماسى قالا اكىمدىگىنىڭ جوبالىق كەڭسەسىنىڭ قولداۋىمەن جالپى ۇزىندىعى 47،1 شاقىرىم بولاتىن 35 كوشەدە ورتاشا جوندەۋ جۇمىستارىن باستادى. بۇل اۋدان ءۇشىن رەكوردتىق كورسەتكىش.
بۇگىندە جالپى ۇزىندىعى 34،9 شاقىرىمنان اساتىن 26 كوشەدە جوندەۋ جۇمىستارى اياقتالدى. تاعى 3 ۋچاسكەدە جۇمىستار جالعاسۋدا. جوندەۋ جۇمىستارى بيىل 15 قازانعا دەيىن تولىق اياقتالادى دەپ جوسپارلانىپ وتىر. قابىلبايەۆ، سەيىتمەتوۆ، تىنىبايەۆ، سمايلوۆ، ايتەي باتىر، لاپين، قوسىنوۆ، ارمان، جاقايەۆ جانە باسقا دا ءبىرقاتار كوشەدە جوندەۋ جۇمىستارى اياقتالدى.
مامانداردىڭ ايتۋىنشا، جول توسەمىن جاڭارتۋ قوزعالىس قاۋىپسىزدىگى مەن جايلىلىعىن ارتتىرادى، شاعىناۋداندار اراسىنداعى كولىك قاتىناسىن جاقسارتادىجانە نەگىزگى ماگيسترالدارداعى جۇكتەمەنى ازايتادى.
قالا تۇرعىندارى جۇزەگە اسقان وزگەرىستەرگە وڭ باعا بەرىپ وتىر.
«بۇرىن قازىبەكوۆ كوشەسىندە ءتىپتى تومەن جىلدامدىقپەن ءجۇرۋدىڭ ءوزى قيىن بولاتىن. مىنە، ەندى جول تەگىس ءارى ءقاۋىپسىز. بۇل جۇرگىزۋشىلەرگە دە، جۇرگىنشىلەرگە دە ىڭعايلى»، - دەدى اۋدان تۇرعىنى ءاليما.
اكىمدىكتە ناۋرىزباي اۋدانىنىڭ قارقىندى دامىپ كەلە جاتقانى، جاڭا تۇرعىن ءۇي كەشەندەرىنىڭ بوي كوتەرگەنى اتاپ ءوتىلدى. سوندىقتان جول ينفراقۇرىلىمىن جاقسارتۋ وتە ماڭىزدى.