قازاقستاندىقتاردىڭ جەكە دەرەكتەرىن ساتۋمەن اينالىسقان توپ ۇستالدى

ىشكى ىستەر مينيسترلىگى ازاماتتاردىڭ جەكە دەرەكتەرىنىڭ زاڭسىز تارالۋ ارنالارىنا توسقاۋىل قويۋ بويىنشا جۇيەلى جۇمىستار جۇرگىزۋدە.

ءىىم-نىڭ كيبەرقىلمىسقا قارسى ءىس-قيمىل دەپارتامەنتى ۇلتتىق قاۋىپسىزدىك كوميتەتىمەن بىرلەسىپ، قازاقستاندىقتاردىڭ جەكە مالىمەتتەرىن ينتەرنەتتە زاڭسىز ساتقان قىلمىستىق توپتىڭ جولىن كەستى، دەپ حابارلايدى aqshamnews.kz Polisia.kz-كە سىلتەمە جاساپ. 

- اقپاراتتار مەملەكەتتىك بازالاردان زاڭسىز الىنعان جانە Telegram ارقىلى تاراتىلعان، ونىڭ ىشىندە كەيبىر كوللەكتورلىق كومپانيالارعا بەرىلگەن. 140-تان استام ادام، ونىڭ ىشىندە كومپانيا يەلەرى مەن ارنا اكىمشىلەرى ۇستالدى. قازىرگى تاڭدا بەس كۇدىكتى قاماۋعا الىندى. ءتىنتۋ بارىسىندا 400-دەن استام كومپيۋتەرلىك جانە باسقا دا ەلەكتروندىق تەحنيكا تاركىلەندى، - دەدى ءىىم كيبەرقىلمىسقا قارسى ءىس-قيمىل دەپارتامەنتىنىڭ باستىعى جاندوس ءسۇيىنباي. 

قىلمىستىق كودەكستىڭ 205-بابى 3-بولىگى (اقپاراتتىق جۇيەگە زاڭسىز قول جەتكىزۋ)، 147-بابى 5-بولىگى (جەكە ومىرگە قول سۇعۋ جانە جەكە دەرەكتەر تۋرالى زاڭنامانى بۇزۋ)، سونداي-اق 211-بابى 3-بولىگى (شەكتەۋلى ەلەكتروندىق اقپاراتتىق رەسۋرستاردى زاڭسىز تاراتۋ) بويىنشا قىلمىستىق ىستەر قوزعالدى. - وسى زاڭسىز ارەكەتكە قاتىسى بار ادامداردىڭ تولىق شەڭبەرى انىقتالۋدا، - دەدى جاندوس ءسۇيىنباي. ىشكى ىستەر مينيسترلىگى ازاماتتاردىڭ سيفرلىق قاۋىپسىزدىگىن بۇزاتىن قۇقىققا قارسى ارەكەتتەردىڭ جولىن كەسۋ جانە جەكە دەرەكتەردىڭ تارالۋىنا جول بەرمەۋ باعىتىنداعى جۇيەلى جۇمىستاردى جالعاستىرۋدا.