قازاقستاندا استانا، الماتى جانە شىمكەنت قالالارىندا ءۇش قوقىس جاعۋ زاۋىتى سالىنادى، دەپ حابارلايدى Aqshamnews.kz ءتىلشىسى.
ەكولوگيا جانە تابيعي رەسۋرستار ۆيسە-مينيسترى جومارت الييەۆتىڭ ايتۋىنشا، بۇل نىساندار قالدىقتارمەن جۇمىس ىستەۋ جۇيەسىنىڭ نەگىزگى بۋىنىنا اينالىپ، سۇرىپتاۋعا نەمەسە باسقا تاسىلدەرمەن قايتا وڭدەۋگە كەلمەيتىن قالدىقتاردى جويۋعا مۇمكىندىك بەرەدى. جوبالارعا قىتايلىق سەرىكتەستەرمەن بىرلەسىپ 293 ملرد تەڭگە ينۆەستيسيا قاراستىرىلعان، قۇرىلىس مەرزىمى – ەكى جىل.
ۆيسە-مينيستر سونداي-اق قالدىقتاردى سۇرىپتاۋ جانە قايتا وڭدەۋ ينفراقۇرىلىمى دا قاتار دامىپ جاتقانىن اتاپ ءوتتى. وتكەن جىلى ۋتيلالىم ەسەبىنەن ىسكە قوسىلعان جەڭىلدەتىلگەن قارجىلاندىرۋ تەتىگى اياسىندا «جاسىل دامۋ» اق 60 جوبانى ماقۇلداعان، ونىڭ 22ء-سى 89،4 ملرد تەڭگەگە قارجىلاندىرىلعان. باعدارلامانىڭ جالپى ءليميتى – 185 ملرد تەڭگە.
ماقۇلدانعان باستامالاردىڭ قاتارىندا:
-
92 جاڭا قوقىس تاسىعىش كولىك ساتىپ الۋ؛
-
قۋاتى جىلىنا 2،3 ملن توننا قالدىقتى قۇرايتىن 19 سۇرىپتاۋ كەشەنىن ىسكە قوسۋ؛
-
جىلىنا 920 مىڭ تونناعا دەيىن قالدىقتى قايتا وڭدەۋگە مۇمكىندىك بەرەتىن 33 جوبا بار.
ۆەدومستۆونىڭ باعالاۋىنشا، وسى شارالار قالدىقتاردى قايتا وڭدەۋ ۇلەسىن 40%-عا دەيىن جەتكىزۋگە مۇمكىندىك بەرەدى.